ជីវិតកម្សាន្ដ
ម្ចាស់សំណើចខ្យល់បំពង់ស៊ីមុំាង នាយត្រង់ដឺ តស៊ូរហូតក្លាយជាតារាកំប្លែងល្បីប្រចាំប្រទេសកម្ពុជា
តារាកំប្លែងមានឈ្មោះដើម យិន បឿន ហៅ នាយត្រង់ដឺ ជាតារាមួយរូបមានឈ្មោះល្បីល្បាញនៅក្នុងប្រទេសកម្ពុជា នាសម័យសង្គមរាស្ត្រនិយម និងសម័យសាធារណរដ្ឋខ្មែរ។ ក្នុងចំណោមតារាកំប្លែងជាច្រើន នាយ ត្រង់ដឺ ជាសិល្បករកំប្លែងមួយដួងមានឈ្មោះល្បីល្បាញគួរឲ្យកត់សម្គាល់។ តារាកំប្លែងជំនាន់ដើម និងជាម្ចាស់សំណើចខ្យល់បំពង់ស៊ីមុំាង រូបនេះ មានរូបរាងស្គមកំព្រឹង កម្ពស់ខ្ពស់ល្មម មុខស្រួច បើឃើញល្មមៗ ក៏ចង់សើចដែរ។
ងាកមកចាប់អារម្មណ៍ពីប្រវត្តិខ្លះៗ របស់លោកតា យិន បឿន ហៅ នាយត្រង់ដឺ ដោយយោងតាម «ក្រុមព្រះសុរិយា» ដែលបានខិតខំស្រាវជ្រាវជាច្រើនឆ្នាំមកយ៉ាងលំបាក បានអះអាងថា នាយត្រង់ដឺ ជាតារាកំប្លែងពោរពេញដោយសមត្ថភាព និងមានបច្ចេកទេសផ្ទាល់ខ្លួនមួយ គឺសើចចេញខ្យល់។
នាយ ត្រង់ដឺ ឈ្មោះដើមហៅថា យិន បឿន កើតនៅឆ្នាំ ១៩៤២ មានស្រុកកំណើតនៅត្មាតពង ស្រុកសង្កែ ខេត្តបាត់ដំបង។ នាយ ត្រង់ដឺ មានប្រពន្ធម្នាក់ (មិនបានរៀបអាពាហ៍ពិពាហ៍) រស់នៅបាត់ដំបង ដោយទទួលបានកូនម្នាក់។ ភរិយានាយ ត្រង់ដឺ កាច និងប្រច័ណ្ឌពេក ក៏បានបែកគ្នាជាមួយលោកពីពេលនោះមក។ លោកតា យិន បឿន មានឪពុកឈ្មោះ យិន ឈន ជាអ្នកសិល្បៈដ៏ល្បី កើតនៅត្មាតពង ស្រុកសង្កែ ខេត្តបាត់ដំបង និងម្ដាយឈ្មោះ ឌុច បូ រស់នៅច្រាបក្រសាំង ស្រុកបាត់ដំបង ខេត្តបាត់ដំបង។ ក្រោយឪពុក នាយ ត្រង់ដឺ ទទួលមរណភាព ម្ដាយរបស់លោក ក៏ចូលធ្វើជាទាហាន។
តារាកំប្លែងស្គមកំព្រឹង នាយ ត្រង់ដឺ មានបងប្អូនបង្កើតចំនួន ៤ នាក់ (ស្រីម្នាក់)។ បច្ចុប្បន្នមានតែប្អូនប្រុសរបស់នាយ ត្រង់ដឺ ឈ្មោះ ត្រង់អង ម្នាក់ប៉ុណ្ណោះ នៅរស់រានមានជីវិត។ លោក យិន សុគន្ធ ហៅ ត្រង់អង មានឈ្មោះពីកំណើត ឈឿន ជាកូនទី ៤ និងជាប្អូនប្រុសពៅរបស់លោក ត្រង់ដឺ សព្វថ្ងៃមានអាយុជិត ៨០ ឆ្នាំ រស់នៅរដ្ឋកាលីហ្វ័រញ៉ា សហរដ្ឋអាមេរិក។ លោក ត្រង់អង ជាអតីតមន្ត្រីយោធាសម័យសាធារណរដ្ឋខ្មែរ និងជាប្អូនប្រុសតែម្នាក់គត់របស់លោក ត្រង់ដឺ ដែលនៅមានជីវិតដល់សព្វថ្ងៃ។
