Madonna ចំណេញប្រាក់រាប់លានដុល្លារ គ្រាន់តែលក់ផ្ទះដែលទិញតពី The Weeknd 

ម្ចាស់បទ Material Girl វ័យ ៦៤ ឆ្នាំ បានលក់វិមាននៅ Hidden Hills រដ្ឋកាលីហ្វ័រញ៉ា ដែលខ្លួនបានទិញពី The Weeknd ក្នុងឆ្នាំ ២០២១ ក្រោមតម្លៃ ២៣ លានដុល្លារ ។

ប្រាក់ចំណេញដែល Madonna ទទួលបាន មានចំនួនដល់ទៅ ៣.៧ លានដុល្លារឯណោះ ព្រោះដំបូងអ្នកស្រីចំណាយត្រឹមតែ ១៩.៣ លានដុល្លារប៉ុណ្ណោះដើម្បីទិញវា ។

ដើមឡើយ Madonna ដាក់លក់វិមានក្រោមតម្លៃ ២៦ លានដុល្លារ ក្រោយការចរចាទើបគាត់សម្រេចចិត្តលក់ចេញក្នុងតម្លៃ ២៣ លានដុល្លារ ជូនលោក Kim Hyoung-nyon ដែលជាមហាសេដ្ឋីកូរ៉េប្រាក់ពាន់លានដុល្លារតែម្ដង ។

គួរបញ្ជាក់ថា លោក Kim មានទ្រព្យសម្បត្តិ ១.៩៥ ពាន់លានដុល្លារ នៅអាយុ ៤៧ ឆ្នាំ​ គាត់គឺជាសហស្ថាបនិក និងជាអនុប្រធានប្រតិបត្តិនៃក្រុមហ៊ុន Dunamu ដែលជាក្រុមហ៊ុនប្រតិបត្តិការការផ្លាស់ប្តូររូបិយប័ណ្ណឌីជីថលដ៏លេចធ្លោរបស់ប្រទេសកូរ៉េខាងត្បូង ។

ចំណែកឯវិមាននោះមានផ្ទៃក្រឡា ១១៦១.២៨៨ ម៉ែត្រការ៉េ លាតសន្ធឹងលើផ្ទៃដី ១.២១ ហិចតា មានបន្ទប់គេង ៩ បន្ទប់ រួមជាមួយបន្ទប់ទឹក ១១ បន្ទប់ទៀតផង ។

លើសពីនេះ ក្នុងវិមានមានអាងហែលទឹកប្រៃ រោងភាពយន្ត បន្ទប់កញ្ចក់ដាក់ស្រា បណ្ណាល័យ និងបន្ទប់ភ្លេងស័ក្ដិសមនឹងតម្លៃជាង ២០ លានដុល្លារឥតទាស់ ៕

ប្រែសម្រួល៖ វារី

ប្រភព៖ dailymail

ចុចអាន៖ ទិដ្ឋភាពខាងក្នុងផ្ទះរបស់តារាអាមេរិក ដាក់ជួលក្រោមតម្លៃជិត ២ ម៉ឺនដុល្លារ

ចុចអាន៖ The Weeknd គ្រងតំណែងជាសិល្បករពេញនិយមបំផុតលើភពផែនដី