តារាចម្រៀង Lisa ទទួលមរណភាព បន្ទាប់ពីចប់កម្មវិធី Golden Globes

គ្រាន់តែចប់កម្មវិធី Golden Globes ភ្លាម តារាស្រី Lisa Marie Presley ត្រូវបញ្ជូនទៅមន្ទីរពេទ្យជាបន្ទាន់ដោយសារគេរកឃើញគាត់គាំងបេះដូងនៅផ្ទះក្នុងទីក្រុង Calabasas រដ្ឋ  California ។ Lisa ជាកូនស្រីតែមួយគត់របស់លោក Elvis Presley និងអ្នកស្រី Priscilla Presley ដែលស្លាប់នៅវ័យ ៥៤ឆ្នាំ កាលពីថ្ងៃទី១២ ខែមករា ឆ្នាំ២០២៣ ម្សិលមិញនេះ ។

អ្នកស្រី Priscilla Presley ត្រូវជាម្ដាយបានប្រកាសមរណភាពកូនស្រីរបស់ខ្លួននៅក្នុងសេចក្តីថ្លែងការណ៍មួយថា “នាងជាស្រ្តីដ៏រឹងមាំ ពោរពេញដោយក្ដីស្រលាញ់បំផុតដែលខ្ញុំធ្លាប់ស្គាល់ យើងសុំពេលផ្ទាល់ខ្លួនបន្តិចសម្រាប់ដោះស្រាយនឹងការបាត់បង់ដ៏ជ្រាលជ្រៅនេះ។ សូមអរគុណចំពោះការស្រលាញ់ និងការអធិស្ឋានរបស់អ្នក ខ្ញុំអស់អីនិយាយហើយ” ។ យ៉ាងណាមិញ ម្ដាយរបស់ Lisa មិនបានបង្ហើបមូលហេតុនាំឲ្យគាំងបេះដូងឡើយ ។ និយាយពី Lisa វិញ គាត់ជាតារាចម្រៀងផង និងជាអ្នកនិពន្ធចម្រៀងផង ជាពិសេសធ្លាប់មានស្វាមីដល់ទៅ ៤នាក់គឺ Danny Keough, Michael Jackson, Nicolas Cage, និង Michael Lockwood ។ ចំណែកឯកូនវិញក៏មាន ៤នាក់ដែររួមមាន Benjamin Keough, Riley Keough, Finley Aaron Love Lockwood, និង Harper Vivienne Ann Lockwood ។

សូមរំលឹកដែរថា មុនការស្លាប់របស់ Lisa គាត់បានចូលរួមកម្មវិធី Golden Globes ជាមួយម្ដាយដើម្បីទស្សនាការទទួលពានរបស់តារាសម្ដែង Austin Butler ។ លោកធ្វើការថ្លែងអំណរគុណដល់គ្រួសារ Presley អំពីជំនួយក្នុងការងារដែលជាមូលហេតុធ្វើឲ្យលោកទទួលពានដោយជោគជ័យ ៕

ប្រែសម្រួលដោយ ៖ វារី

ចុចអាន ៖ មកដឹងមូលហេតុពិត Zendaya មិនចូលរួមកម្មវិធី Golden Globes ២០២៣ 

ចុចអាន ៖ កំពូលអ្នកច្នៃម៉ូដ Dame Vivienne Westwood ទទួលមរណភាពក្នុងអាយុ ៨១ ឆ្នាំ