ថ្ងៃខួប១០០ថ្ងៃ ខាត់ ចំរើន ខាត់ សុឃីម ថាជាការចាកចេញដ៏កម្សត់បំផុត

តារាកំប្លែង និងចម្រៀងលោក ខាត់ ចំរើន បានទទួលមរណភាពកាលពីអំឡុងខែវិច្ឆិកាដែលគិតមកដល់ពេលនេះមាន​រយ:ពេលប្រមាណជាង៣ខែហើយស្របពេលដែលតារាពហុជំនាញអ្នកនាង ខាត់ សុឃីម និងក្រុមគ្រួសារបានរៀបចំចង្ហាន់ប្រគេនព្រះសង្ឃក្នុងឱកាសគំរប់ខួប១០០ថ្ងៃលក្ខណ:គ្រួសារឧទិ្ធសកុសលដល់ដួងវិញ្ញាណក្ខន្ធរបស់លោក។

ជាការពិតអ្នកនាង ខាត់ សុឃីម និងក្រុមគ្រួសារកាលពីថ្ងៃទី២៧ ខែកុម្ភ: ម្សិលមិញមិនបានរៀបចំពិធីបុណ្យគំរប់ខួប​១០០ថ្ងៃរបស់លោក ខាត់ ចំរើន លក្ខណ:ធំដុំអញ្ជើញភ្ញៀវចូលរួមនោះទេ តែគ្រួសាររបស់នាងបានរៀបចំចង្ហាន់ដើម្បីយកទៅប្រគេនព្រះសង្ឃជាច្រើនអង្គ។ នេះបើតាមការបង្ហាញឲ្យដឹងពីតារាពហុជំនាញរូបនេះ។

បើតាមការរៀបរាប់របស់អ្នកនាង ខាត់ សុឃីម ថ្វីត្បិតតែពេលនេះលោក ខាត់ ចំរើន ដែលជាប្អូនប្រុសបង្កើតបាន​ចែក​ឋានចាកឆ្ងាយពីគ្រួសារមានរយ:ពេលច្រើនខែហើយពិតមែន ប៉ុន្តែសម្រាប់ទំហំទឹកចិត្តនៃការនឹកស្រលាញ់របស់គ្រួសារពួកគេទាំងមូលនៅមិនទាន់បំភ្លេចបានឡើយ។ អ្នកនាង ខាត់ សុឃីម បានបញ្ជាក់ថា ការបាត់បង់ ខាត់ ចំរើន គឺជាការចាកចេញយ៉ាងកំសត់បំផុត។

ជាមួយគ្នានេះតារាពហុជំនាញ ខាត់ សុឃីម ក៏បានបង្ហាញពីទំហំទឹកចិត្តទៅកាន់ ខាត់ ចំរើន ដែលចែកឋានដែរថា​១០០ថ្ងៃរបស់ឯងហើយនេះជាកាចាកចេញដ៏កំសត់បំផុតអាប្អូនប្រុសថ្ងៃនេះសូមឯងទៅកាន់ឋានសុខជាតិណាៗសូមអោយឯងអាយុវែងក្តីស្រលាញ់ នឹករលឹករហូត។

សូមរម្លឹកថា តារាកំប្លែងនិងចម្រៀងលោក ខាត់ ចំរើន ដែលជាប្អូនប្រុសបង្កើតអ្នកនាង ខាត់ សុឃីម បានទទួលមរណភាពកាលពីព្រឹកថ្ងៃទី២០ ខែវិច្ឆិកា ឆ្នាំ២០២២ ក្នុងវ័យ៤០ឆ្នាំដោយសារជំងឺក្រិនថ្លើមបេះដូង និងក្រលៀន។ តាមរយ​:​ដំណឹងមរណភាពលោក ខាត់ ចំរើន នេះគេឃើញមានអ្នកគាំទ្រព្រមទាំងសិល្បករ-សិល្បការិនីជាច្រើនបានសម្តែងការសោកស្តាយចំពោះការបាត់បង់ធន់ធានសិល្បករដ៏មានប្រជាប្រិយភាព និងទេពកោសល្យផ្នែកសិល្ប:ស្ទើរគ្រប់ជំនាញ៕

អត្ថបទ៖ ចាន់រ៉ា