ជីវិតកម្សាន្ដ

សាពូន មីដាដា ទម្លាយថា កាល ១៦ ឆ្នាំមុន ច្រៀង ២ បទ លោក ខៀវ កាញារីទ្ធ ឧបត្ថម្ភ ២ ម៉ឺនដុល្លារ

បានផុស

២ years មុន

នៅ

ថ្ងៃអង្គារ ១៣ ធ្នូ ២០២២

ដោយ

អតីតតារាចម្រៀងលោក សាពូន មីដាដា បន្ទាប់ពីដឹងថា អតីតភរិយា និងកូនៗ ទទួលបាននូវក្តីអាណិតមេត្តាពីសំណាក់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលផ្ដល់អំណោយនូវផ្ទះថ្មីតម្លៃ ២ ម៉ឺនដុល្លារ ដើម្បីជាជម្រកនោះ ភ្លាមៗនេះ លោកក៏បានទម្លាយថា កាលអំឡុង ១៦ ឆ្នាំមុន ខ្លួនក៏ទទួលបានថវិកាឧបត្ថម្ភ ២ ម៉ឺនដុល្លារពី លោក ខៀវ កាញារីទ្ធ ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការបង្ហោះរៀបរាប់របស់អតីតតារាប្រុសធ្លាប់ទទួលបានការគាំទ្រច្រើនពីទស្សនិកជនទាំងក្នុង និងក្រៅស្រុក លោក សាពូន មីដាដា បានលើកឡើងថា «ឯកឧត្ដម ខៀវ កាញារីទ្ធ គឺជារដ្ឋមន្ត្រីដែលចិត្តសប្បុរសបំផុតកាលពី ១៦ ឆ្នាំមុន ជាលើកដំបូង ខ្ញុំមានកិត្តិយសដែលគាត់ហៅខ្ញុំទៅKaraoke ផឹកស្រាពីរចានចង្កឹះ(មួយចានមួយដង្ហើម ហើយឲ្យលានអណ្ដាតឲ្យគាត់មើលក្រែងថាលើកមិនដាច់) និងច្រៀងចម្រៀងពីរបទជូនគាត់ស្ដាប់ គឺបទពុកអើយម៉ែអើយ និងបទនិយមន័យស្នេហ៍ ហើយគាត់បានសរសើរថា អាសំពូនហ្អែងច្រៀងពីរោះណាស់ អ្នកចម្រៀងឥឡូវ ហ្អែងច្រៀងពីរោះជាងគេ ណេះអញឲ្យហ្អែង ២ ម៉ឺនដុល្លារ សម្រាប់ចម្រៀងពីរបទនេះ»។

លោក សាពូន មីដាដា បាននិយាយបន្តថា «ថ្ងៃនោះ ជាថ្ងៃដែលខ្ញុំស្គាល់ប្រាក់ម៉ឺនដុល្លារក្នុងឆាកជីវិត ខ្ញុំបានយកប្រាក់នោះទាំងត្រេកអរបំផុតមកថ្វាយបង្គំជូនម្ដាយឪពុកខ្ញុំ ហើយថ្ងៃនេះគាត់បានជួយអតីតភរិយាខ្ញុំ និងកូនៗខ្ញុំទៀត លោកមានដួងចិត្តមហិមាណាស់ សូមលោកជួបតែពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ»។

គេនៅចាំបានថា លោក សាពូន មីដាដា កាលពីអំឡុងលេចវត្តមានលើវិស័យចម្រៀងលើកដំបូង គឺទទួលបានការគាំទ្រយ៉ាងភ្លូកទឹកភ្លូកដីពីមហាជនគ្រប់ស្រទាប់វណ្ណៈ តាមរយៈបទ “ពុកអើយ ម៉ែអើយ”,”បទនិយមន័យស្នេហ៍” និងបទចម្រៀងជាច្រើនទៀត។ ប៉ុន្តែរឿងដែលគួរឲ្យស្ដាយបន្ទាប់ពីល្បីឈ្មោះមួយរយៈ លោកក៏ស្ងប់ស្ងាត់ពីវិស័យសិល្បៈទៅវិញ៕

អត្ថបទ ៖ ចាន់រ៉ា

Related Topics:សាពូន មីដាដា