ស្ថានភាព Pinky ក្រោយចេញពីមន្ទីរឃុំឃាំង ថ្ងៃដំបូង

បន្ទាប់ពីជាប់ពន្ធនាគារអស់រយៈពេលជាង ៣ខែ ពេលនេះតារាសម្តែងស្រីដ៏ល្បីឈ្មោះ Pinky Savika បានធានាឱ្យនៅក្រៅឃុំ ដោយត្រូវតម្កល់ប្រាក់ ៥លានបាត និងត្រូវគោរពតាមលក្ខខណ្ឌចំនួន ៤ចំណុច ដែលតុលាការដាក់ឱ្យអនុវត្តជាកំហិត។

ក្រោយឡើងសវនាការ កាលពីថ្ងៃទី២៩ ខែវិច្ឆិកា ឆ្នាំ២០២២ ក្នុងសំណុំរឿងឆបោកប្រាក់ ចុងចោទ Pinky Savika ត្រូវមេធាវីការពារក្ដី ធានាឱ្យនៅក្រៅឃុំបណ្ដោះអាសន្ន ខណៈម្សិល​មិញនេះ នាងបានចេញពីពន្ធនាគារហើយ។

​នៅ​ម៉ោង ៧:១០យប់ ថ្ងៃទី៣០ ខែវិច្ឆិកា Pinky បាន​ចាក​ចេញ​ពី​មន្ទីរឃុំឃាំង ដោយបានឡើងជិះ​រថយន្ត Fortuner ពណ៌​ស មាន​បុរសម្នាក់ និង​ស្រ្តីម្នាក់ មក​ទទួលនាងចេញទៅ។ អ្នកសារព័ត៌មានឆ្មក់បានរូបថតប៉ុន្មានសន្លឹក មុនពេលនាងចេញផុតពីមន្ទីរឃុំឃាំង ដែលគេបានឃើញ Pinky ពាក់​អាវ​ពណ៌​ស មាន​ឆ្នូត​ពណ៌​ខៀវ​វែង ពាក់​ម៉ាស អង្គុយ​នៅពី​ក្រោយ។ ជាមួយគ្នាដែរ នាងបានលើកដៃជម្រាបសួរអ្នកសារព័ត៌មាន និងមហាជន ដោយបញ្ចេញស្នាមញញឹមដាក់គ្រប់គ្នាផងដែរ។ ចំពោះស្ថានភាពរបស់ ​Pinky យ៉ាងណាទៀតនោះ អ្នកសារព័ត៌មាន នៅមិនទាន់អាចជួបសម្ភាសន៍នាងផ្ទាល់ ឬមនុស្សជិតដិតបាននៅឡើយទេ៕

ប្រែសម្រួល៖ សន្យា

ចុចអាន៖ តុលាការព្រមឱ្យ Pinky ទទួលបានសិទ្ធិនៅក្រៅឃុំ តែត្រូវគោរពតាមលក្ខខណ្ឌ ៤ចំណុច