ដឹងមូលហេតុដែល Anne មិនចង់រៀបការ ទស្សនិកជនអាណិតនាងខ្លាំង

ទោះបីតារារៀមច្បង Anne Thongprasom និងមិត្តប្រុសជាអ្នកជំនួញលោក Tinnabhan Tantinirandr ស្រឡាញ់គ្នាជាង ២០ពិតមែន ប៉ុន្តែអ្នកទាំងពីរមិនទាន់ភ្ជាប់ចំណងអាពាហ៍ពិពាហ៍នោះទេ ហើយក៏ពុំមានលេចឮព័ត៌មានថាពួកគេនឹងរៀបការឆាប់ៗដែរ។

កន្លងមកសារព័ត៌មានក្នុងស្រុកចុះផ្សាយថា Anne ធ្លាប់បដិសេធរៀបការជាមួយមិត្តប្រុសជាច្រើនដងមកហើយ បើទោះបីឆ្នាំនេះនាងមានវ័យ ៤៦ឆ្នាំក៏ដោយ តារាស្រីរូបនេះនៅតែមិនបង្ហើបដំណឹងរៀបការទាល់តែសោះ។

ចំពោះរឿងនេះ ទស្សនិកជនជាច្រើននាក់ពិតជាចង់ដឹងណាស់ថា តើមានមូលហេតុអ្វីឱ្យប្រាកដទើបបានជា Anne មិនគិតគូររៀបចំសាងគ្រួសារនឹងគេ? ទើបតែថ្មីៗនេះ ថ្លែងនៅក្នុងបទសម្ភាសន៍ជាមួយកម្មវិធីទូរទស្សន៍មួយ ផលិតករភាពយន្តរូបនេះ​បានទម្លាយពីមូលហេតុដែលនាងមិនចង់រៀបការ ប្រាប់មហាជនឱ្យអស់ចម្ងល់។

Anne ប្រាប់ថា នាងមិនអាចមានកូនបាននោះទេ ដូច្នេះនាងមិនចង់ឱ្យមិត្តប្រុសរបស់នាងក្លាយជាបុរសគ្មានកូនចៅតវង្សត្រកូលដោយសារនាងឡើយ។ នាងបន្ថែមទៀតថា បើទោះថ្ងៃក្រោយរៀបការរួច នាងខ្លាចថានឹងអាចលែងលះគ្នា ព្រោះគ្រួសារគ្មានកូន ពិតជាពិបាកស្រមៃរកសុភមង្គលពេញលេញណាស់។ សម្រាប់ Anne រស់នៅបែបនេះគឺសប្បាយចិត្តហើយ។ យ៉ាងណាមិញ តារារៀមច្បងរូបនេះផ្ដាំកុំគិតដូចនាង ព្រោះជីវិតស្នេហារបស់មនុស្សម្នាក់ៗមានភាពខុសគ្នា។

បន្ទាប់ពីដឹងមូលហេតុពិតពីក្រោយជីវិតស្នេហាក្រៅឆាករបស់ Anne ទស្សនិកជនសម្ដែងក្ដីអាណិតអាសូរគ្រប់គ្នា និងសង្ឃឹមថានាងអាចទទួលបានសុភមង្គលគ្រួសារដូចគេដូចឯង៕

ប្រែសម្រួល៖ សន្យា

ចុចអាន៖ ប្រវត្តិតារារៀមច្បង Anne Thongprasom ពីតួរាយរង ក្លាយជាផលិតករភាពយន្ត

ចុចអាន៖ អលង្ការមួយឈុតរបស់ Patricia ក្នុងពិធីស្វាគមន៍ចូលឆ្នាំចិន តម្លៃវាល់លានដុល្លារ