ជីវិតកម្សាន្ដ

មានការរិះគន់ ក្រោយ G-Devith រ៉េបបទប្រើពាក្យពេចន៍មិនសមរម្យក្នុងពិធីថ្នាក់ជាតិ

បានផុស

២ years មុន

នៅ

ថ្ងៃពុធ ២៣ វិច្ឆិកា ២០២២

ដោយ

ទន្ទឹមគ្នាដែលទទួលបានការគាំទ្រពីមហាជន និងមិត្តៗយុវវ័យ តារាចម្រៀងរ៉េប លោក ងួន ចាន់ដេ វីដ ហៅ G-Devith ក៏រងនូវមតិរិះគន់មិនពេញចិត្តពីសំណាក់ទស្សនិកជនមួយចំនួនទៀត ទៅលើបទចម្រៀងច្រៀងរ៉េបដោយប្រើពាក្យពេចន៍អសុរោះ មិនសមរម្យ ក្នុងពិធីថ្នាក់ជាតិ កាលពីថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មតិរិះគន់នេះកើតឡើងបន្ទាប់ពីតារាចម្រៀងវ័យក្មេងលោក G-Devith បានជ្រើសរើសយកបទចម្រៀងរ៉េបមួយ មានលក្ខណៈប្រើប្រាស់ពាក្យពេចន៍មិនសមរម្យ ច្រៀងក្នុងឱកាសពិធីបើកជាផ្លូវការព្រឹត្តិការណ៍ប្រកួតកីឡាជាតិលើកទី ៣ និងកីឡាជនពិការជាតិលើកទី ១ ដែលរៀបចំឡើងនៅពហុកីឡដ្ឋានជាតិមរតកតេជោ កាលពីព្រលប់ថ្ងៃទី ២១ ខែវិច្ឆិកា ឆ្នាំ ២០២២ កន្លងទៅ។

ជាក់ស្ដែងនៅលើទំព័រហ្វេសប៊ុកឈ្មោះ Long Sokiry បានបញ្ចេញមតិរិះគន់ដូច្នេះថា ហើយយកបទអ៊ីចឹងទៅច្រៀង?? បែងចែកមិនដាច់មួយណាជាសាច់មួយណាជាអាចម៍ ល្បីតែម៉ាបទហ្នឹងទេមែន? ជីវិតដូច ក.ជើង.ដ មានឡើងមានចុះ! ហ៊ឹម សិស្សស្រីៗច្រើនណាស់ចូលរួម។ ខ្លះទៀតថា ចុម លេងយកអាតាណើប នឹងទៅច្រៀងលើកមុខមាត់ជាតិ ហើយបទដឹងស្អី មិនដឹងជាបង្ហាញពីវប្បធម៌របស់ខ្មែរនៅចំណុចណា ច្រៀងដូចក្មេងបែកកាវ ,ថ្នាក់ជាតិម៉េចយកបទចឹងទៅច្រៀងអត់យល់, កម្មវិធីធំណាស់ តែយកបទអីមកច្រៀង ខ្ញុំសុំមិនយល់,ដល់តែយកគាត់មកច្រៀងរកតែខ្លឹម នៃការបើកស្តាតមិនឃើញ។

ចំណែកតារាចម្រៀងលោក ម៉ៃ សុគន្ធ ក៏បានបញ្ចេញមតិមិនពេញចិត្តដែរថា កម្មវិធីកីឡាថ្នាក់ជាតិទាំងមូល ហើយយកអ្នកចម្រៀងទៅច្រៀងមកស្រែកធុញហ្អា អាឡេអាឡូ ស្អីគេ អញមាន អញសេដ្ឋី អញមានឡាន ហែងក្រ យកមក Show អញ…អញមាននាឡិកា 15000$ ពេញស្តាត សុំមិនយល់ទេ?។

ថ្វីត្បិតមានការរិះគន់យ៉ាងណាក្ដី គេមិនទាន់ឃើញមានប្រតិកម្មបែបណាពីតារារ៉េប G-Devith នៅឡើយទេ។

បើចាប់អារម្មណ៍ទៅមើលការបង្ហោះនៅលើទំព័រហ្វេសប៊ុករបស់លោក G-Devith បានបញ្ចេញសំណេរភ្ជាប់រូបភាពថា អ្នកគាំទ្រខ្ញុំគាត់បានទទួលភាពកក់ក្ដៅស្និទ្ធស្នាលមួយយ៉ាងប្រាកដជាក់អំពីខ្ញុំ ពួកគាត់មិនដែលប្រើប្រាស់ខ្ញុំធ្វើដើម្បីប្រយោជន៍ មិនដែលបោះបង់ខ្ញុំ មិនដែលមានភាពអវិជ្ជមានទៅជនណា ឬអ្នកណាមុននោះឡើយ។