តារាចម្រៀង សំ សុវណ្ណារ៉ាក់ ត្រូវឪពុកប្រកាសកាត់កាលចោល

អ្នកគាំទ្រមានការភ្ញាក់ផ្អើលគ្រប់គ្នាបន្ទាប់ពីមានព័ត៌មានថាឪពុកតារាចម្រៀងលោក សំ សុវណ្ណារ៉ាក់ បានប្រកាសកាត់កាលកូនប្រុសរូបនេះចោលដោយសារភាពអកតញ្ញូ។ លោក សំ សុវណ្ណារ៉ាក ត្រូវបានទស្សនិកជនស្គាល់ថា ជាតារាចម្រៀងល្បីឈ្មោះច្រើនគួរសមនៅក្នុងវិស័យសិល្ប:នាពេលបច្ចុប្បន្ន។

នៅលើទំព័រហ្វេសប៊ុកឈ្មោះ Sam Samol ដែលគេស្គាល់ថាជាឪពុកលោក សំ សុវណ្ណារ៉ាក់ បានប្រកាសខ្លឹមសារភ្ជាប់រូបភាពតារាប្រុសរូបនេះថា “ខ្ញុំបាន សំ សំអុល សូមប្រកាសកាត់កាលជាសាធារណ:ថាកូនម្នាក់នេះចោលចាប់ពីពេលនេះតទៅ ហើយក៏ឈប់ទទួលស្គាល់ជាកូនផងដោយសារកូននេះមិនស្តាប់បង្គាប់ម៉ែឪជេប្រមាថម៉ែឪ”។

លោកបានបន្តទៀតថា បើថ្ងៃក្រោយកូននេះមានរឿងអ្វីប្រព្រឹទ្ធខុសច្បាប់ខ្ញុំជាអាណាព្យាបានមិនទទួលខុសត្រូវចំពោះមុខច្បាប់ឡើយ ថ្ងៃទី២២ ខែមីនា ឆ្នាំ២០២៣។ ជាមួយគ្នានេះលោក សំ សំអុល ក៏បានបង្ហោះបន្ថែមថា បទសម្ភាសន៍របស់គាត់និយាយថា កាលនៅតូចរស់នៅជាមួយយាយតាឪពុកយកទៅផ្ញើយាយ ដោយមិនបានចិញ្ចឹម គ្មានគុណចំពោះគាត់ ពេលធំឡើងកាលណាគាត់នឹងតបស្នងបែបនេះ។ យ៉ាងណាមិញក្រោយការបង្ហោះនេះមិនបានប៉ុន្មានម៉ោងទេលោកក៏បានលុបចោលវិញ។

ជុំវិញព័ត៌មានដ៏រសើប និងភ្ញាក់ផ្អើលខាងលើនេះ រហូលមកដល់ព្រឹកថ្ងៃទី២៣ ខែមីនា ឆ្នាំ២០២៣មិនទាន់មានប្រតិកម្ម​បក​ស្រាយពីតារាប្រុសសង្ហាលោក សំ សុវណ្ណារ៉ាក់ នៅឡើយទេ។ ចំណែកកម្ពុជាថ្មីក៏នៅមិនទាន់អាចស្វែងរកការសួរនាំបន្ថែមពីសំណាក់លោក សំ សុវណ្ណារ៉ាក់ ក៏ដូចលោក សំ សំអុល បានដែរ៕

អត្ថបទ៖ ចាន់រ៉ា