លីម តិចម៉េង ទម្លាយអាថ៌កំបាំងចិញ្ចៀនខ្មៅ

តារាចម្រៀង លីម តិចម៉េង មានដើមកំណើតមកពីទឹកដីខេត្តកំពង់ចាមបានទម្លាយពីប្រវត្តិតស៊ូខ្លះៗថា ខ្លួនធ្លាប់ជាអតីតក្មេងឃ្វាលគោ, ធ្លាប់រត់តុតាមរោងការ និងជាសន្តិសុខជាដើម។

ជាការពិតតារាចម្រៀងវ័យក្មេង លីម តិចម៉េង បន្ទាប់ពីក្លាយជាម្ចាស់ពានបច្ចុប្បន្នត្រូវបានគេកត់សម្គាល់ឃើញថា ទាំងប្រជាប្រិយភាព និងសន្ទុះនៃការគាំទ្រទស្សនិកជនគឺមានការកើនឡើងជាបន្តបន្ទាប់ពិសេសតាមរយៈការឡើងច្រៀង​លើឆាកម្តងៗមានអ្នកទៅគាំទ្រភ្លូកទឹកភ្លូកដីតែម្តង។

គេចាំបានថា បន្ទាប់ទទួលបានជ័យលាភីជាម្ចាស់ពានកាលណោះគឺមានការស៊ែរចែករំលែកតៗគ្នាដោយក្នុងនោះគេសម្គាល់ឃើញថា កម្លោះតូច លីម តិចម៉េង ក៏បានពាក់ចិញ្ចៀនដែលមានត្បូងពណ៌ខ្មៅស្រដៀងគ្នាទៅនឹងម្ចាស់ពានរដូវកាលទីមួយ និងទីពីរគឺលោក នី រតនា និងកញ្ញា ឈិន ម៉ានិច។ ប៉ុន្តែពុំមានបកស្រាយពីសាមីខ្លួនលោក លីម តិចម៉េង ទេជុំវិញរឿងដ៏ចាប់អារម្មណ៍នេះ។

ដោយឡែកស្រាប់តែមុននេះតារាចម្រៀងលោក លីម តិចម៉េង បានទម្លាយប្រវត្តិចិញ្ចៀនត្បូងខ្មៅនាំសំណាងដែលគ្រប់គ្នាពុំធ្លាប់ដឹង។ បើតាមការរៀបរាប់របស់ លីម តិចម៉េង បញ្ជាក់ថា សម្រាប់ចិញ្ចៀនត្បូងខ្មៅនាំសំណាងដែលខ្លួនលោកកំពុងពាក់នៅដៃនេះគឺទទួលពីលោកយាយជាទីស្រលាញ់របស់ខ្លួនមុនពេលដែលគាត់ចែកឋានទៅ។

កម្លោះសង្ហា លីម តិចម៉េង បាននិយាយបន្តទៀតថា ចិញ្ចៀននេះគឺលោកយាយរបស់ខ្លួនបានផ្តល់ឲ្យតាំងពីលោកនៅវ័យក្មេងមកម្លេះដែលគិតមកដល់ពេលនេះមានរយៈពេលប្រមាណជាង ១០ ឆ្នាំមកហើយពោលគឺអំឡុងពេលរៀននៅសាលា​បឋមសិក្សា។

កន្លងមកគឺមានការលើកឡើងពីសំណាក់អ្នកលេងបណ្តាញសង្គមថា ចិញ្ចៀនក្បូងខ្មៅដែល តិច ម៉េង ពាក់ក្នុងដៃនោះពិតជានាំលាភនាំហេងតែយ៉ាងណាក៏រួមផ្សំជាមួយនឹងសមត្ថភាពរបស់បេក្ខជនដែរប្រសិនបើមិនមានសមត្ថភាពក៏មិនអាចក្លាយជាម្ចាស់ពាននោះទេ៕

អត្ថបទ៖ ចាន់រ៉ា