ការសម្ដែងរបស់ Rihanna រងការរិះគន់ថា ជារឿងស្រើបស្រាលខ្លាំង

Rihanna បានបង្ហាញរូបរាងដ៏គួរឱ្យចាប់អារម្មណ៍នៅលើឆាក Super Bowl LVII នៅពេលបង្ហាញពោះរបស់នាងមានផ្ទៃពោះ ប៉ុន្តែទស្សនិកជនជាច្រើនបែរជារិះគន់ការសម្តែងនោះថាស្រើបស្រាលខ្លាំងទៅវិញ ។

យោងទៅតាម TMZ បានឲ្យដឹងថាគណៈកម្មការទំនាក់ទំនងសហព័ន្ធ (FCC) បានទទួលពាក្យបណ្តឹងចំនួន ១០៣ ទាក់ទងនឹងកម្មវិធី Super Bowl ក្នុងខែនេះ។ ភាគច្រើនទាក់ទងនឹងការសម្តែងពាក់កណ្តាលតង់របស់ Rihanna ។ទស្សនិកជនមួយផ្នែកបានត្អូញត្អែរថា ទំនុកច្រៀង និងក្បាច់រាំក្នុងការសម្ដែងរបស់ Rihanna គឺស្រើបស្រាលពេក ។ អ្នកមើលរដ្ឋកាលីហ្វ័រញ៉ាម្នាក់បានប្រៀបធៀបការសម្តែងរបស់ Rihanna ទៅ Kim Petras និង Sam Smith ក្នុងកម្មវិធី Grammy Awards ឆ្នាំ ២០២៣។

ក្នុងនោះទស្សនិកជនក៏បានរិះគន់សំដៅទៅលើអ្នករាំ ថាធ្វើកាយវិការមិនសមរម្យទាំងស្រុងសម្រាប់កុមារ។ ជាពិសេសអ្នកមើលម្នាក់បានអធិប្បាយថា “ការសម្តែងពាក់កណ្តាល ឆ្នាំនេះគឺមិនសមរម្យដែលខ្ញុំត្រូវបិទទូរទស្សន៍ដោយសារតែរឿងអាសអាភាស” ។

យ៉ាងណាមិញ នៅលើឆាក Super Bowl កាលពីថ្ងៃទី ១២ ខែកុម្ភៈ Rihanna មានផ្ទៃពោះ ដូច្នេះនាងមិនបានបង្ហាញក្បាច់រាំច្រើនទេ។ ថ្វីត្បិតតែសម្តែងបានប៉ុន្មានក្បាច់ក៏ពិតមែន ប៉ុន្តែតារាចម្រៀងស្រីរូបនេះនៅតែរងការរិះគន់ដដែរ ៕

ប្រែសម្រួល៖នាងតូច