ជីវិតកម្សាន្ដ

វីជេ អាណូ រងសម្ពាធផ្លូវចិត្តខ្លាំង ប៉ងចាក់សម្លាប់ខ្លួន

បានផុស

២ years មុន

នៅ

ថ្ងៃចន្ទ ១៤ សីហា ២០២៣

ដោយ

មហាជនអ្នកគាំទ្របង្ហាញការភ្ញាក់ផ្អើល និងព្រួយបារម្ភគ្រប់គ្នា បន្ទាប់ពីអតីតតារាចម្រៀងអ្នកនាង សួន ភក្ដី ហៅ វីជេ អាណូ បានឡាយវីដេអូរៀបរាប់ពីទុក្ខសោកដែលនាងកំពុងតែជួបបញ្ហាផ្លូវចិត្តធ្ងន់ធ្ងរ។ ក្នុងនោះ វីជេ អាណូ ថែមទាំងមានកាំបិតនៅក្នុងដៃប៉ុនប៉ងចាក់សម្លាប់ខ្លួនឯងទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅលើគណនីហ្វេសប៊ុករបស់តារាភេទទី ៣ លោក ម៉ា ដូណា បានបង្ហោះភ្ជាប់រូបភាពតារាស្រីរូបនេះថា «គាត់ជាអ្នកសិល្បៈ គាត់ឈ្មោះ វីជេ អាណូ ឃើញគាត់ឡាយយកកាំបិតចាក់ខ្លួនឯង ផ្ដាំកូនៗ ឥឡូវគាត់យ៉ាងម៉េចហើយ មាននរណាដឹងទេជួយប្រាប់ផង តើគាត់មានសម្ពាធអ្វីខ្លះដែលដោះស្រាយមិនរួចដល់ថ្នាក់បែបនេះ ជួយ share រកដំណោះស្រាយឲ្យគាត់ផង»។

ដោយឡែកងាកទៅការឡាយរបស់ វីជេ អាណូ បាននិយាយទាំងទឹកភ្នែកថា នាងពេលនេះកំពុងជួបសម្ពាធផ្លូវចិត្តធ្ងន់ធ្ងរ ព្រោះតែមិនទទួលបានការផ្ដល់ឱកាសការងារ ដើម្បីរកលុយផ្គត់ផ្គង់ដល់ការសិក្សារបស់កូនៗ និងរងការមើលងាយពីសំណាក់បុគ្គលមួយចំនួនថែមទៀត។

វីជេ អាណូ និយាយទៀតថា «ខ្ញុំរងសម្ពាធ ខ្ញុំទៅមុខទៀតអត់រួចសោះ ខ្ញុំអត់សមធ្វើជាម្ដាយគេទេ ខ្ញុំពិបាកក្នុងខ្លួនខ្លាំងណាស់ ហេតុអ្វីខ្ញុំមកជួបរឿងបែបនេះ… ប៉ុន្មានថ្ងៃនេះខ្ញុំខំទៅរកការងារធ្វើ តែរងពាក្យមើលងាយថា មីហ្នឹងវាចេញមកទៀតហើយ ពេលមានបញ្ហាវារត់រកឲ្យគេជួយ.. ខ្ញុំខំប្រឹងដោយកម្លាំងខ្លួនឯងហើយគ្រាន់តែចង់រកស៊ីចិញ្ចឹមកូន ហេតុអ្វីក៏ខ្ញុំត្រូវរងពាក្យសម្ដីប្រមាថមើលងាយច្រើនយ៉ាងនេះ?»។

អ្នកនាងបន្តថា ហេតុអ្វីនាងត្រូវរងសម្ពាធដូច្នេះ ហើយចាំបាច់និយាយពាក្យអសុរោះហៅអញ ងែងៗទើបធ្វើឲ្យនាងទទួលយកមិនបានដែលដក់ជាប់នៅក្នុងខួរក្បាលតែម្ដង។ វីជេ អាណូ បញ្ជាក់ថា ព្រោះតែការរងនូវសម្ពាធផ្លូវចិត្តខ្លាំង ទើបបានជាលែងចង់រស់តទៅទៀត ខណៈនាងថា កន្លងមកខ្លួនធ្លាប់ប៉ងសម្លាប់ខ្លួន ២ ដង រួចមកហើយ ដោយការលេបថ្នាំ និងចង.ក ប៉ុន្តែអត់ស្លាប់។

ទាក់ទងនឹងដំណឹងដ៏ភ្ញាក់ផ្អើលខាងលើនេះ កម្ពុជាថ្មី មិនទាន់អាចស្វែងរកការសួរនាំបន្ថែមពី អ្នកនាង វីជេ អាណូ និងក្រុមគ្រួសារ បាននៅឡើយទេ ជុំវិញរឿងរ៉ាវខាងលើនេះ ខណៈមានមហាជន និងអ្នកសិល្បៈមួយចំនួន សម្ដែងការព្រួយបារម្ភ និងលើកទឹកចិត្តនាងផងដែរ៕

អត្ថបទ ៖ ចាន់រ៉ា