ស្គាល់មុខ​ម្ចាស់ហាង! នាយ ពែកមី ប្រកាសឲ្យចូលខ្លួនដោះស្រាយ

តារាកំប្លែងលោក ចែម ចាន់រ៉ា ហៅនាយពែកមីបានប្រកាសឲ្យម្ចាស់ហាងកែសម្ផស្សយីហោ អេស 88 ប៊ីយូធី ត្រូវចូលខ្លួន​មកធ្វើការដោះស្រាយជាមួយសមត្ថកិច្ចជុំវិញករណីភរិយារបស់លោក ដែលកំពុងតែសង្គ្រោះបន្ទាន់នៅមន្ទីពេទ្យកាល់ម៉ែត្រ។

ការប្រកាសរបស់តារាកំប្លែងនាយពែកមី បន្ទាប់ពីលោកបានស្គាល់អត្តសញ្ញាណនិងស្គាល់មុខរបស់ម្ចាស់ហាង។

តារាកំប្លែងរូបនេះបានបញ្ជាក់ថា “ស្គាល់មុខ​ម្ចាស់ហាងហេីយ​ កុំគេចវេស​មកដោះស្រាយជាមួយសមត្ថកិច្ចភ្លាម។តាមរយ:វីដេអូខ្លីដែលលោកបានសាកសួរអាការ:ភរិយាត្រូវបានភរិយាបញ្ជាក់ថា មានអាការ:មិនស្រួលតាំងពីនៅកន្លែងនោះ​ហើយក្រោយមកទៀតគាត់ក៏រកកល់​ក្អួត​ មាន​អាការៈ​ឈឺ​ដើម​ទ្រូង​។

ភរិយានាយពែកមី បានបន្ថែមថា បន្ទាប់​មក​គាត់ក៏​បានតេ​ទូរស័ព្ទទៅ​គ្លីនិកកែ​សម្ភស្ស​យីហោ អេស 88 ប៊ីយូធីប៉ុន្តែ​ខាងគ្លីនិក​គេមិន​លើក​ទូរស័ព្ទ​នោះទេ។ អ្វីដែលកាន់តែអាណិតទៀតនោះនាយ ពែកមី បញ្ជាក់ថា អាណិតកូន​សួររកម្តាយ​តែក្នុងបន្ទប់ ICU​ កំពុងសង្គ្រោះបន្ទាន់​មិនអាចចូលបានទេ។ ​អរគុណក្រុមគ្រូពេទ្យកាល់ម៉ែត្រ​ដែលយកចិត្តទុកដាក់ព្យាបាលប្រពន្ធលោក។

សូមបញ្ជាក់ថា កាលពីថ្មីៗអ្នកគាំទ្រនិងមហាជនមាន ការភ្ញាក់ផ្អើលបន្ទាប់ពីមានដំណឹងថាភរិយារបស់តារាកំប្លែងល្បីឈ្មោះ​គឺនាយ ពែកមី មានអាការ:ក្អួតនិងរាកធ្ងន់ធ្ងរក្រោយពេលទៅទទួលសេវាកម្មចាក់សេរ៉ូមខូលេជិនចាក់វីតាមីនឲ្យសាច់ស្អាតនៅក្នុងហាងកែសម្ផស្សយីហោ អេស 88 ប៊ីយូធីស្ថិតនៅម្តុំផ្សារថ្មី។

ប្រភពបានឲ្យដឹងថា ភរិយាតារាកំប្លែងនាយ ពែកមី បន្ទាប់មានអាការ:ធ្ងន់ធ្ងរបែបនេះក៏ត្រូវបានក្រុមគ្រួសារបញ្ជូនទៅសង្គ្រោះ​នៅមន្ទីពេទ្យកាល់ម៉ែត្រ ខណ:ទីតាំងហាងត្រូវបានសមត្ថកិច្ចចុះធ្វើកំណត់ហេតុបិទទីតាំងនោះបន្ទាប់ពី​រកឃេីញ​មិនមានអាជ្ញាបណ្ណ័ត្រឹមត្រូវ​និងបានធ្វេីឲ្យប្រពន្ធតារាកំម្លែងនាយ ពែកមី​ ចូលសង្គ្រោះបន្ទាន់ក្រោយទទួលសេវាកម្ម​ចាក់សេរ៉ូម​ខូលលេជិន​ចាក់វីតាមីនឲ្យសាច់ស្អាត។

តារាកំប្លែងនាយ ពែកមីបានប្រាប់កម្ពុជាថ្មី តាមទូរស័ព្ទនៅព្រឹកថ្ងៃទី ០៤ខែសីហាឆ្នាំ២០២៣នេះថា មកទល់ពេលនេះភរិយារបស់លោកកំពុងស្ថិតនៅក្នុងបន្ទប់ ICU (សង្គ្រោះបន្ទាន់)។

លោកបានបញ្ជាក់ថាភរិយាលោកត្រូវបានបញ្ជូនចូលសង្គ្រោះបន្ទាន់ នៅមន្ទីពេទ្យតាំងពីថ្ងៃទី០២ខែសីហាមកម្លេះ៕

អត្ថបទ៖ ចាន់រ៉ា