កៅ សីហា​ប្រកាសកែច្នៃកូនស្រីច្បង សឿ សុធារ៉ាឲ្យក្លាយជាដុំពេជ្រមានពន្លឺចែងចាំងលើវិថីសិល្បៈ 

លោក កៅ សីហា ដែលជាអ្នកដឹកនាំសម្ដែងល្បីឈ្មោះបានចេញមកប្រកាសដោយសន្យាថា លោកនឹងជួយបើកផ្លូវសិល្បៈដល់កូនស្រីច្បងរបស់តារាសម្តែងអ្នកនាង សឿ សុធារ៉ា ឲ្យមានពន្លឺលើវិថីសិល្បៈដូចគន្លងឪពុក-ម្តាយរបស់គេ។

ការប្រកាសរបស់លោក កៅ សីហា ពេលនេះបានធ្វើឲ្យអ្នកគាំទ្រ និងមហាជនមួយចំនួនសម្តែងការគាំទ្រ និងសរសើរចំពោះទឹកចិត្តដ៏ល្អពីសំណាក់អ្នកដឹកនាំសម្ដែងល្បីឈ្មោះរូបនេះ។

លោក កៅ សីហា បានបង្ហោះរូបភាពភ្ជាប់ខ្លឹមសារបែបនេះថា «សាពូន ដារ៉ាភិមាន ជាកុមារីម្នាក់ដែលមានឈាមជ័រសិល្បៈដ៏ជោគជាំពីឪពុកម្ដាយគឺបង សាពូន មីដាដា និងប្អូនស្រី សឿ សុធារ៉ា។ ភិមានជាកូនស្រីច្បងមានអត្តចរិតសមសួន សុភាព ចេះគួរសម ស្គាល់ចាស់ទុំ ពិសេសនាងមានទេពកោសល្យសិល្បៈពេញខ្លួនទាំងសម្ដែងនិងច្រៀង»។

លោក កៅ សីហា បន្តទៀតថា «ខ្ញុំសូមឆ្លើយតបទៅកាន់បងប្អូនមហាជនមួយចំនួនដែលខមមិនថា (Comment) បើចេះឈឺឆ្អាលអីចឹង ម៉េចមិនជួយម្ដាយកូនគេឲ្យបានថតផង? ក្នុងឱកាសនេះខ្ញុំក៏ចង់បង្ហាញនិងបកស្រាយថាខ្ញុំបានយក ធារ៉ា និងភិមាន មកថតរឿង មុនលោកអ្នកមានគំនិតប្រាប់ខ្ញុំទៅទៀត។

តាំងពីធារ៉ាធ្លាក់ខ្លួនដំបូងហើយមានបញ្ហាស្មារតីបាក់ទឹកចិត្តតែខ្ញុំ និងធារ៉ា មិនចង់បង្ហាញឲ្យមហាជនបានដឹងឬយកមុខយកមាត់ សម្ដែងតាមវេទិកាហ្វេសបុក ដូចមនុស្សមួយចំនួនដែលឆ្លៀតកេងប្រយោជន៍លើនាងក្នុងរូបភាពសប្បុរសមួយចំនួនដូចគ្រានេះនោះឡើយ»។

លោក កៅ សីហា បញ្ជាក់ថា រូបនេះគឺជារូបថតថ្ងៃថត poster បញ្ចប់រឿងនាសម័យលង្វែកដែលខ្ញុំបានជ្រើសយក ក្មួយ ភិមាន មកសម្ដែងជាតួឯកស្រីកាលនៅវ័យក្មេងហើយសម្ដែងជាម្ដាយកូនជាមួយ អាធារ៉ា ផ្ទាល់តែម្ដង។ ដូច្នេះសូមលោកអ្នកកុំប្រញាប់វាយតម្លៃលើអ្វីដែលមិនដឹងការពិតឬអ្វីដែលគេមិនចង់បង្ហាញ។

លោក កៅ សីហា បញ្ជាក់ថា «ខ្ញុំសូមផ្ញើតួឯកស្រីវ័យក្មេងមួយដួងនេះក្នុងក្រអៅបេះដូងរបស់បងប្អូនគ្រប់ស្រទាប់វណ្ណៈនៃវិស័យសិល្បៈទម្រង់ទី៧នេះផង។ដុំពេជ្រមួយគ្រាប់នេះខ្ញុំបានយកមកកែច្នៃឲ្យមានពន្លឺចែងចាំងជះរស្មីលើវិថីសិល្បៈចាប់ពីពេលនេះតទៅ»៕

អត្ថបទ៖ ចាន់រ៉ា