Oliva Kong ចាប់បានឱកាសតំណាងកម្ពុជា បង្ហាញម៉ូដនៅប្រទេសអ៊ីតាលី ស្វីស និងបារាំង

លោក ម៉ែន សីហា ហៅ Oliva Kong គឺជាអ្នកច្នៃម៉ូដ និងដើរម៉ូដដ៏ល្បីមួយរូបនៅកម្ពុជា។ នៅថ្ងៃទី ២៤ កញ្ញា ខាងមុខនេះ លោកនឹងចេញទៅសម្តែងដើរ និងបង្ហាញម៉ូដ នៅកម្មវិធី Milan Fashion Week នៅប្រទេសអ៊ីតាលី ស្វីស និងបារាំង។

ថ្លែងប្រាប់កម្ពុជាថ្មី លោក ម៉ែន សីហា ហៅ Oliva Kong បានឱ្យដឹងថា លោក នឹងតំណាងឱ្យកម្ពុជា ដើរបង្ហាញម៉ូដបើកកម្មវិធីនេះ ដោយមានការចូលរួមពីអ្នកច្នៃម៉ូដមកពីប្រទេសហ្វីលីពីន ឌូបៃ និងអឺរ៉ុបជាដើម។

បើតាមលោក Oliva Kong តាមរយៈកម្មវិធីនេះ នឹងបើកបង្ហាញទៅកាន់ពិភពលោកឱ្យបានស្គាល់ពីប្រទេសកម្ពុជា ជាពិសេសទៅលើស្នាដៃកូនខ្មែរ ផ្នែក Designer និង Fashion។

លោក នឹងបង្ហាញចំនួន ១៦ឈុត នៅក្នុងកម្មវិធីនេះផងដែរ ដោយរំលេចនូវភាពច្នៃប្រឌិតអំពីស្រ្តីខ្មែរកាលពី ១០០០ឆ្នាំមុន ផ្សារភ្ជាប់ជាមួយបច្ចុប្បន្ននេះ ដើម្បីឆ្លុះបញ្ចាំងពីសម័យកាលមួយទៅសម័យកាលមួយទៀត។

សូមបញ្ជាក់ថា លោក Oliva Kong ទើបតែទទួលបានពានរង្វាន់ Best international designer award 2023 ពីកម្មវិធី Fashion នៅប្រទេសវៀតណាម នាពេលថ្មីៗនេះ៕