រឿង “The Little Mermaid” រកចំណូលបានជិត ៥០០ លានដុល្លារ ទោះរងការប្រកាន់ពូជសាសន៍

រឿង “The Little Mermaid” ឆ្នាំ ២០២៣ ដែលចាយលុយផលិតអស់ ២៥០ លានដុល្លារ ពេលនេះរកចំណូលបានដល់ទៅ ៤៩៩.៣ លានដុល្លារឯណោះ ។

វាពិតជាគួរឲ្យភ្ញាក់ផ្អើលដែលរឿងនេះអាចរកចំណូលច្រើនដល់ម្លឹង ព្រោះមានមហាជនមិនពេញចិត្តចំពោះបញ្ហាពូជសាសន៍តាំងពីស្គាល់តួអង្គដំបូងមកម្ល៉េះ ។

ក្នុងរឿង “The Little Mermaid” តួឯកស្រីគឺកញ្ញា Halle Bailey ជនជាតិអាមេរិក ប៉ុន្តែមានស្បែកខ្មៅ ធ្វើឲ្យមហាជនភាគច្រើនគិតថាមិនស័ក្ដិសមធ្វើជា Ariel ព្រោះព្រះនាងមច្ឆាក្នុងរឿងតុក្កតាគឺជាស្ត្រីស្បែកស សក់ក្រហម ផ្ទុយស្រឡះពី Halle ។

អ្នកខ្លះមានមតិយោបល់ថា មិនមែនពួកគេប្រកាន់ពូជសាសន៍ ឬពណ៌សម្បុរឡើយ ប៉ុន្តែគ្រប់គ្នាសុទ្ធតែដឹងថា ​Ariel មានស្បែកស និងសក់ក្រហម ហើយតួអង្គមនុស្សធ្វើឲ្យគាត់ខកចិត្តជាខ្លាំង ។ សូម្បីតួអង្គប្រុស និងតួអង្គផ្សេងៗក៏ត្រូវរងការរិះគន់យ៉ាងចាស់ដៃដែរ ។

យ៉ាងណាពេលនេះរឿង “The Little Mermaid” បានរកប្រាក់ចំណូលច្រើនជិតដល់ការរំពឹងទុកហើយ នៅសល់តែជាង ៤០ លានដុល្លារទៀតប៉ុណ្ណោះ ៕

ប្រែសម្រួល៖ វារី

ប្រភព៖ dailymail