ជីវិតកម្សាន្ដ

ពែកមី បញ្ជាក់ថា បញ្ហារវាងគ្រួសារលោក និងម្ចាស់ហាង S 88 Beauty ដោះស្រាយបញ្ចប់រួចរាល់

បានផុស

២ years មុន

នៅ

ថ្ងៃអង្គារ ៨ សីហា ២០២៣

ដោយ

ជាថ្មីម្ដងទៀត តារាកំប្លែងនាយ ពែកមី ដែលមានឈ្មោះពិត ចែម ចាន់រ៉ា បានបញ្ជាក់ប្រាប់កម្ពុជាថ្មីតាមរយៈបណ្ដាញសង្គមតេឡេក្រាម កាលពីល្ងាចថ្ងៃទី ០៧ ខែសីហា ឆ្នាំ ២០២៣ ថា សម្រាប់រឿងរ៉ាវដែលបានកើតឡើងរវាងគ្រួសារលោក និងម្ចាស់ហាង S 88 Beauty ត្រូវបានដោះស្រាយបញ្ចប់រួចរាល់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយ ពែកមី បាននិយាយថា «ខ្ញុំ ជាមួយភាគីម្ចាស់ហាង S 88 Beauty គឺបានដោះស្រាយបញ្ចប់ជាមួយគ្នារួចរាល់ហើយ ដោយ ខ្ញុំ ព្រមទទួលយកសំណងដែលខាងភាគីម្ចាស់ហាង S 88 Beauty យល់ព្រមសងជំងឺមកខាងខ្ញុំ ហើយខ្ញុំក៏បានដកពាក្យបណ្ដឹងរួចហើយដែរ ពោលគឺបានន័យថា យើងបានដោះស្រាយបញ្ចប់ហើយ»។

ដោយឡែកពាក់ព័ន្ធនឹងសំនួរថា តើលោកទទួលបានសំណងជំងឺចិត្តប៉ុន្មាន? ត្រង់ចំណុចនេះ មិនទាន់ត្រូវបាន នាយ ពែកមី បញ្ជាក់ឲ្យដឹងនោះទេ។ យ៉ាងណាមិញ បើតាមការឲ្យដឹងពី នាយ ពែកមី មកដល់ពេលនេះ អាការជំងឺភរិយាលោកបានធូរស្រាលច្រើន និងត្រៀមចេញពីមន្ទីរពេទ្យក្នុងរយៈពេល ២ ឬ ៣ ថ្ងៃ ខាងមុខនេះ។ ភរិយារបស់តារាកំប្លែងល្បីឈ្មោះលោក ចែម ចាន់រ៉ា ហៅ នាយ ពែកមី កាលពីរសៀលថ្ងៃទី ០២ ខែសីហា ឆ្នាំ ២០២៣ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត បន្ទាប់ពីមានអាការធ្ងន់ធ្ងរ ក្រោយទទួលសេវាកម្មចាក់សេរ៉ូមខូឡាជិន ចាក់វីតាមីនឲ្យសាច់សស្អាត នៅក្នុងហាងកែសម្ផស្សយីហោ អេស 88 ប៊ីយូធី ម្តុំផ្សារថ្មី។

សូមបញ្ជាក់ថា ក្រសួងសុខាភិបាល កាលពីថ្ងៃទី ០៤ ខែសីហា ក៏បានចេញសេចក្ដីសម្រេចស្ដីពីការបិទ និងដកហូតសេចក្ដីសម្រេចឲ្យបើកមជ្ឈមណ្ឌលថែរក្សាសម្ផស្ស អេស ប៉ែតសិបប្រាំបី ប៊ីយូធី (S88 Beauty) និងសាខាទាំងអស់ផងដែរ៕

អត្ថបទ ៖ ចាន់រ៉ា