មុនគ្រងមកុដ បវរកញ្ញាថៃ Maeya ធ្លាប់ត្រូវគេ Bully តាំងពីតូច

បញ្ហានៃការគំរាមសម្លុត ឬមាក់ងាយ (Bully) បាននិងកំពុងក្លាយជារឿងដែលមនុស្សមួយចំនួនប្រើវាយប្រហារគ្នាមិនថានៅលើបណ្ដាញសង្គម ឬនៅក្នុងសង្គមជាក់ស្ដែងឡើយ។ ទោះបីជាមានមនុស្សមួយចំនួនព្យាយាមលុបបំបាត់ ប៉ុន្តែនៅតែមានមនុស្សមួយចំនួនទៀតព្យាយាមធ្វើវាឡើង រហូតធ្វើឱ្យជនដែលត្រូវគេ Bully មានបញ្ហាផ្លូវចិត្ត និងមានអ្នកខ្លះដាច់ចិត្តធ្វើអត្តឃាតក៏មាន។

យ៉ាងណាមិញ អ្នកដែលត្រូវគេ Bully ខ្លះ មិនបានបាក់ទឹកចិត្តនោះទេ ពួកគេបានយករឿងដែលគេមាក់ងាយ មកផ្ដុំជាកម្លាំងចិត្ត ដើម្បីតស៊ូក្លាយជាបុគ្គលជោគជ័យនៅក្នុងសង្គម និងធ្វើជាគម្រូដល់មនុស្សជាច្រើន។ តួយ៉ាង បវរកញ្ញាភេទទី៣ Maeya Sunsun ម្ចាស់មកុដកម្មវិធី Fabulous Thailand 2023 ធ្លាប់រងការ Bully តាំងពីនៅតូចៗ ប៉ុន្តែនាងតស៊ូជម្នះ រហូតមកដល់បច្ចុប្បន្នជីវិតនាងត្រូវមនុស្សជាច្រើនតាមគាំទ្រ។

នៅក្នុងបទសម្ភាសន៍មួយជាប៉ុស្តិ៍ទូរទស្សន៍ថៃ Maeya ប្រាប់ថា កាលនាងនៅរៀនបឋមសិក្សា មិនត្រឹមតែមិត្តរួមថ្នាក់ Bully នោះទេ សូម្បីអាណាព្យាបាលសិស្សមួយចំនួនក៏មាក់ងាយ មើលលើមើលក្រោម ក្នុងក្រសែភ្នែកខ្ពើមរអើមដែលនាងមានសម្រស់មិនស្អាត ថែមទាំងខុសគេទៀត។ ​មិនតែប៉ុណ្ណោះ នាងបន្តថា នៅពេលនាងក្លាយជាតារាកំប្លែងហើយក៏ដោយ ក៏មិនខ្វះទេអ្នក Bully ដែរ ហើយសូម្បីពេលនេះ ពេលនាងជាប់ជាបវរកញ្ញាឯកនៅតែមានមនុស្ស ​Bully នាងអ៊ីចឹង។

ទោះយ៉ាងណា Maeya មិនយកចិត្តទុកដាក់នោះទេ ព្រោះបើនាងខ្វល់ខ្វាយ នាងប្រាកដជាឈឺចិត្តស្អិតទ្រូង មិនអាចក្លាយជានាងដូចពេលនេះឡើយ៕

ប្រែសម្រួល៖ សន្យា

ចុចអាន៖ សម្រស់បវរកញ្ញាថ្មីមួយរូប កំពុងបង្កការចាប់អារម្មណ៍ពេញបណ្ដាញសង្គមថៃ

ចុចអាន៖ Anchilee អតីតបវរកញ្ញាចក្រវាលថៃ ធ្លាប់ត្រូវមិត្តប្រុសវាយធ្វើបាប ថែមទាំងគំរាមសម្លាប់