ឌីជេ សូដា ឆ្លើយតបនឹងមតិផ្លែផ្កាថា នាងស្លៀកពាក់សិចស៊ីពេក ទើបគេហ៊ានស្ទាបដើមទ្រូង

មួយថ្ងៃបន្ទាប់ពីការបង្ហោះរៀបរាប់អំពីការរំលោភបំពានកេរ្តិ៍ខ្មាសនៅឯមហោស្រពតន្ត្រី Osaka Music Circus 2023 នៅប្រទេសជប៉ុន កាលពីថ្ងៃទី១៣ ខែសីហា ឌីជេ សូដា បានចេញមុខឆ្លើយតបនឹងមតិផ្លែផ្កាមួយចំនួនដែលថា គេហ៊ានលូកស្ទាបដើមទ្រូងរបស់នាង មកពីនាងស្លៀកពាក់សិចស៊ីជ្រុលពេក។

ឌីជេវ័យ ៣៥ឆ្នាំ បានច្រានចោលមតិរិះគន់នាង ព្រមទាំងថ្កោលទោសអ្នកស្ទាបដើមទ្រូងរបស់នាងថាជាអំពើល្មើសច្បាប់ និងបៀតបៀនផ្លូវភេទមកលើរូបនាង ព្រោះមិនថានាងស្លៀកពាក់បែបណាឡើយ វាឥតពាក់ព័ន្ធនឹងបុគ្គលចង់បំពានគេនោះទេ។ តារាកូរ៉េខាងត្បូងរូបនេះបានបន្តបង្ហោះសារនៅលើ Instagram និង​បណ្ដាញ X ទៀតថា ទោះបីការស្លៀកពាក់ និងការតុបតែងខ្លួនរបស់នាងបែបណាក៏ដោយ ការបៀតបៀនផ្លូវភេទ និងការរំលោភបំពានកេរ្តិ៍ខ្មាសរបស់អ្នកដទៃ វាពិតជាមិនត្រឹមត្រូវនោះទេ។

ឌីជេ សូដា បញ្ជាក់បន្ថែមថា “ខ្ញុំស្លៀកសម្លៀកបំពាក់ដែលខ្ញុំចង់ស្លៀក ដើម្បីបំពេញចំណង់ចំណូលចិត្តរបស់ខ្ញុំ។ ពួកគេគ្មានសិទ្ធិប៉ះពាល់ខ្ញុំ ឬបៀតបៀនផ្លូវភេទខ្ញុំ ព្រោះតែខ្ញុំស្លៀកសម្លៀកបំពាក់សិចស៊ីឡើយ” ។ ជាមួយគ្នានោះ ឌីជេ សូដា បញ្ជាក់ថា អ្នកដែលបំពានកេរ្តិ៍ខ្មាសរបស់នាងមិនមែនមានតែបុរសនោះទេ ក៏មានមនុស្សស្រីផងដែរ ហើយនារីម្នាក់នោះបានស្ទាបដើមទ្រូងខាងស្ដាំនាងជាច្រើនលើកទៀតផង។

ពាក់ព័ន្ធករណីនេះ ក្រុមហ៊ុន TryHard Japan ដែលជាអ្នករៀបចំមហោស្រពតន្ត្រី Osaka Music Circus បានចេញសេចក្តីថ្លែងការណ៍មួយនៅលើបណ្ដាញ X ដោយចាត់ទុករឿងរ៉ាវកើតឡើងចំពោះ ឌីជេ សូដា ជាអំពើហិង្សាផ្លូវភេទ ហើយខ្លួននឹងចាត់វិធានការផ្លូវច្បាប់ចំពោះជនបង្ក៕

ប្រែសម្រួល៖ សន្យា

ចុចអាន៖ ឌីជេ សូដា ត្រូវគេបំពានកេរ្តិ៍ខ្មាស នៅឯមហោស្រពតន្ត្រី ប្រទេសជប៉ុន

ចុចអាន៖ Jennie សិចស៊ីអស់ដៃ ក្នុងយុទ្ធនាការផ្សព្វផ្សាយយីហោ CK