មកុដកម្មវិធី​ Miss Charm ត្រូវអ្នកគាំទ្ររិះគន់ឥតសំចៃថាដូចកាឡៃ

មកុដសម្រាប់បំពាក់លើម្ចាស់ជយលាភីឯកនៃកម្មវិធី Miss Charm 2023 ត្រូវបានអ្នកគាំទ្រវិស័យសម្រស់នាំគ្នារិះគន់ឥតសំចៃថាដូចរបស់កាឡៃ ដែលមហាជនទូទៅអាចរកទិញនៅលើទីផ្សារ ឬលើបណ្ដាញអនឡាញយ៉ាងងាយស្រួល។

ថ្មីៗនេះ ប្រទេសវៀតណាមបាន និងកំពុងរៀបចំកម្មវិធីប្រកួត Miss Charm 2023 ខណៈមកុដដែលត្រូវបំពាក់ជូនបវរកញ្ញាអាណត្តិថ្មី ក៏បានបង្ហាញជាផ្លូវការផងដែរ។ ប៉ុន្តែមិនបានប៉ុន្មានម៉ោងផង ក្រោយបង្ហាញជាសាធារណៈ មកុដនេះ ត្រូវអ្នកគាំទ្ររិះគន់ និងបញ្ចេញមតិអវិជ្ជមានជុំវិញការរចនាដូចមកុដថោកៗដែលលក់នៅលើវេទិកាពាណិជ្ជកម្មអេឡិចត្រូនិក។

ទោះបីរងនូវពាក្យរិះគន់យ៉ាងណាក្ដី ម្ចាស់កម្មវិធី Miss Charm 2023 នៅតែចេញមុខប្រកាសជំហរ មិនផ្លាស់ប្ដូរនោះទេ។ ជាមួយគ្នាដែរខាងស្ថាប័នបានចេញមកបញ្ជាក់លម្អិតអំពីមកុដរបស់ខ្លួន វាមានឈ្មោះថា Endeavour – Perfect Effort គឺជាការរចនារាងមូល ៣៦០ដឺក្រេ ពណ៌ទឹកប្រាក់ ច្នៃពីគ្រាប់គ្រីស្តាល់ពណ៌សជាង ៤ពាន់គ្រាប់ គួបផ្សំជាមួយត្បូងទទឹមក្រហម។ ចំណែកអត្ថន័យរបស់វាសម្ដៅដល់ ​មន្ត​ស្នេហ៍របស់ស្រ្តី ជាពិសេស​ក្នុង​វប្បធម៌​បូព៌ា ការរចនាត្បូង​ទទឹម​ក្រហម​ ជានិមិត្តសញ្ញានៃប្រាជ្ញា ពន្លឺ និង​សំណាងល្អ​ចំពោះម្ចាស់។

ស្របពេលជាមួយគ្នានេះ នាយកប្រតិបត្តិ Bao Hoang បានថ្លែងសារសុំអភ័យទោសទៅកាន់មហាជន និងសន្យាកែតម្រូវនៅពេលក្រោយ ព្រោះពេលនេះខាងស្ថាប័ន ពុំមានពេលវេលាគ្រប់គ្រាន់សម្រាប់រៀបចំមកុដថ្មីឡើយ៕

ប្រែសម្រួល៖ សន្យា

ចុចអាន៖ ហ្វេនប្រកាសឈប់គាំទ្រ បវរកញ្ញាចក្រវាលវៀតណាម ក្រោយរកឃើញភស្តុតាងបន្លំសញ្ញាបត្រ

ចុចអាន៖ បវរកញ្ញា អ៊ីងហ្វា ម្ចាស់មកុដ Miss Grand ថៃ ប្រកាសបរិច្ចាគសរីរាង្គ ក្រោយពេលស្លាប់