បង្ហោះ Instagram ម្ដងៗ Song Hye Kyo រកចំណូលបានខ្ទង់សែនដុល្លារ

ប្រឡូកសិល្បៈជាង ២០ឆ្នាំ តារាសម្ដែង Song Hye Kyo អតីតតួ ហាន់ ជីអ៊ុន បានក្លាយជាតារាស្រីលំដាប់ A ដែលទទួលបានប្រាក់ចំណូលខ្ពស់ជាងគេក្នុងចំណោមតារាសម្ដែងស្រីនៅក្នុងប្រទេសកូរ៉េខាងត្បូង ខណៈការផ្សាយពាណិជ្ជកម្មនៅលើបណ្ដាញសង្គមវិញ នាងក៏ទទួលបានកម្រៃខ្ទង់សែនដុល្លារផងដែរ។

យោងតាមប្រភពពី Hopper HQ តារាសម្ដែង Song Hye Kyo ទទួលបានចំណូលចំនួន ១សែនដុល្លារអាមេរិកសម្រាប់ការផ្សាយពាណិជ្ជកម្មនីមួយៗនៅលើ Instagram របស់នាង ដោយតួលេខនេះបាននាំឱ្យនាងជាប់នៅចំណាត់ថ្នាក់ទី ៩៣ ក្នុងបញ្ជីតារាស្រីរកចំណូលបានខ្ពស់បំផុតពីការបង្ហោះ IG របស់ពិភពលោក។

បច្ចុប្បន្នគណនី Instagram របស់អតីតតួឯកស្រីរឿង “បំណុលផ្ទះជំពាក់ស្នេហ៍” មានអ្នកតាមដាន ១៦.៨លាននាក់ ដែលកម្រិតនៃ Follower របស់នាង បានធ្វើឱ្យម្ចាស់ផលិតផល និងប្រេនលំដាប់ៗងាកមកចាប់អារម្មណ៍លើនាង រហូតហ៊ានឱ្យថ្លៃឈ្នួលដ៏ច្រើនសន្ធឹកសន្ធាប់ចំពោះការផ្សាយពាណិជ្ជកម្មនៅលើបណ្ដាញសង្គម។

មិនត្រឹមតែហ៊ានចំណាយប្រាក់ដ៏ច្រើនទៅលើថ្លៃផ្សាយពាណិជ្ជកម្មប៉ុណ្ណោះ ម៉ាកយីហាខ្លះបានជ្រើសរើសនាងជាទូតសឆន្ទៈរបស់គេទៀតផងដូចជា យីហោសម្រស់កូរ៉េ Sulwhasoo, ម៉ាកសម្លៀកបំពាក់កីឡា Sporty & Rich​ និងម៉ាកស្បែកជើង Suecomma Bonnie ជាដើម។ តារាស្រីវ័យ ៤១ឆ្នាំ ថែមទាំងបានបង្ហាញខ្លួននៅក្នុងយុទ្ធនាការផ្សាយពាណិជ្ជកម្មរបស់របស់ម៉ាក LG, Hyundai និង SK Telecom ផងដែរ។ នេះមិនទាន់រាប់បញ្ចូលនូវម៉ាកយីហោធំៗលំដាប់ពិភពលោកនៅឡើយ៕

ប្រែសម្រួល៖ សន្យ

ចុចអាន៖ ខ្សែភាពយន្ត Jennie សម្ដែងលើកដំបូង ប្រកាសលុបចោលវគ្គ២ ព្រោះខ្លឹមសារផ្លូវភេទ