ឆ្នាំ២០២៣ តារាជួរមុខថៃ Chompoo Araya ជាម្ចាស់ទ្រព្យសម្បត្តិជិត ៤៥លានដុល្លារ

Chompoo Araya ជាតារាសម្តែង តារាម៉ូដែល និងជាតារាទូរទស្សន៍ដ៏មានប្រជាប្រិយភាព របស់ប្រទេសថៃ។ បច្ចុប្បន្ន នាងបានក្លាយជាទៅជាតារារៀមច្បង ដែលមានអ្នកគោរពស្រឡាញ់ សឹងពាសពេញប្រទេស និងក្លាយទៅជាតារាស្រីដែលរកចំណូលបានច្រើនបំផុតពីការបង្ហោះរូបលើបណ្ដាញ Instagram។

បន្ថែមពីលើសម្ដែង និងការដើរម៉ូដ តារាស្រីហាយសូររូបនេះ គឺជាឯកអគ្គរដ្ឋទូតប្រេនគ្រឿងសម្អាង L’Oréal Paris និងជាភ្ញៀវរបស់កម្មវិធី International Fashion Weeks និងមហោស្រពភាពយន្ត Cannes ជារៀងរាល់ឆ្នាំទៀតផង។ នាងក៏ធ្លាប់ជាឯកអគ្គរដ្ឋទូតទស្សនាវដ្តីម៉ូដ L’Officiel Thailand នៅមហោស្រពភាពយន្តអន្តរជាតិ ទីក្រុងសៀងហៃផងដែរ។

បើយោងតាមប្រភពពីគេហទំព័រ Thai Update របស់ថៃ បានឱ្យដឹងថា ដើមឆ្នាំ ២០២៣នេះ ​តារាស្រីថៃលំដាប់ជួរមុខ Chompoo Araya ជាបុគ្គលមានឥទ្ធិពល​ខ្លាំង​ក្នុង​ប្រទេស ហើយប្រសិនបើម្ចាស់ផលិតផល ឬសេវាកម្ម ចង់ឱ្យនាងផ្សព្វផ្សាយ ត្រូវចំណាយលើនាងរាប់សិបម៉ឺនបាតឯណោះ។

អ្នកម៉ាក់អភិជនរូបនេះ សព្វថ្ងៃ​មាន​អ្នក Follow ប្រមាណ ១១.២លាននាក់ លើ Instagram ខណៈតម្លៃក្នុង ១ Post ដែល Chompoo រក​បានចន្លោះពី ១.៤-២.១លានបាត (ប្រហែល ៤២,០០០-៦៣,៩០០០ ដុល្លារ) ហើយក្នុងមួយឆ្នាំនាងរកចំណូលបានប្រហែល ៨.៩លានដុល្លារ។

ចំណែកប្រភពពី NetWorthSpot បានប៉ាន់ប្រមាណថា តារាស្រីវ័យ ៤១ឆ្នាំរូបនេះ បច្ចុប្បន្ន មានទ្រព្យសម្បត្តិសរុបប្រហែល ៤៤.៥២លានដុល្លារ នៅក្នុងដៃ។ ទោះជាយ៉ាងណាអ្នកជំនាញសេដ្ឋកិច្ចមួយចំនួនវិភាគថា ទ្រព្យសម្បត្តិពិតរបស់ Chompoo អាចមានតម្លៃលើសពីនេះទៅទៀត៕

ប្រែសម្រួល៖ សន្យា

ចុចអាន៖ Baifern ក្លាយជាសេដ្ឋីនី ក្ដោបក្ដាប់ទ្រព្យសម្បត្តិ ២០លានដុល្លារ ក្នុងវ័យ ៣០ឆ្នាំ

ចុចអាន៖ Lisa សមាជិកក្រុម BLACKPINK ទិញផ្ទះប្រណិតជាង ៦ លានដុល្លារ