មហាជនថៃហួសចិត្តនឹងស្បៃដែលបវរកញ្ញា Anna ពាក់ប្រកួតវគ្គជម្រុះបឋមនៅ MU

មហាជនថៃជាច្រើនសម្ដែងការខកចិត្ត បូករួមនឹងសំណើចហួសចិត្តទៅលើស្បៃដែលបវរកញ្ញាចក្រវាល Anna បានពាក់ប្រកួតក្នុងវគ្គបឋមនៅឯកម្មវិធី Miss Universe 2022 ព្រោះតែវាគ្មានភាពប្រណីតទាល់តែសោះ។

កាលពីថ្ងៃទី១២ ខែមករា ឆ្នាំ២០២៣ ក្នុងវគ្គជម្រុះបឋមនៃការប្រកួតបវរកញ្ញាចក្រវាលឆ្នាំ២០២២ បវរកញ្ញា Anna បេក្ខភាព Miss Universe តំណាងប្រទេសថៃ ទទួលរងពាក្យរិះគន់ឥតសំចៃពីប្រជាជនខ្លួនលើស្បៃដែលគ្រងជាមួយឈុតហែលទឹកថា មិនស្អាតលេចធ្លោ ថែមទាំងមើលទៅឆ្កុយៗទៀតផង។

ជុំវិញមតិរិះគន់ទាំងនេះ អ្នកច្នៃស្បៃរបស់ Anna គឺវិចិត្រករ និងអ្នករចនាម៉ូដ លោក លូ ឡាយ បានបកស្រាយអត្ថន័យនៃរូបលើស្បៃដើម្បីកុំឱ្យមហាជនយល់ច្រឡំតទៅទៀត។ លោកផ្ដល់បទសម្ភាសន៍ជាមួយអ្នកសារព័ត៌មានថា រូបក្បាលមនុស្សគឺចង់ឆ្លុះបញ្ចាំងពីទំនាក់ទំនងរបស់មនុស្សនៅលើភពផែនដីដោយមិនប្រកាន់ពូជសាសន៍ អាយុ ឬភេទឡើយ។ មិនថាអ្នកកើតនៅទីណា ជាតិ​សាសន៍​អ្វី សម្បុរ​ស្បែក​អ្វី មនុស្ស​គ្រប់​រូប​មានភាព​សំខាន់​ដូចៗ​គ្នា។ បើ​​ចង់​ឲ្យ​ពិភពលោក​កាន់​តែ​ប្រសើរ សង្គម​កាន់​តែ​ប្រសើរ យើង​មិនគួរប្រកាន់ពូជសាសន៍ អាយុ ឬភេទនោះទេ។ នេះហើយគឺជាគំនិតនៃស្បៃដែល Anna គ្រងក្នុងការប្រកួត Miss Universe នៅសហរដ្ឋអាមេរិក។

ទោះបីជាបកស្រាយល្អយ៉ាងណាក្ដី មហាជននៅតែមិនពេញចិត្តនូវការច្នៃស្បៃនេះដដែល សូម្បីតារាម៉ូដែលរៀមច្បងមួយចំនួនក៏បញ្ចេញមតិមិនគាំទ្រដែរ៕

ប្រែសម្រួល៖ សន្យា

ចុចអាន៖ ដឹងមូលហេតុដែល Anne មិនចង់រៀបការ ទស្សនិកជនអាណិតនាងខ្លាំង