បវរកញ្ញាចក្រវាល បែលហ្ស៊ិក ឆ្នាំ ២០២២ ជួបគ្រោះថ្នាក់ចរាចរណ៍យ៉ាងធ្ងន់ធ្ងរ

នាង Chayenne van Aarle ជាអ្នកតំណាងឲ្យប្រទេសបែលហ្ស៊ិក ក្នុងកម្មវិធីប្រកួតបវរកញ្ញាចក្រវាលលើកទី៧១ បានរងរបួសយ៉ាងធ្ងន់ធ្ងរ ហើយត្រូវបញ្ជូនទៅមន្ទីរពេទ្យភ្លាមៗ ក្រោយពីជួបគ្រោះថ្នាក់ចរាចរណ៍ ។

យោងទៅតាមកាសែត Metrotime របស់ប្រទេសបែលហ្ស៊ិកបានរាយការណ៍ថា គ្រោះថ្នាក់នេះបានកើតឡើងនៅវេលាម៉ោង ១៣ និង ៣០ នាទី នៅថ្ងៃទី ៧ ខែកុម្ភៈ ខណៈពេលដែល Chayenne van Aarle កំពុងធ្វើដំណើរពីផ្ទះមិត្តប្រុសរបស់នាងបានបុកជាមួយឡានដឹកទំនិញដែលរង់ចាំក្នុងការស្ទះចរាចរណ៍ ។

លោក Jonathan Pfund ជាប៉ូលិសសហព័ន្ធនៅទីក្រុង Het Nieuwsblad បាននិយាយថា ការប៉ះទង្គិចគ្នានេះបានបណ្តាលឲ្យរថយន្តរបស់ Chayenne ខ្ទិចនៅផ្នែកខាងមុខ ដែលធ្វើឲ្យប៉ូលិសបានចំណាយពេល ៣០ នាទីដើម្បី ទាញនាងចេញពីឡាន។ ក្នុងនោះបវរកញ្ញារូបនេះបានបាត់បង់ស្មារតីនិងរងរបួសក្បាល ហើយត្រូវផ្តល់ជំនួយដំបូងនៅនឹងកន្លែងមុនពេលបញ្ជូនទៅមន្ទីរពេទ្យ។

ជាមួយគ្នានេះ មានប្រភពបាននិយាយថា “វាជាអព្ភូតហេតុដែល Chayenne បានរួចផុតជីវិតបន្ទាប់ពីគ្រោះថ្នាក់ចរាចរណ៍នេះ ហើយនាងត្រូវបានគេបញ្ជូនទៅមន្ទីរពេទ្យ ZNA Middelheim ក្នុងទីក្រុង Antwerpen ក្នុងស្ថាន ភាពធ្ងន់ធ្ងរ ឥឡូវនេះនាងបានដឹងខ្លួនហើយ”។ ជាពិសេសមិត្តប្រុសរបស់នាងក៏បានបញ្ជាក់ថា Chayenne បានរងរបួសយ៉ាងធ្ងន់ធ្ងរលើផ្ទៃមុខ និងដងខ្លួនរបស់នាង ក៏ដូចជានៅលើសួតមានការហូរឈាមខាងក្នុង ។

យ៉ាងណាមិញ Chayenne van Aarle កើតនៅឆ្នាំ ១៩៩៩ ជាតារាម៉ូដែល និងអ្នកបម្រើលើយន្តហោះ រស់នៅក្នុងទីក្រុង Antwerp ប្រទេសបែលហ្សុិក។ កាលពីខែ មករា នាងបានតំណាងឱ្យប្រទេសបែលហ្ស៊ិកទៅប្រកួតនៅបវរកញ្ញាចក្រវាលនៅទីក្រុង New Orleans (សហរដ្ឋអាមេរិក) ប៉ុន្តែមិនបានជាប់ចំណាត់ថ្នាក់កំពូលទាំង ១៦ ចុងក្រោយឡើយ ៕

ប្រែសម្រួល៖នាងតូច

ចុចអាន៖មង្គលការបវរកញ្ញារងលេខ ១ Miss Universe 2021 សុទ្ធតែតារាល្បីៗចូលរួម