ជីវិតកម្សាន្ដ

សាពូន មីដាដា ប្រាប់ឲ្យ សឿ សុធារ៉ា ពង្រឹងស្មារតីផ្លូវចិត្ត

បានផុស

២ years មុន

នៅ

ថ្ងៃសុក្រ ២ ធ្នូ ២០២២

ដោយ

បន្ទាប់ពីទទួលដំណឹង នៃការធ្លាក់ខ្លួនឈឺរបស់តារាសម្ដែងអ្នកនាង សឿ សុធារ៉ា ដែលជាអតីតភរិយា លោក សាពូន មីដាដា បានចេញមកប្រាប់អំពីវិធីព្យាបាលដល់នាងតាមរយៈការពង្រឹងស្មារតី ដោយការសំអាតចិត្ត និងតាំងសមាធិ ហើយរឹតតែពិសេសទៀតគឺការហូបគ្រប់គ្រាន់ សម្រាកគ្រប់គ្រាន់ និងហាត់កីឡា ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតតារាចម្រៀងលោក សាពូន មីដាដា បានលើកឡើងថា បើប្អូនមិនប្រឹងហូប តើឲ្យអ្នកណាមកហូបជំនួស បើប្អូនមិនព្រមដេក តើឲ្យអ្នកណាមកដេកជំនួស ខំលេបតែថ្នាំទាំងក្បង់ៗហ្នុង មិនអាចជួយបន្ធូរឡើយ មានតែបន្ថែម ពេទ្យអាចជួយបន្តិចបន្តួចប៉ុណ្ណោះ ម៉ោងជាងពីររំលងអធ្រាតទៅហើយ កូនៗមិនព្រមងងុយដេក ចាំមើល ចាំថែម្ដាយ។

លោកបន្តថា ម្នាលប្អូនស្រី ជំងឺនេះគឺប្អូនខ្លួនឯងព្យាបាលខ្លួនឯង ហើយការព្យាបាលខ្លួនឯងនោះគឺ ហូបគ្រប់ ដេកគ្រប់ ហាត់កីឡា សំអាតចិត្ត តាំងសមាធិ និងព្រមទទួលគ្រប់យ៉ាង ព្រះពុទ្ធអង្គបានត្រាស់សម្តែងថា សីល សមាធិ បញ្ញា។

សូមជម្រាបថា នៅលើទំព័រហ្វេសប៊ុកឈ្មោះ«កណ្ណិកាសាឡន» បានបង្ហោះវីដេអូ សឿ សុធារ៉ា កាលពីថ្ងៃទី ៣០ ខែវិច្ឆិកា ដោយរៀបរាប់ថា កាលពីវេលាម៉ោងប្រមាណ ១១ សឿ សុធារ៉ា ត្រូវបានបញ្ជូនមកសង្គ្រោះបន្ទាន់នៅមន្ទីរពេទ្យកាល់ម៉ែតទាំងយប់ ដោយសារតែមានអាការៈវៀចថ្គាម។

បន្ទាប់ពីការសម្រាកព្យាបាល និងយកចិត្តទុកដាក់ពីសំណាក់ក្រុមគ្រូពេទ្យ ពេលនេះអាការជំងឺរបស់ សឿ សុធារ៉ា ធូរស្រាលខ្លះហើយ។

បើតាមការបង្ហោះភ្ជាប់ជាមួយរូបថតនៅលើគ្រែពេទ្យកាលពីល្ងាចថ្ងៃទី ០១ ខែធ្នូ ឆ្នាំ ២០២២ សឿ សុធារ៉ា បានឲ្យដឹងថា «ជម្រាបសួរបងប្អូន ខ្ញុំកំពុងសម្រាកព្យាបាលនៅមន្ទីរពេទ្យកាល់ម៉ែត សូមអរគុណបងប្អូន ដែលព្រួយបារម្ភ និងជួយឧបត្ថម្ភកន្លងមក និងរហូតពេលនេះ។

នាងបានបន្ថែមថា នាងខ្ញុំមានបញ្ហាសុខភាពផ្លូវចិត្ត និងជំងឺប្រចាំកាយផងដែរ ទើបធ្វើឲ្យខ្ញុំត្រូវមកសម្រាកនៅមន្ទីរពេទ្យកាល់ម៉ែតនេះ។ ជាមួយគ្នានេះ នាងខ្ញុំក៏សូមអរគុណដល់គ្រូពេទ្យនៅគ្លីនិក សេអ៊ូល ដែលបានផ្ដល់សេវាប្រឹក្សាផ្លូវចិត្ត ការព្យាបាលដោយចិត្តសាស្ត្រជំនួសឲ្យការប្រើថ្នាំដល់នាងខ្ញុំ។ អរគុណបងប្អូនទាំងអស់ដែលព្រួយបារម្ភ ខ្ញុំនឹងព្យាយាមក្រោកឈរឡើងវិញ ព្រោះខ្ញុំស្រឡាញ់កូនៗខ្ញុំណាស់៕

អត្ថបទ ៖ ចាន់រ៉ា