លោក យិន សុគន្ធ ហៅ ត្រង់អង ក៏ធ្លាប់ចូលរួមសម្ដែងក្នុងខ្សែភាពយន្តមួយចំនួន នៅទសវត្ស ៦០ និង ៧០ ដូចជារឿង «នាងកែវណាម៉ាក្បាលសេះ , រឿង ដំណើរផ្សងព្រេងរបស់ត្រង់ដឺ , រឿង កាត់កន្ទុយលាបកំបោរ និង រឿង កំពូលបុរសមុខពីរ»។ លោក យិន សុគន្ធ មានភ័ព្វវាសនាខ្ពស់ណាស់ បានរួចផុតពីការកាប់សម្លាប់ក្នុងរបបប្រល័យពូជសាសន៍ខ្មែរក្រហម ខណៈបងប្រុសរបស់លោក បានលាចាកលោកទាំងអយុត្តិធម៌ ក្នុងរបបឃោរឃៅនោះ ពីឆ្នាំ ១៩៧៥ ដល់ឆ្នាំ ១៩៧៩។
លោក យិន បឿន ឬ នាយ ត្រង់ដឺ ពុំបានសិក្សារៀនសូត្រច្រើនទេ ដោយសារសង្គ្រាម។ នាយ ត្រង់ដឺ បានឈប់រៀន ហើយធ្វើជាអ្នកចម្លងទូកនៅកំពង់ដស្ទឹងសង្កែ ក្នុងភូមិកំណើតរបស់លោក។
តារាកំប្លែងមុខស្រួច នាយ ត្រង់ដឺ នៅទសវត្សឆ្នាំ ៦០ បានចាប់ផ្ដើមជីវិតផ្សងព្រេង មករស់នៅរាជធានីភ្នំពេញ។ មកដល់ ភ្នំពេញភ្លាម ដោយសារមិនមានចំណេះជំនាញនឹងគេ លោកក៏ចាប់អាជីពជាអ្នកវាយសារាស្បែកជើងតាមហាងកាហ្វេ រោងភាពយន្ត និងរោងល្ខោននានា។ ក្រៅពីកិច្ចការនេះ លោកក៏បានឆ្លៀតពេលទៅធ្វើកម្មករសំណង់បន្ថែមទៀត ដើម្បីរកប្រាក់ចិញ្ចឹមជីវិត និងផ្គត់ផ្គង់គ្រួសារនៅឯស្រុក។ ជីវភាពនៅតែមិនប្រសើរ និងមិនអំណោយផលដល់ជីវិតរបស់លោក យិន បឿន ឡើយ ទើបលោកសុំលោកស្រី អ៊ុន វ៉ាង បម្រើការជាកូនឈ្នួលក្នុងវង្សល្ខោនរបស់លោកស្រី ក្នុងនាមជាអ្នករូតវាំងនន។
ជារៀងរាល់ថ្ងៃ លោក យិន បឿន តែងតែនិយាយលេងផ្ដោះផ្ដងជាមួយអ្នកល្ខោននានា ដែលធ្វើឲ្យគេផ្ទុះសំណើចគ្រប់ៗគ្នា។ លោកស្រី អ៊ុន វ៉ាង ឃើញហើយចាប់អារម្មណ៍ ក៏ហៅលោក យិន បឿន សាកល្បងសម្ដែងជាតួត្លុកសម្រាប់កំដរឆាក។ លោក យិន បឿន