ពូ ឃ្លាំង ប្រឹងហ្វឹកហាត់កណ្តាលថ្ងៃ រហូតកើតខ្យល់​គ​ថ្ងៃច្រៀងបើកកីឡាស៊ីហ្គេម

មានការភ្ញាក់ផ្អើលគ្រប់គ្នា​ បន្ទាប់ពីឃើញមានការបង្ហោះចែករំលែករូបភាពបង្ហាញពីតារាចម្រៀងរ៉េប ពូ ឃ្លាំង ត្រូវបានក្រុមការងារនាំគ្នាជួយចាប់ខ្យល់ និងមានបំពង់ប្រេងខ្យល់នៅជាប់ច្រមុះ ដែលបង្ហាញពីអាការ:ហាក់មិន​ស្រួលខ្លួនអំឡុងពេលចូលរួមសម្តែងក្នុងពិធីបើកកីឡាស៊ីហ្គេម។

តាមរយ:រូបភាពនេះដែរ ក៏មានការបញ្ចេញមតិសួរនាំពីអ្នក​គាំទ្រ​អំពីសុខទុក្ខរបស់តារាចម្រៀងរ៉េបពូ ឃ្លាំង ខណ:ខ្លះទៀតបានសម្តែងការព្រួយបារម្ភផងនោះ។ យ៉ាងណាមិញក្រោយឃើញការសួរនាំ និងបារម្ភពីសុខភាព ពូ ឃ្លាំង គឺមានការបញ្ជាក់​ពីសំណាក់គណនីហ្វេសប៊ុកមួយបានឲ្យដឹងថា មកពី ពូ ឃ្លាំង ខំប្រឹងហ្វឹកហាត់ ១ សប្តាហ៍ជាប់គ្នាទើបកើតជំងឺខ្យល់​បែបនេះ។

ម្ចាស់គណនីហ្វេសប៊ុកឈ្មោះ Ken Veasna បានលើកឡើងថា ម្សិលមិញអាណិតពូ ឃ្លាំង​ ខំប្រឹងប្រែងហ្វឹកហាត់ ១ អាទិត្យ​ជាប់គ្នា​កណ្ដាលថ្ងៃ រហូត​ជាមួយក្រុមការងារ​ដល់ថ្ងៃបញ្ចប់​ Show SeaGame សម្រាប់​ជាតិ​បែរជាខ្យល់គបន្ទាប់ពីសម្ដែង​បទ ​”ផ្ទះតូចបេះដួងធំ​ ” ជាមួយបងស្រី​ មាស​ សុខសោភា រួចរាល់ជូនពរពូឆា ប់ជាសះស្បេីយ។

ចំណែកតារាចម្រៀង ពូឃ្លាំង បានរៀបរាប់ឲ្យដឹងថា អរគុណដែលមានអ្នកផ្ញេីររូបអោយ ​ពេលងងឹតមុខម្សិលមិញ​​មេីល​ហេីយ​បានដឹងថាខ្លួនយ៉ាប់ប៉ុណ្ណា​។ គ្រាន់តែសម ៥ ថ្ងៃសោះ​ក្តៅបន្តិចសោះ​ ក៏ទ្រាំមិនបានអស់ភាពសង្ហារបាត់។

លោកបានបញ្ជាក់បន្ថែមដោយខ្លីថា យ៉ាងណា​ម្សិលមិញពេលច្រៀងខំព្យាយាមទប់​រហូតដេីរចេញ​មក​ខំប្រាប់ខ្លួនឯងថាទ្រាំៗ​តែមកពីក្តៅពេក​ហត់ពេក ​ស្រាប់តែងងឹតមុខ​វិលៗ​ផែនដីក្រឡាប់ចាក់​គេគ្រាចេញក្រៅ។

តារាចម្រៀងរ៉េបល្បីឈ្មោះ ពូ ឃ្លាំង លើកឡើងទៀតថា នេះជាលេីកទីមួយសម្រាប់លោកដែលជួបរឿងបែបនេះក្នុងជីវិតហើយ​ពេលនោះសំណាងដែលលោកខំទប់រហូតដល់ពេលសម្តែងចប់​នឹងដេីរចេញមកវិញ៕

អត្ថបទ៖ ចាន់រ៉ា