តារាកំប្លែងអ្នកនាង កាឆយ ទម្លាយរឿងខ្វះលុយធ្វើបុណ្យបងប្រុសរបស់អ្នកនាង ទទួលមរណភាព

តារាកំប្លែងអ្នកនាង កាឆយ និងក្រុមគ្រួសារ កាលពីពេលថ្មីៗនេះ បានជួបទុក្ខដ៏ក្រៀមក្រំដោយបងប្រុសរបស់អ្នកនាង បានទទួលមរណភាព។ តាមរយ:ដំណឹងមរណភាព របស់បងប្រុសបង្កើតអ្នកនាង កាឆយ នេះ គេឃើញមានអ្នកគាំទ្រ ព្រមទាំងសិល្បករ-សិល្បការិនីជាច្រើនរូប បានសម្តែងការសោកស្តាយ ចំពោះការបាត់បង់បងប្រុសជាទីស្រលាញ់របស់តារាកំប្លែងរូបនេះ។

ដោយឡែកបើងាកមកចាប់អារម្មណ៍ ក្រោយពេលដែលបងប្រុសរបស់ខ្លួន ទើបតែទទួលមរណភាពជិតមួយខែប៉ុណ្ណោះ ស្រាប់តែអ្នកនាង កាឆយ បានចេញមកទម្លាយការឈឺ ព្រោះនៅជំពាក់លុយធ្វើបុ ណ្យនឹងរឿងរ៉ាវមួយចំនួនទៀត ដែលអ្នកសិល្បៈ​ខ្មែរដូចគ្នាមិនសូវឲ្យតម្លៃ លើសមត្ថភាពបងប្រុសអ្នកនាង។

បើតាមខ្លឹមសាររៀបរាប់របស់តារាកំប្លែងនាង កាឆយ បានលើកឡើងថា «បងប្រុស​ខ្ញុំ​ជាតា​រាហូលីវូតខ្មែរម្នាក់តំណាង​ជនជាតិ​ខ្មែរ​មួយ​ទាំងមូល ហើយ​គេ​បាន​ស្គាល​គ្រប់​បណ្តាប្រទេស​ធំ​ៗតួ​អ្នក​ធាក់ស៊ីក្លូហើយ​និយាយ​ភាសា​អង់គ្លេស​យ៉ាង​ល្អ តែ​ដល់ពេលគាត់ទទួលមរណភាព (១៣.១០.២០២២) គ្មាន​តម្លៃ​សោះ មាន​តែ​ជនជាតិ​គេ​ទេ​ដែល​អោយ​តម្លៃ តែ​សម្រាប់​សិល្បៈ​ខ្មែរ​វិញ​សូន្យ​ឈឹងតែម្តង»។

អ្នកនាង កាឆយ រៀបរាប់បន្ថែមថា «ខ្ញុំអស់សង្ឃឹមខ្លាំងណាស់ គាត់​មិន​ល្បី​ក្នុងស្រុក​ទេតែ​គាត់​តំណាងអោយសិល្បៈខ្មែរទាំងមូលលើឆាកអន្តរជាតិ សូ​ម្បី​តែ​លុយ​ធ្វើបុណ្យ ​ក៏​ប្អូន​ជំពាក់មង្គល​តុលា ប៉ុន្តែក៏អរគុណចុងភៅតុលាដែលទុកពេលអោយបង…មិនយូរ​ទេ​បង​នឹង​សង​ប្អូន​ណា​»។

សូមជម្រាបថា តារាកំប្លែងអ្នកនាង កាឆយ កាលពីថ្មីៗនេះ បានបង្ហាញអារម្មណ៍សោកស្តាយជាពន់ពេក បន្ទាប់ពីបងប្រុសរបស់ខ្លួនទទួលមរណភាព ដោយសារជំងឺក្រិនថ្លើម។ ចំពោះដំណឹងមរណទុក្ខដ៏ក្រៀមក្រំ និងសោកសៅរបស់បងប្រុសតារាកំប្លែងអ្នកនាង កាឆយ នេះដែរ ក៏មានការចូលរួមសោកស្តាយ និងចូលរួមរំលែកទុក្ខពីអ្នកគាំទ្រ និងអ្នកសិល្បៈជាមួយក្រុមគ្រួសារសព ផងដែរ៕

អត្ថបទ៖ ចាន់រ៉ា