វ័យកាន់តែជរាលោកតា សង់ ស៊ីស ទទួលបានការលើកទឹកចិត្ត និងឧបត្ថម្ភពីសប្បុរសជន

តារាកំប្លែងជើងចាស់ល្បីឈ្មោះលោកតា សង់ ស៊ីស ថ្វីត្បិតបច្ចុប្បន្នគាត់វ័យជរា និងកំពុងមានជំងឺប្រចាំកាយផងនោះតែលោកតាហាក់នៅនឹករលឹកដល់អាជីពសិល្បៈ។ ដោយសារបាត់បង់សមត្ថភាពសិល្ប:ទើបពេលនេះលោកតា សង់ ស៊ី បានឃ្លាតឆ្ងាយពីអាជីពមួយនេះទាំងស្រុង។

ទោះបីជាយ៉ាងណាក្តី គេនៅតែឃើញអ្នកគាំទ្រ និងមហាជនមួយចំនួនធំបានបង្ហាញការនឹករលឹកចំពោះវីរ:សិល្បករដ៏ឆ្នើមលោកតា សង់ ស៊ីស ខណ:មានសប្បុរសជនឯទៀតបន្តការផ្តល់ជាថវិការឬជំនួយសម្រាប់តារាជើងចាស់លោកតា សង់ស៊ីស ដើម្បីលើកទឹកចិត្ត និងជួយសម្រួលដល់ជីវភាពឬថ្នាំពេទ្យជាដើម។ ជាក់ស្តែងមុននេះតារាកំប្លែងនាយ សង់ ស៊ីស ក៏ទទួលបានការឧបត្ថម្ភថវិកាមួយចំនួនទៀតតាមរយ:អ្នកនាង កាឆយ ដែលជាកូនស្រីបង្កើតផងដែរ។

អ្នកនាង កាឆយ រៀបរាប់ដោយអារម្មណ៍បែបនេះថា អរគុណបងប្អូនទាំងអស់គ្នាដែលបាននឹកឃើញហើយអាណិត និងស្រលាញ់ពុកខ្ញុំ សូមជូនពរម្ចាស់ថវិកា មានសុខភាពល្អជោគជយ័ពេញមួយជីវិត។ បើតាមការបញ្ជាក់បន្ថែមពីអ្នកនាង កាឆយ បានលើកឡើងថា សម្រាប់ថវិការដែលលោកតា សង់ស៊ីស ទទួលពីសប្បុរស​ជនគឺមានចំនួន៧០ម៉ឺនរៀល។

ជាមួយគ្នានោះគេក៏ឃើញតារាកំប្លែងជើងចាស់លោកតា សង់ ស៊ីស បានបង្ហាញអារម្មណ៍រំភើប និងសប្បាយចិត្តក្រោយទទួលបានការលើកទឹកចិត្ត និងឧបត្ថម្ភពីសំណាក់សប្បុរសជន។ លោកតា សង់ ស៊ីស គឺជាតារាកំប្លែងមួយរូបដែលមានឈ្មោះបោះសំឡេងយ៉ាងខ្លាំងកាលដែលលោកនៅមានសមត្ថភាពកំប្លែង និងសម្តែងលើវិថីសិល្ប:។ ប៉ុន្តែក្រោយមកលោក​តា សង់ស៊ីស ក៏បានធ្លាក់ខ្លួនឈឺរហូតបាត់បង់សមត្ថភាពលើវិស័យសិល្ប:មានរយ:ពេលប៉ុន្មានឆ្នាំចុងក្រោយនេះ។លោកតា សង់ស៊ី ក៏ជាសិល្បករខ្មែរម្នាក់ដែលបានធ្វើឱ្យប្រជាជនរាប់លាននាក់មានស្នាមញញឹមតាមរយៈទេពកោសល្យកំប្លែងរបស់គាត់នាពេលកន្លងមក៕

អត្ថបទ៖ ចាន់រ៉ា