មហាជនរិះគន់កម្មវិធី Miss Grand ថាជាវេទិកានិយាយរឿងនយោបាយ

កម្មវិធីប្រកួត Miss Grand Thailand ត្រូវមហាជនរិះថា ធ្វើឡើងគ្រាន់តែជាលេស ដើម្បីយកវេទិកានេះ មកនិយាយរឿងនយោបាយ និងវាយប្រហាររដ្ឋាភិបាលប៉ុណ្ណោះ។

ភ្លាមៗលោក Nawat Issarakraisil ស្ថាបនិក និងប្រធានស្ថាប័ន Miss Grand Thailand បានចេញមុខឆ្លើយតបចំពោះមតិរិះគន់ ហើយលោកថាបើនរណាមិនសុខចិត្ត ចង់ប្ដឹងក៏ប្ដឹងចុះ លោកមិនខ្លាចឡើយ។

នៅក្នុងសន្នសីទសារព័ត៌មាន នៅថ្ងៃទី២១ ខែកុម្ភៈ ឆ្នាំ២០២៣ លោក Nawat បានថ្លែងអំពីជោគជ័យនៃកម្មវិធី Miss Grand Thailand និង Miss Grand International រយៈពេលជាង ១០ឆ្នាំមកនេះ ហើយចំពោះពាក្យ​ចចាមអារ៉ាម​ដែលថា Miss Grand ផ្តល់​ឱកាស​ឲ្យ​បវរកញ្ញានិយាយបញ្ហា​នយោបាយ​ វាមិនមែនជារឿងពិតឡើយ។ កន្លងមកកម្មវិធីតែងផ្ដល់សិទ្ធិសេរីភាពឱ្យបេក្ខភាពគ្រប់រូប មានឱកាសនិយាយពីអ្វីដែលពួកគេប្រឈម និងអ្វីដែលពួកគេចង់ឃើញនៅក្នុងសង្គមរបស់ពួកគេ វាពុំមែនជាការវាយប្រហារឡើយ។

ដោយឡែកចំពោះព្រឹត្តិការណ៍ នៅថ្ងៃទី១៧ ខែមីនា ឆ្នាំ២០២៣ ខាងមុខដែលគណបក្សនយោបាយនឹងរៀបចំបញ្ជូនអ្នកនយោបាយទៅនិយាយនៅលើឆាក Miss Grand រយៈពេល១ម៉ោង នោះមិនមែនជាការទិញសន្លឹកឆ្នោតនោះទេ។ ក្រោយគណបក្សនយោបាយធ្វើបទបង្ហាញ បេក្ខនារីមកពីខេត្តទាំង៧៧ នឹងសួរដេញដោលអ្នកនយោបាយទាំងនោះអំពីគោលលទ្ធិរបស់គណបក្ស ពោលគឺស្ថាប័ន Miss Grand ​មិន​មាន​បំណងប្រកាន់​និន្នាការ​ខាងណាឡើយ៕

ប្រែសម្រួល៖ សន្យា

ចុចអាន៖ ទម្រាំបានចង្កេះស្ដើងដូចពេលនេះ Mai Davika ហាត់កីឡាមិនតិចប្រភេទទេ

ចុចអាន៖ មិនធម្មតា ម្ចាស់មកុដ Miss Charm ឆ្នាំ២០២៣ មានសាវតាជាអ្នកបើកយន្តហោះ