កូនប្រុសច្បងលោក ព្រាប សុវត្ថិ ប្រកាសចប់កុងត្រាជាមួយហង្សមាសផ្លូវការ

ទីបំផុតតារាចម្រៀងវ័យក្មេងលោក សុវត្ថិ មុនីវណ្ណ ដែលជាកូនប្រុសច្បងរបស់កំពូលតារាចម្រៀងមានងាជាឧកញ៉ា ព្រាប សុវត្ថិ បានប្រកាសបញ្ចប់កុងត្រាជាមួយផលិតកម្មហង្សមាសជាផ្លួវការហើយ។

ជាមួយគ្នានៃការប្រកាសបញ្ចប់កុងត្រាជាមួយផលិតកម្មហង្សមាសនេះដែរ តារាចម្រៀងលោក សុវត្ថិ មុនីវណ្ណ ក៏បានបង្ហើបគម្រោងថ្មីៗនាឆ្នាំ២០២៣ខាងមុខផងដែរ។ អ្នកគាំទ្រមួយចំនួនធំក៏បានទន្ទឹងរង់ចាំមើលដែរថា តើលោក សុវត្ថិ មុនីវណ្ណ ក្រោយចប់កុងត្រាជាមួយហង្សមាស លោកនឹងចូលផលិតកម្មថ្មីGalaxyតាមលោកឪពុកឬយ៉ាងណា?។

សុវត្ថិ មុនីវណ្ណ បានប្រកាសប្រាប់អ្នកគាំទ្ររបស់ខ្លួនថា “ជម្រាបសួរបងប្អូន ខ្ញុំបានចប់កុងត្រានៅក្រុមហ៊ុនហង្សមាសហើយ។ លោកបញ្ជាក់ឲ្យដឹងទៀតថា សម្រាប់២០២៣ខាងមុខនេះនឹងមានអ្វីថ្មីជាច្រើនសម្រាប់បងប្អូន”។

បន្ទាប់ពីការប្រកាសខាងលើនេះ គេឃើញអ្នកគាំទ្រជាច្រើនបានបង្ហាញការចាប់អារម្មណ៍ និងមានការលើកសរសើរពីអត្តចរិតថា ស្តាប់តែការនិយាយស្តីក៏ដឹងថាក្មួយសុភាពរាបសារគួរអោយគោរពស្រលាញ់ដូចបង សុវត្ថិ អ៊ីចឹង។ ស្អាតសង្ហា ឆ្លាតចរិតល្អជូនពរប្អូនប្រុសអោយទទួលតំណែងតារាប្រុសល្បីប្រចាំប្រទេសកម្ពុជាយើង។ រូបស្រស់ស្អាត កម្ពស់ក៏បានសំឡេងក៏បានសមត្ថភាពក៏បាននៅតែការព្យាយាមដើម្បីសម្រេចក្ដីស្រម៉ៃប៉ុណ្ណោះ៕

អត្ថបទ៖ ចាន់រ៉ា