បាត់មុខយូរ ដឹងទេពេលនេះ ឈិនឡុង កំពុងធ្វើអ្វី?

ដោយសារវ័យកាន់តែជ្រេ កំពូលតារាសម្ដែងហុងកុង ឈិនឡុង (Jackie Chan) ហាក់អវត្តមានក្នុងវិស័យភាពយន្តសឹងទាំងស្រុង យូរៗទើបទស្សនិកជនអាចឃើញតារាប្រុសរូបនេះបង្ហាញខ្លួនក្នុងភាពយន្តហូលីវូដម្ដង ខណៈជីវិតឯកជនវិញ លោកក៏មិនសូវមានសកម្មភាពជាសាធារណៈ ឬនៅលើបណ្ដាញប្រព័ន្ធផ្សព្វផ្សាយដែរ។

យ៉ាងណាមិញ ថ្មីៗនេះទស្សនិកជនបានឃើញ ឈិនឡុង បង្ហាញខ្លួនលើប៉ុស្តិ៍ទូរស្សន៍មួយ ក្នុងនាមជាគ្រូបង្វឹកសម្ដែងភាពយន្ត។ នៅក្នុងកម្មវិធីទូរទស្សន៍របស់ចិន Memories Beyond Horizon តារាវ័យ ៦៨ឆ្នាំរូបនេះ បានបង្ហាញខ្លួនជាគ្រូបង្ហាត់សម្ដែងចំពោះតារាប្រុសស្រីវ័យក្មេងជំនាន់ក្រោយ និងបានចែករំលែកបទពិសោធន៍ជាច្រើនក្នុងការថតភាពយន្តមិនថានៅក្នុងស្រុក ឬនៅសហរដ្ឋអាមេរិក។

ក្នុងនាមជាតារាជើងចាស់ ក្រាស់បទពិសោធន៍ និងជារៀមច្បងមួយរូបលោកផ្ដល់ដំបូន្មានដល់ក្មេងៗស្រករក្រោយឱ្យមានការប្រុងប្រយ័ត្នខ្ពស់អំឡុងពេលថតរឿង ព្រមទាំងយកចិត្តទុកដាក់លើការលើកដាក់សំឡេងពេលនិយាយ ព្រោះទស្សនិកជនស្ដាប់តួជាមុន មុនពេលមើលសកម្មភាពរបស់តួ។ ការបង្ហាត់បង្ហាញរបស់ ឈិនឡុង បានធ្វើឱ្យតារាជំនាន់ក្រោយទទួលបានមេរៀនជាច្រើន និងរីករាយចំពោះវត្តមានរបស់លោកយ៉ាងខ្លាំងផងដែរ។

គួរបញ្ជាក់ថា ពីរបីឆ្នាំចុងក្រោយនេះវត្តមានរបស់ ឈិនឡុង នៅក្នុងវិស័យកម្សាន្ត ហាក់មិនសូវមានសកម្មភាពនោះទេ ស្របពេលដែលតារាប្រុសរូបនេះក៏បានលាក់បាំងជីវិតឯកជនរបស់ខ្លួនផងនោះ ទើបសុខទុក្ខរបស់លោក ពុំសូវមានអ្នកដឹងឡើយ។ យ៉ាងណាមិញ កាលពី ៤ខែមុន ប្រព័ន្ធផ្សព្វផ្សាយចិន បានរាយការណ៍ថា ឈិនឡុង ​បានទិញ​ផ្ទះ​ដ៏​ប្រណីតមួយ នៅ​ទីក្រុង Hangzhou ក្នុង​តម្លៃ ៦លានដុល្លារអាមេរិក៕

ប្រែសម្រួល៖ សន្យា

ចុចអាន៖ អាយុ ៤១ឆ្នាំហើយ ហ្វាន ពីងពីង អត់ចេះចាស់សោះ អ្នកមិនដឹងស្មានតែក្មេងម្ភៃប្លាយ