ជីវិតកម្សាន្ដ

ថុល សុភិទិ សន្យាគ្មានលើកទី ២ ក្រោយធ្វើឲ្យគូស្នេហ៍អន់ចិត្តរឿងឱបថើបស្រីផ្សេង

បានផុស

១ year មុន

នៅ

ថ្ងៃពុធ ៣០ សីហា ២០២៣

ដោយ

តារាចម្រៀង លោក ថុល សុភិទិ បានចេញមកសុំទោស និងសន្យាមិនធ្វើឲ្យគូស្នេហ៍ខូចចិត្តជាលើកទី ២ ទៀតទេ ក្រោយបែកធ្លាយវីដេអូឱបថើបស្រីផ្សេង រហូតធ្វើឲ្យអ្នកនាង ឡុង ម៉ានីន អន់ចិត្ត ប្រកាសចង់ផ្ដាច់ទំនាក់ទំនងស្នេហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសំណេរដែលរៀបរាប់ភ្ជាប់រូបភាពផ្អែមល្ហែម លោក ថុល សុភិទិ បានបញ្ជាក់ឲ្យដឹងទាំងព្រឹកថ្ងៃទី ៣០ ខែសីហា នេះថា «បងដឹងថា អូនឈឺហើយ ដោយសារបងសន្យា តែធ្វើមិនបាន បងធ្វើដោយសារតួនាទី លើកក្រោយបងសុខចិត្តពិបាកខ្លួនឯង បងមិនឲ្យអូនខូចចិត្តលើកទី ២ ឡើយ កុំគិតច្រើនណាមនុស្សល្អរបស់បង ក្ដីស្រលាញ់របស់មនុស្សម្នាក់ៗ មិនមែនផ្អែមល្ហែមរហូតទេ វាតែងតែមានអាក្រក់ ល្អ ស ខ្មៅ គឺត្រូវតែមាន»។

តារាចម្រៀង សុភិទិ បាននិយាយស្នើចិត្តអ្នកគាំទ្រដែរថា «កុំធុញពួកខ្ញុំអ្វី ខ្ញុំដឹងថាមិនមែនតែពួកខ្ញុំទេដែលជួបបញ្ហាបែបនេះ គ្រាន់តែបញ្ហាវាកើតឡើងផ្សេងៗ គ្នា មនុស្សណាមិនចេះខុស មនុស្សណាដែលគ្រប់ដប់ គ្មានទេ ប៉ុន្តែអ្វីដែលសំខាន់គឺទទួលស្គាល់កំហុសខ្លួនឯង ខ្ញុំដឹងខ្ញុំអ្នកខុស ខ្ញុំមិនគោរព តាមការសន្យារបស់គាត់»។

ថុល សុភិទិ បាននិយាយបន្ថែមថា «ទោះជាយ៉ាងណា មិនថោកអ្វីហ្នឹងលួងមនុស្សខ្លួនឯងស្រលាញ់ទេ..វាគឺជាការផ្ដល់តម្លៃទៅឲ្យគាត់វិញទេ…»។ លោក ថុល សុភិទិ បញ្ជាក់ឲ្យដឹងតាមសារដោយខ្លីថា លោកផុសទាំងព្រឹកនេះក្រែងលោគូស្នេហ៍ឃើញសំណេរលោកហើយគាត់ត្រជាក់ចិត្តខ្លះ។

សូមជម្រាបថា កាលពីថ្ងៃម្សិលមិញមានការបង្ហោះចែករំលែកវីដេអូរបស់តារាចម្រៀងលោក ថុល សុភិទិ ក្នុងសកម្មភាពសម្ដែងឱបថើបកៀកកើយជាមួយនារីផ្សេងយ៉ាងផ្អែមល្ហែម ធ្វើឲ្យគូស្នេហ៍អ្នកនាង ឡុង ម៉ានីន កើតចិត្តប្រច័ណ្ឌ រហូតចេញសារជាបន្តបន្ទាប់ ដោយចង់ផ្ដាច់ស្នេហ៍ជាមួយលោក សុភិទិ៕

អត្ថបទ ៖ ចាន់រ៉ា