Youtuber ដែលធ្លាប់ជួយជនពិការកម្ពុជា ប៊ិះអស់ជីវិតដោយសារយាន Titan

MrBeast បុគ្គលល្បីក្នុង YouTube បានអះអាងថា ខ្លួនត្រូវគេអញ្ជើញទៅដំណើរកម្សាន្តមើលខ្មោចកប៉ាល់ Titanic តាមរយៈយានជ្រមុជទឹក Titan ដែលផ្ទុះដែរ ប៉ុន្តែលោកបដិសេធទាន់ពេល ។

MrBeast ឬលោក Jimmy Donaldson គឺជា Youtuber ដែលមានទ្រព្យសម្បត្តិជាង ៥០០ លានដុល្លារ នៅវ័យ ២៥ ឆ្នាំប៉ុណ្ណោះ ។  គាត់ធ្លាប់បង្ហោះវីដេអូជួយជនពិការកម្ពុជាក្នុងថ្ងៃទី ៧ ឧសភា ឆ្នាំ២០២៣ ។

តាមរយៈវីដេអូនោះ MrBeast បញ្ជាក់ថាខ្លួន បានបរិច្ចាគជើងសប្បនិម្មិតសម្រាប់ជនពិការកម្ពុជា ២,០០០ នាក់ ។ វីដេអូនេះទៀតសោត បានបង្ហាញពីស្រ្តីកម្ពុជា ២ នាក់ដែលបានទទួលអវយវៈសិប្បនិម្មិត ហើយបង្ហាញក្តីសង្ឃឹមថាពួកគេនឹងទទួលការអប់រំ និងការងារកាន់តែប្រសើរនាពេលអនាគត ។

កាលពីថ្ងៃអាទិត្យ ទី២៥ MrBeast បានបង្ហោះនៅក្នុងបណ្ដាញសង្គម Twitter ថា “ខ្ញុំត្រូវបានគេអញ្ជើញជិះយានជ្រមុជទឹក Titan តាំងពីដើមខែមកម្ល៉េះ តែខ្ញុំឆ្លើយថា ទេ ហើយវាគួរឲ្យខ្លាចណាស់ ប្រសិនបើខ្ញុំពិតជាមានវត្តមាននៅក្នុងយាននោះមែន” ។

គួររំលឹកថា អ្នកទាំង ៥ ដែលស្លាប់ក្នុងយានជ្រមុជទឹក Titan មានដូចជា ម្ចាស់យានផ្ទាល់តែម្ដងគឺលោក Stockton Rush មហាសេដ្ឋីអង់គ្លេស Hamish Harding មហាសេដ្ឋីប៉ាគីស្ថាន Shahzada Dawood រួមទាំងកូនប្រុស ១៩ ឆ្នាំ Suleman Dawood និងអ្នកជំនាញ Titanic ជនជាតិបារាំង Paul-Henri Nargeolet ។ ពួកគេសុទ្ធតែតម្រូវឲ្យទិញសំបុត្រតម្លៃ ២៥០,០០០ ដុល្លារ និងចុះហត្ថលេខាលើលើលិខិតស្ម័គ្រស្លាប់សិន មុនជិះយានរបស់ក្រុមហ៊ុន OceanGate ទៀតផង ៕

ប្រែសម្រួល៖ វារី

ប្រភព៖ dailymail

ចុចអាន៖ តាមការពិត អ្នកដំណើរត្រូវចុះហត្ថលេខាលើលិខិតស្ម័គ្រស្លាប់សិន មុនជិះយានរបស់ក្រុមហ៊ុន OceanGate