បានបំពេញតួនាទីនេះដោយជោគជ័យ ដែលមានការគាំទ្រយ៉ាងខ្លាំងពីមហាជន។ អ្នកស្រី អ៊ុន វ៉ាង ក៏បានដាក់នាមថ្មីជូនលោក ឲ្យសមនឹងនាទីជាអ្នកកំប្លែងថា «នាយ ត្រង់ដឺ»។ ជីវភាពរបស់ នាយ ត្រង់ដឺ កាន់តែល្អប្រសើរបន្តិច នាយ ក៏បានរៀបអាពាហ៍ពិពាហ៍ភរិយាថ្មី នៅឆ្នាំ ១៩៦៤ ជាមួយនារីរបាំ នៃវង្សល្ខោននោះ ដោយទទួលបានកូនចំនួន ៤ នាក់។
កំឡុងឆ្នាំ ១៩៦៣ នាយ ត្រង់ដឺ មានសំណាងបានទទួលតួនាទីជាតួកំប្លែងក្នុងខ្សែភាពយន្តតាមរយៈផលិតករល្បីៗ ជាច្រើន ដែលបានឃើញទេពកោសល្យ និងបច្ចេកទេសកំប្លែងរបស់លោកនៅក្នុងវង្សល្ខោន អ្នកស្រី អ៊ុន វ៉ាង។ ខ្សែភាពយន្តដំបូងៗរបស់លោក យិន បឿន ឬ នាយ ត្រង់ដឺ រួមមាន ៖ ១–រឿងគួរឲ្យចុកឈាម, ២–រឿងខ្យងសាំង ,៣–រឿងភរិយាពីរ ជាដើម…។
នៅឆ្នាំ ១៩៦៨ លោក ត្រង់ដឺ មានសំណាងដ៏វិសេសវិសាល ដោយបានចូលរួមសម្ដែងក្នុងខ្សែភាពយន្តរឿង «រស់ដោយសប្បាយ» ថ្វាយ សម្ដេចព្រះនរោត្តមសីហនុ។ ហើយក្នុងឆ្នាំ ១៩៦៩ លោក ត្រង់ដឺ ក៏បានចូលរួមបង្ហាញខ្លួនក្នុងឆាកមហោស្រពភាពយន្តជាតិលើកទី ១ ដែរ។ តាំងពីពេលនោះមក កិត្តិនាមរបស់លោកល្បីល្បាញរន្ទឺពេញប្រទេសកម្ពុជា ដែលធ្វើឲ្យមហាជនចូលចិត្ត និងចង់ទស្សនាការសម្ដែងរបស់លោកជាខ្លាំង។ គ្រានោះហើយដែលជីវភាពរបស់លោកកាន់តែរីកចម្រើនទៅៗ ដោយបានចាប់ផ្ដើមទិញផ្ទះវិឡាមួយខ្នង និងឡានមួយគ្រឿង សម្រាប់ប្រើប្រាស់។
នាយ ត្រង់ដឺ ចាប់ផ្ដើមសិក្សារកជំនាញថ្មីមួយទៀត ដោយសហការជាមួយមិត្តភ័ក្ដិជិតដិតរបស់លោក គឺ លោក កាត សំណាង ដើម្បីសាកល្បងដឹកនាំខ្សែភាពយន្ត។ ខ្សែភាពយន្តដំបូងដែលលោកបានដឹកនាំនោះ គឺ រឿង «ខ្ញុំសើច ហើយខ្ញុំយំ»។
នៅឆ្នាំ ១៩៧២ នាយ ត្រង់ដឺ មានលទ្ធភាពបើកផលិតកម្មផ្ទាល់ខ្លួនមួយ ដោយបានដាក់នាមថា «ត្រង់ដឺភាពយន្ត»។ ខ្សែភាពយន្តដំបូង នៃផលិតកម្ម «ត្រង់ដឺភាពយន្ត» របស់លោក យិន បឿន ជាស្នាដៃនិពន្ធ និងដឹកនាំដោយលោកផ្ទាល់ គឺ រឿង«ដៃដែក ៣២»។ កាលនោះ លោក យិន បឿន ស្នើសុំអញ្ជើញលោកស្រី ឌី សាវ៉េត សម្ដែងជាតួឯកជាមួយលោកក្នុងខ្សែភាពយន្តនេះតែម្ដង។
