ជីវិតកម្សាន្ដ

កូនប្រុសទទួលសញ្ញាបត្រនៅអាមេរិក មាស សុខសោភា មោទនភាព និងថ្លែងក្ដីរំភើបយ៉ាងកក់ក្ដៅ

បានផុស

២ years មុន

នៅ

ថ្ងៃព្រហស្បតិ៍ ៨ មិថុនា ២០២៣

ដោយ

កំពូលតារាចម្រៀង មាស សុខសោភា បង្ហាញពីអារម្មណ៍រំភើប និងកក់ក្ដៅបំផុត ខណៈកូនប្រុសបានទទួលសញ្ញាបត្រនៅអាមេរិក កាលពីពេលថ្មីៗកន្លងទៅនេះ។ អ្នកនាង មាស សុខសោភា បានបញ្ជាក់ថា ទោះបីកូនជាកូនខ្មែរទៅរស់នៅ និងសិក្សានៅក្រៅប្រទេស តែកូននៅតែបង្ហាញពីអត្តសញ្ញាណរបស់កូនខ្មែរដដែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងពីអារម្មណ៍រំភើប អ្នកនាង មាស សុខសោភា បានរៀបរាប់ថា «សូមអបអរសាទរកូនប្រុស សូមជូនពរឲ្យកូនជោគជ័យគ្រប់កិច្ចការ ទាំងការសិក្សា និងកិច្ចការងារផ្សេងៗ ហើយទទួលបាននូវសុខភាពល្អ ជួបប្រទះតែមនុស្សល្អៗ ចូលមកក្នុងជីវិតរបស់កូន កូនគឺជាកូនប្រុសដែលស្អាតឆ្លាតពូកែ ហើយប្រកបទៅដោយសីលធម៌ ស្ដាប់ដំបូន្មាន មិនដែលធ្វើឲ្យប៉ាម៉ាក់ពិបាកចិត្ត មានភាពក្លាហានអាចដោះស្រាយបញ្ហាមួយចំនួនបានដោយខ្លួនឯង»។

តារាចម្រៀង មាស សុខសោភា បាននិយាយទៀតថា «ដូច្នេះសូមឲ្យការខិតខំប្រឹងប្រែងរបស់កូនជោគជ័យក្នុងជីវិត សម្រេចរាល់បំណងប្រាថ្នាទាំងអស់របស់កូនដែលបានប៉ងប្រាថ្នា ពិតជារំភើបខ្លាំង ជាងនេះទៅទៀតនៅពេលដែលកូនឡើងទទួលសញ្ញាបត្រ កូនបានបង្ហាញពីការគោរពលើកដៃសំពះលោកគ្រូ អ្នកគ្រូ និងមនុស្សជុំវិញខ្លួនកូន ដែលបង្ហាញថា ទោះបីកូនជាកូនខ្មែរទៅរស់នៅ និងសិក្សានៅក្រៅប្រទេស តែកូននៅតែបង្ហាញពីអត្តសញ្ញាណរបស់កូនខ្មែរដដែល»។

តារាស្រីល្បីឈ្មោះអ្នកនាង មាស សុខសោភា បាននិយាយទៀតថា «សុំទោសផងណាដែលម៉ាក់អត់បានចូលរួម ដោយសាររវល់បំពេញការងារ តែយ៉ាងណាក៏សូមជូនពរកូនពីចម្ងាយ ពេលរួចពីការងារយើងនឹងជួបគ្នាឆាប់ៗណាកូនប្រុស»។ តាមរយៈនេះដែរ មានអ្នកគាំទ្រ និងមហាជនមួយចំនួន បានសម្ដែងការអបអរសាទរជាមួយអ្នកនាង មាស សុខសោភា ដែលកូនប្រុសទទួលបានសញ្ញាបត្រនៅអាមេរិកនាពេលនេះផងដែរ៕

អត្ថបទ ៖ ចាន់រ៉ា