បុគ្គលល្បីៗជាច្រើន ចង់ឱ្យអ្នកធ្វើទង្វើអសីលធម៌ ឈប់ហៅខ្លួនឯងថាតារា ព្រោះប៉ះពាល់តម្លៃតារាខ្មែរ

សាធារណជន រួមនឹងបុគ្កលល្បីៗក្នុងវិស័យសិល្បៈខ្មែរជាច្រើនរូប បានសម្តែងការមិនពេញចិត្ត នៅពេលដែលតម្លៃនៃអ្នកសិល្បៈខ្មែរ ធ្លាក់ចុះ ដោយសារតែបុគ្គលមួយចំនួន បានតាំងខ្លួនជាតារា បន្ទាប់ពីបុគ្គលនោះ ទទួលបានប្រជាប្រិយភាពពីការបង្ហាញទង្វើបំពុលសង្គម ក្នុងប្រព័ន្ធបណ្តាញទំនាក់ទំនងសង្គម ដូចជា Tik Tok និង Facebook ជាដើម។

តាមរយៈការបញ្ចេញមតិនៅ​លើបណ្តាញទំនាក់ទំនងសង្គមហ្វេសប៊ុក របស់សិល្បករ សិល្បការិនី និងបុគ្គលល្បីៗមួយចំនួន គឺបញ្ជាក់បានថា កំពុងសំដៅទៅលើកញ្ញា An Na Rose ដោយមានការផុស និងចែករំលែករូបភាពរបស់កញ្ញា អមដោយមតិមិនពេញចិត្ត ក៏ដូចជាណែនាំផងដែរ។ ការចេញមុខប្រតិកម្មនេះ គឺបន្ទាប់ពីយល់ឃើញថា បុគ្គលដែលតាំងខ្លួនជាតារារូបនេះ បានប្រព្រឹត្តទង្វើធ្វើឱ្យអាប់ឱនដល់តម្លៃសិល្បករ-សិល្បការិនីខ្មែរ។

ជុំវិញរឿងរ៉ាវខាងលើ សង្កេតឃើញមានការប្រតិកម្មធ្ងន់ៗពីលោក គួច ខេវិន ថា នៅក្នុងភាសាខ្មែរ ពាក្យថា «តារា» គឺគេសំដៅទៅលើផ្កាយដែលរះចិញ្ចែងចិញ្ចាចនៅលើមេឃា ដែលគេផ្តល់ពាក្យថាតារានេះ ទៅលើសិល្បករ សិល្បការិនីណា ដែលមានទេពកោសល្យ មានស្នាដៃឆ្នើម មានភាពល្បីល្បាញគ្មានអ្នកប្រៀប ប្រដូចបានទាំងលើការសម្តែង និងច្រៀងជាដើម។ លោកថា លោកចង់ឱ្យបុគ្គលដែលចូលចិត្តធ្វើរឿងមិនសមរម្យទាំងនោះ ឈប់ហៅខ្លួនឯងថាតារា និងប្រព្រឹត្តិ អំពើអសីលធម៌នាំឱ្យខូចពាក្យ “តារា” ក៏ដូចជាអាប់ឱនដល់តម្លៃនៃសិល្បៈវប្បធ៌មខ្មែរតទៅទៀត។

ទន្ទឹមនេះ លោក ខាំ ភូរិ អ្នកនិពន្ធ និងជាផលិតករល្បីឈ្មោះ ក៏បានបញ្ចេញមតិជុំវិញរឿងរ៉ាវនេះដែរថា “តម្លៃរបស់សិល្បករខ្មែរ បានធ្លាក់ចុះយ៉ាងងាយ​ នៅពេលម្ចាស់ផលិតផល​ អ្នករៀបចំកម្មវិធីទូរទស្សន៍នានា​ សារព័ត៌មានមួយចំនួន​ បានលេីកស្ទួយពួកបំពុលសង្គម​ ឱ្យក្លាយជាតារា​ និងក្លាយជាទីចាប់អារម្មណ៍របស់សង្គម” ។ លោកបន្ថែមថា សីលធម៌សង្គមកាន់តែធ្លាក់ចុះ នៅពេលយុវជនជំនាន់ក្រោយ​ បានឃេីញរឿងទាំងនេះញឹកញាប់ទៅៗ ហើយរូបលោកផ្ទាល់ ក៏បានប្លុកបណ្តាញសារព័ត៌មាន​ និងបុគ្គលដែលលោកយល់ថា ជាការបំពុលសង្គមនោះ ជាច្រើនមកហើយដែរ។

ដោយឡែក លោក ហេង ឡុង ប្រធានសមាគមមិត្តសិល្បៈស្ម័គ្រចិត្តជួយសង្គម ក៏បានបដិសេធមិនទទួលស្គាល់បុគ្គល​ទាំងឡាយណា ដែលប្រព្រឹត្តទង្វើប្រាសចាកសីលធម៌ ជាអ្នកសិល្បៈដែរ។ តាមរយៈសំណេរខ្លីមួយ នៅលើគណនីប្រព័ន្ធ​បណ្តាញ​ទំនាក់ទំនងសង្គម លោកសរសេរថា “បងប្អូន​ដែល​មានការងារពាក់ព័ន្ធនឹងសិល្បៈ ហើយប្រើប្រាស់បណ្ដាញសង្គមដោយគ្មានសីលធម៌ មិនចាត់ទុកថា ជាអ្នកសិល្បៈឡើយ!” ។

ជាមួយគ្នានេះ ក៏មានអ្នកសិល្បៈជើងចាស់និងថ្មីជាច្រើននាក់ បានចែករំលែក និងបញ្ចេញមតិឯកភាពជាមួយការលើកឡើងខាងលើផងដែរ។

គួររំលឹកដែរថា បន្ទាប់ពីកញ្ញា An Na Rose បានបង្ហាញទង្វើអសីលធម៌ ដោយការផុសរូបភាពជាមួយនឹងបុរសម្នាក់ ថាជាករណីដាក់ថ្នាំលើរូបនាង និងបានចេញមុខនិយាយមិនសមរម្យជុំវិញរឿងរ៉ាវនោះ ធ្វើឱ្យមហាជនមិនពេញចិត្តយ៉ាងខ្លាំង។ ក្រោយមក អ្នកសិល្បៈចាស់ថ្មី ក៏បានចេញមកប្រតិកម្មនឹងទង្វើរបស់កញ្ញាជាបន្តបន្ទាប់ រហូតមានជម្លោះទៅមក រវាងកញ្ញា និងអតីតតារាចម្រៀងល្បីមួយរូប គឺលោក ឃុំ ប៊ុណ្ណាដែត ៕ អត្ថបទ៖ សុធាវី