សាពូន មីដាដា ឆ្លើយតបចំពោះ អ្នកច្រណែន ពេលល្បីថា លោកឡើងឋានៈរដ្ឋលេខាធិការ

អតីតតារាចម្រៀងម្ចាស់បទ ពុកអើយ ម៉ែអើយ លោក សាពូន មីដាដា ថ្មីៗនេះមានដំណឹងថា លោកអាចនឹងមានតួនាទីជារដ្ឋលេខាធិការ នៃក្រសួងមួយនាពេលឆាប់ៗខាងមុខនេះ។ ប៉ុន្តែសាមីខ្លួនបានចេញមុខបញ្ជាក់ច្បាស់ៗជុំវិញករណីនេះ។

ជាក់ស្តែងនៅថ្ងៃទី១០ ខែកុម្ភៈ ឆ្នាំ២០២៣ ស្រាប់តែ លោក សាពូន មីដាដា បានបង្ហោះរូបថតរបស់ខ្លួនមួយសន្លឹកអមដោយសារគួរឱ្យចាប់អារម្មណ៍ថា គ្រាន់តែលឺល្ហិចល្ហៀងសោះថា ខ្ញុំឡើងរដ្ឋលេខាធិការ ច្រណែនខ្ញុំប៉ុណ្ណឹងទៅហើយ ឧបមាថាខ្ញុំឡើងពិតមែន មិនដឹងច្រណែនម្តេចទៅ មិនបាច់ដល់ថ្នាក់ហ្នឹងទេ លោករដ្ឋលេខាធិការជាទីគោរព។

លោក សាពូន មីដាដា បាននិយាយទៀតថា បើសិនជាព្រះឥន្ទប្រទានឋានៈហ្នឹងដល់ខ្ញុំមែន ក៏មិនបាត់បង់នូវផលប្រយោជន៍លោកដែរ ព្រោះខ្ញុំតាំងចិត្តរួចជាស្រេចថា ខ្ញុំនឹងថ្វាយបង្គុំលាព្រះឥន្ទទៅបួសរហូតហើយ។

គួររម្លឹកថា លោក សាពូន មីដាដា បានរៀបការបញ្ចប់ភាពនៅលីវជាមួយអ្នកនាង សឿ សុធារ៉ា កាលពីថ្ងៃទី៩ ខែកញ្ញាឆ្នាំ២០០៩ ដោយគិតរហូតមកដល់ពេលនេះ មានរយៈពេលជាង១០ឆ្នាំហើយ។ ប៉ុន្តែក្រោយមក ចំណងស្នេហារបស់អ្នកទាំងពីរបានប្រកាសដំណឹងនៃការបែកបាក់គ្នា ដោយបន្សល់ទុកនូវកូនប្រុសស្រីចំនួន២នាក់, ទី១ ឈ្មោះ សាពូន ដារ៉ាភិមាន និងកូនទី២ឈ្មោះ សាពូន ដារ៉ាបុរស៕

អត្ថបទ៖ ចាន់រ៉ា