លោក យិន បឿន ហៅ នាយ ត្រង់ដឺ បានទទួលជោគជ័យជាហូរហែដូចជា«រឿងកាត់កន្ទុយលាបកំបោរ ,រឿងឪពុកក្មេករើសកូនប្រសា ,និងរឿងមាន់រងាវពីរដង បងទៅរកអូន»។ រយៈពេលជាង ១០ ឆ្នាំ ពីឆ្នាំ ១៩៦៣ ដល់ឆ្នាំ ១៩៧៥ លោក ត្រង់ដឺ បានសម្ដែងខ្សែភាពយន្តជាង ១០០ រឿង។ ក្នុងនោះ ក៏មានខ្សែភាពយន្តជិត ១០ រឿងដែរ ដែលលោកសម្ដែងជាតួឯកក្រៅពីផលិតកម្មរបស់លោកមានដូចជា «រឿងធនញ្ជ័យ ,រឿងសំគមបាញ់លលក ,រឿងកម្ជិលអាំងផេះ និងរឿងអាខ្វាក់អាខ្វិនជាដើម…»។
តារាកំប្លែង នាយ ត្រង់ដឺ ក៏បានបន្សល់ទុកមរតកមួយ ដោយលោកបានច្រៀងចម្រៀងដាក់បញ្ចូលក្នុងខ្សែភាពយន្ត ហើយចម្រៀងទាំងនោះបន្សល់ទុកដល់សព្វថ្ងៃដូចជា បទ«៣២ លក់គុយទាវ និងបទ ត្រង់ដឺ លក់ប្រហុក»។
នាយ ត្រង់ដឺ បានចូលរួមសម្ដែងស្ទើរគ្រប់ផលិតកម្មទាំងអស់ ដូចជា ផលិតកម្មរន្ទះពេជ្រភាពយន្ត របស់អ្នកស្រី លី ប៊ុនយីម ,ផលិតកម្មបក្សីឋានសួគ៌ភាពយន្តរបស់លោក អ៊ីវង្ស ហែម , ផលិតកម្ម ឥន្ទ្រិយទេពភាពយន្ត របស់លោក ពាវ ឆាយលាង ,ផលិតកម្មហិមពាន្តភាពយន្ត របស់អ្នកស្រី លី យូស្រាំង ,ផលិតកម្មព្រះខ័ន្ទពេជ្រភាពយន្ត របស់លោក លី វ៉ា ,ផលិតកម្មប្រាសាទមាសភាពយន្ត របស់លោក សារ៉ាវុទ្ធ ,ផលិតកម្មកងចក្រភាពយន្ត របស់លោក អ៊ួងកន្ធន់,ផលិតកម្ម វិស្ណុភាពយន្ត របស់លោក វាន់ វណ្ណៈ,ផលិតកម្មអប្សរាភាពយន្តរបស់លោកស្រី លី សុងហេង ,ផលិតកម្មសុវណ្ណគិរីភាពយន្ត របស់ ហ៊ុយ គឹង និងផលិតកម្មកងពេជ្រភាពយន្ត របស់លោក ឈា នុ ជាដើម…។
ចំពោះស្នាដៃរបស់ នាយ ត្រង់ដឺ បានចូលរួមសម្ដែងតួកំប្លែងក្នុងខ្សែភាពយន្តជាច្រើនដូចជា រឿង ចម្ប៉ាថោង(ឆ្នាំ ១៩៦៩) ,រឿងអាប៊ុលអាសេម (ឆ្នាំ១៩៦៩) ,រឿងចន្ទគ្រឹហ្វា (ឆ្នាំ ១៩៦៩) ,រឿងសំគមបាញ់លលក(ឆ្នាំ ១៩៧០) ,រឿងសុវណ្ណបញ្ចា(ឆ្នាំ ១៩៧០) ,រឿងរតនាវង្ស (ឆ្នាំ ១៩៧០) រឿងបញ្ចពណ៌ទេវី (ឆ្នាំ ១៩៧១) ,រឿងព្រះពាយផាត់ (ឆ្នាំ ១៩៧១) ,រឿងអនអើយស្រីអន(ឆ្នាំ ១៩៧២) ,រឿងអាលេវ(ឆ្នាំ១៩៧២) ,រឿងភក្តីស្នេហ៍(ឆ្នាំ ១៩៧៣) ,រឿងជ័យប្រាជ្ញ (ឆ្នាំ១៩៧៣) ,រឿងដៃដែក ៣២ (ឆ្នាំ ១៩៧៣) ,រឿងអាខ្វាក់អាខ្វិន (ឆ្នាំ ១៩៧៤), រឿងចៅចាក់ស្មុគ(ឆ្នាំ ១៩៧៤), រឿងមាន់រងាវពីរដង បងមករកអូន (ឆ្នាំ ១៩៧៤) ,រឿងពុះទ្រូងអូនទៅ(ឆ្នាំ ១៩៧៥) ជាដើម…។
ខ្សែភាពយន្តខ្មែរក្នុងឆ្នាំ ១៩៧៥ ស្ទើរតែគ្រប់រឿងទាំងអស់ ផលិតករភាពយន្តតែងតែបានដាក់បញ្ចូលបន្ថែមរសជាតិ ដោយបានបញ្ចូលឈុតឆាកកំប្លែងនានា ដើម្បីញាំងឲ្យខ្សែភាពយន្តទាំងនោះល្អប្រសើរ។ ក្នុងនោះ ទស្សនិកជនខ្មែររាប់លាននាក់ បានផ្ទុះសំណើច សើចក្អាកក្អាយ រីករាយ ដោយសារតែកាយវិការកំប្លែងរបស់តារាកំប្លែងនានា តាមរយៈពាក្យសំដី ទឹកមុខ និងកាយវិការរវើករបស់ពួកគាត់៕
អត្ថបទ ៖ ពិសី
រដ្ឋមន្ត្រីក្រសួងព័ត៌មាន បើកវេទិកាជួបម្ចាស់ស្ថានីយ វិទ្យុ និង ទូរទស្សន៍ ដើម្បីរកដំណោះស្រាយនៃដំណើរការប្រព័ន្ធផ្សព្វផ្សាយបុរាណ និងប្រព័ន្ធផ្សព្វផ្សាយទំនើប
ផ្ទេរខ្សែកតំណែងប្រធាន JCI Mekong ជូនអ្នកឧកញ៉ា គីម សុខអេង ក្រោមវត្តមានឯកឧត្តមឧបនាយករដ្ឋមន្រ្តី ហ៊ុន ម៉ានី
អាជ្ញាធរសង្កាត់ភ្លេីងឆេះរទេះ ដាក់គ្រឿងចក្រឈូសឆាយផ្លូវ២ខ្សែនិងរៀបចំដាក់ប្រព័ន្ធលូចាក់បេតុងឆ្អឹងដែក
លោក ហេង សួរ ទទួលជួបពិភាក្សាការងារជាមួយគណៈប្រតិភូនៃសហព័ន្ធសភាពាណិជ្ជកម្ម និងឧស្សាហកម្មខេត្តក្យង់គី នៃសាធារណរដ្ឋកូរ៉េ
រដ្ឋមន្ត្រីទេសចរណ៍ថា នឹងធ្វើឱ្យបរទេសចងចាំ និងមកលេងកម្ពុជាយ៉ាងហោចបានម្ដងក្នុងមួយជីវិត
សម្ដេចធិបតី ឯកភាពឱ្យតារាចម្រៀង ព្រាប សុវត្ថិ លាលែងចេញពីក្របខ័ណ្ឌកងយោធពលខេមរភូមិន្ទ ឋានន្តរសក្ដិ «វរសេនីយន៍ឯក»
តើគ្រូ និងកីឡាករសិង្ហបុរី និយាយអ្វីខ្លះពីការប្រកួតឈ្នះ កម្ពុជា យប់មិញ?
