ផលិតកម្ម YG៖ ពាក្យចចាមអារ៉ាមថា Rosé ប្រើប្រាស់គ្រឿងញៀន ​ជារឿងគួរឱ្យអស់សំណើច

ថ្មីៗនេះ Rosé សមាជិកក្រុម BLACKPINK បានប្រឈមនឹងពាក្យចចាមអារ៉ាមដែលថា នាងប្រើប្រាស់គ្រឿងញៀន ប៉ុន្តែភ្លាមៗផលិតកម្ម YG Entertainment បានចេញមុខឆ្លើយតបទៅនឹងពាក្យចចាមអារ៉ាមទាំងនោះ និងបាននិយាយថា វាជាគួរឱ្យអស់សំណើចណាស់។

កាលពីថ្ងៃទី១១ ខែមេសា កន្លងទៅ លោក Riccardo Tisci អតីតប្រធានផ្នែកច្នៃម៉ូដរបស់ប្រេន Burberry បានចែករំលែករូបថតពីការទៅទស្សនាវិមានដ៏ប្រណីត និងល្បីល្បាញ ដែលជាកម្មសិទ្ធិរបស់អ្នកច្នៃម៉ូដ និងសហគ្រិន Eva Chow ស្របពេលដែល Rosé និងតារាសម្ដែង Kang Dong Won គឺជាភ្ញៀវក្នុងចំណោមភ្ញៀវទាំងអស់។

នៅក្នុងរូបថតនោះ អ្នកនិយមលេងអ៊ីនធឺណិតបានកត់សម្គាល់ថា ពួកគេបានឃើញភស្តុតាងនៃគ្រឿងញៀននៅលើតុ រួមទាំងម្សៅពណ៌សផងដែរ។ បន្ទាប់ពីរូបថតត្រូវបានបង្ហោះ និងពាក្យចចាមអារ៉ាមអំពីការប្រើប្រាស់គ្រឿងញៀនត្រូវបានផ្សព្វផ្សាយលោក Riccardo បានលុបចោលការបង្ហោះភ្លាមៗ។

មកដល់ថ្ងៃទី១៣ ខែមេសា ផលិតកម្ម YG Entertainment បានឆ្លើយតបទៅនឹងការចោទប្រកាន់នេះជាមួយនឹងសេចក្តីថ្លែងការណ៍ផ្លូវការមួយដោយពន្យល់ថា ពាក្យចចាមអារ៉ាមដែលបានផ្សព្វផ្សាយនៅលើបណ្តាញសង្គមគួរឱ្យចង់សើច ត្បិតវាជារឿងមិនពិតសូម្បីបន្តិច។

នៅក្នុងសេចក្តីថ្លែងការណ៍ ផលិតកម្ម YG Entertainment បានបញ្ជាក់ថា “យើងកំពុងបន្តចាត់វិធានការផ្លូវច្បាប់ចំពោះអ្នកដែលបំពានសិទ្ធិ និងឯកជនភាពរបស់សិល្បកររបស់យើង។ បច្ចុប្បន្នយើងកំពុងតាមដាន និងស្វែងរកអ្នកដែលបង្កើត និងកំពុងផ្សព្វផ្សាយពាក្យចចាមអារ៉ាមអាក្រក់អំពីសិល្បកររបស់យើង។ យើងនឹងមិននៅស្ងៀម ហើយប្រឆាំងពេញទំហឹង” ៕

ប្រែសម្រួល៖ សន្យា

ចុចអាន៖ ធ្លាយរូបភាពរបស់ Rosé ផ្ទុះការសង្ស័យថា នាងប្រើប្រាស់គ្រឿងញៀន

ចុចអាន៖ តារាចម្រៀង ​Kratae ប្រាប់ថា ចង់រៀបការនៅអាយុ ៣៧ឆ្នាំ