ប្រឈមរឿងបំណុលរាប់សិបម៉ឺនដុល្លារតែ រតន: ពិសី មានគោលជំហររឹងមាំដោះស្រាយ​រាល់គ្រប់បញ្ហា

មហាជនអ្នកគាំទ្របានដឹងថា ដោយសារតែកាអស់ភាពអត់ធ្មត់តារាចម្រៀង រតន: ពិសី កាលពីថ្មីៗកន្លងមកនេះ បានចាប់ផ្តើមទម្លាយមុខកូនបំណុលរបស់ខ្លួនជាបន្តបន្ទាប់ ដោយក្នុងនោះមានទាំងអ្នកនៅក្នុងចង្កោមសិល្ប:ទៀតផង។

ពាក់ព័ន្ធនឹងរឿងបំណុលរាប់សិបម៉ឺនដុល្លារដែលត្រូវគេជំពាក់នេះដែរតារាស្រី រតន: ពិសី បានចាត់ទុកថា ខ្លួនជាជន​រងគ្រោះ ព្រោះត្រូវប្រឈមមុខចេញសងជំនួសគេ(សងជំនួសកូនបំណុល) រតន: ពិសី កន្លងមក នាងតែងបង្ហើប​ពីបញ្ហាជួបរឿងពិបាកចិត្តព្រោះកូនតុងទីនបោកលើសេចក្តីទុកចិត្ត ដោយគេជំពាក់លុយរាប់សិបម៉ឺនដុល្លារ មិនព្រមសង។ ម្យ៉ាងទៀត​ជារឿយៗនាងបានព្រមានប្រើវិធានការផ្លូវច្បាប់ ដើម្បីដោះស្រាយចំពោះបុគ្គលទាំងនោះ។

ថ្វីត្បិតបញ្ហាបំណុលទាំងនេះកំពុងប្រឈម និងក្លាយជាបន្ទុកសម្រាប់នាង ក្នុងការចេញសងជំនួសកូន​បំណុលមួយ​ចំនួនយ៉ាងនេះក្តី។ ប៉ុន្តែតារាស្រីសិចស៊ី រតន: ក៏បានប្រកាសពីការពង្រឹងស្មារតីរឹងមាំដោះស្រាយរាល់គ្រប់បញ្ហា ដែលបាននិងកំពុងប្រឈមកើតឡើង នៅចំពោះមុខដោយភាពក្លាហាននឹងមានទំនូលខុសត្រូវខ្ពស់បំផុត។

កញ្ញា រតន: ពិសី បានបញ្ជាក់គោលជំហរបស់ខ្លួនថា “ខ្ញុំ នឹងឈរនៅទីនេះដោះស្រាយ​រាល់គ្រប់បញ្ហាជាមួយ​អ្នកទាំងអស់គ្នា មិនទៅណាទេ ! ខ្ញុំជឿជាក់លើភាពក្លាហានអំពើល្អនឹងភាពស្មោះ​ត្រង់របស់ខ្ញុំនឹងជួយខ្ញុំធ្វើឲ្យខ្ញុំរឹង​មាំនឹងបានអ្វីដែលបានបាត់បង់ទៅត្រលប់មកវិញក្នុងពេលឆាប់ៗ”។ កញ្ញាបានបន្ថែមថា កំហុសដ៏ធំ របស់ខ្ញុំគឺឆាប់​ជឿទុកចិត្ដគេពេក។

សូមជម្រាបដែរថា បន្ទាប់ការបង្ហាញមុខកូនបំណុលកញ្ញា រតន: ពិសី ក៏ធ្លាប់បានរម្លឹកដល់អ្នកលក់អនឡាញ ល្បីឈ្មោះ អឿន ម៉ូលីកា ដែលបច្ចុប្បន្នកំពុងជាប់ទោសនៅពន្ធនាគារដូច្នេះថាគ្រាន់តែ Mo Lika ម្នាក់ខ្ញុំអស់ជាង ១៨៤៥២០​ដុល្លារ តើអ្នកណាជួយខ្ញុំបានពេលនេះ? ខ្ញុំត្រូវសងគេដែរ។ ចំណែកក្រៅពីនេះក៏ត្រូវបាន ពិសី បញ្ចេញ​អត្តសញ្ញាណ​ជាបន្តបន្ទាប់ផងដែរ៕ អត្ថបទ ៖ ចាន់រ៉ា