មជ្ឈមណ្ឌលអេដស៍ ស្នើទំព័រហ្វេសប៊ុក ឬវេទិការផ្សាយព័ត៍មានករណីជំងឺអេដស៍នៅខេត្តតាកែវលុបចេញជាបន្ទាន់
កម្ពុជា កំពុងឈរលេខ១ មានអ្នកគាំទ្រមើលផ្ទាល់ច្រើនបំផុត ពាន AFF Cup
អ៊ុយក្រែន បាញ់ ATACMS ចូលដីរុស្ស៊ីទៀត ខណៈអាមេរិក ព្រមានឲ្យទីក្រុងកៀវ ត្រៀមទទួលការសងសឹកវិញ
-
វប្បធម៌ ជំនឿ១ សប្តាហ៍ agoកត់ចំណាំ បើមានប្រជ្រុយនាំសំណាង៣កន្លែងលើរាងកាយ ដូចនាំកំណប់ទ្រព្យមកឲ្យដល់ផ្ទះ
-
ព័ត៌មានអន្ដរជាតិ១ សប្តាហ៍ agoក្រុមហ៊ុនអាមេរិក ប្រកាសដាក់លក់ថ្នាំចាក់ព្យាបាលជំងឺអេដស៍ក្នុងតម្លៃថោក នៅ១២០ប្រទេស
-
ព័ត៌មានជាតិ១ សប្តាហ៍ ago«ភូមិទៀមលើ» មានប្រវត្តិជូរចត់ កើតចេញពីចម្បាំងរវាងកុលសម្ព័ន្ធ និងកុលសម្ព័ន្ធជនជាតិដើមភាគតិចនៅក្នុងខេត្តរតនគិរី
-
ព័ត៌មានអន្ដរជាតិ២ ថ្ងៃ ago១១ខែ វៀតណាម រញ្ជួយដី ៤៥៨លើក
-
ព័ត៌មានអន្ដរជាតិ១ ថ្ងៃ agoគ្រូទាយល្បីឈ្មោះ២រូប សុទ្ធតែទាយរឿងដែលគ្មាននរណាចង់ឲ្យកើត នៅឆ្នាំក្រោយ
-
ជីវិតកម្សាន្ដ៤ ថ្ងៃ agoអ្នកនាង ខាត់ សុឃីម សោកស្តាយចំពោះមរណភាពតារាចម្រៀងប្រុសម្នាក់ គាំងបេះដូងស្លាប់ទាំងវ័យក្មេង
-
សន្តិសុខសង្គម៥ ថ្ងៃ agoUpdate៖ អ្នកកាសែតដែលត្រូវខ្មាន់កាំភ្លើងបាញ់ប្រហារនៅស្រុកជីក្រែង បានបាត់បង់ជីវិតហើយ ក្រោយបញ្ជូនដល់មន្ទីរពេទ្យជាង១ថ្ងៃ
-
ចរាចរណ៍២ ថ្ងៃ agoអ្នកជិះម៉ូតូ កង់ ឆ្លង់កាត់ចន្លោះសួនច្បារពុះចែកទ្រូងផ្លូវជាតិលេខ៣បង្កគ្រោះថ្នាក់ញឹកញាប់ដល់អ្នកដទៃ