តួ លី យ៉ុងចេ ពាក់ព័ន្ធរឿងក្ដីឆបោកអចលនទ្រព្យជាង ៦លានដុល្លារ

តារាសម្ដែង និងចម្រៀង Rain អតីតតួ លី យ៉ុងចេ កំពុង​ជាប់​ពាក់ព័ន្ធ​នឹង​ការ​ចោទ​ប្រកាន់​ពី​បទ​ឆបោក​អចលនទ្រព្យមួយកន្លែង ហើយត្រូវបានជនរងគ្រោះទាមទារសំណងជាប្រាក់ចំនួន ៨.៥ពាន់​លាន​វ៉ុន (ប្រហែល ៦.៣៥លាន​ដុល្លារអាមេរិក)។ នេះបើយោងតាមរបាយការណ៍ពី Money Today នៅថ្ងៃទី២៥ ខែកញ្ញា ឆ្នាំ២០២៣។

មេធាវីរបស់ជនរងគ្រោះ បានដាក់ពាក្យបណ្តឹងជាផ្លូវការប្រឆាំងនឹង លី យ៉ុងចេ នៅប៉ុស្តិ៍ប៉ូលិស Yongsan ក្នុងទីក្រុងសេអ៊ូល។ សេចក្តីថ្លែងការណ៍របស់មេធាវីចោទប្រកាន់ថា កាលពីខែឧសភា ឆ្នាំ២០២២ តារាសម្ដែង Rain បានបង្ហាញពីបំណងចង់ទិញអគារ និងដីដែលជាកម្មសិទ្ធិរបស់កូនក្ដីខ្លួន នៅតំបន់ Gyeonggi Hwaseong Namyang Newtown ។ ដើម្បីជួយសម្រួលដល់ប្រតិបត្តិការនេះ ជនរងគ្រោះបានផ្តល់តម្លៃលក់ ២៥ពាន់លានវ៉ុន (ប្រហែល ១៨.៧លានដុល្លារអាមេរិក)។ ក្រោយមក Rain បានស្នើសុំឱ្យជនងរងគ្រោះទិញផ្ទះរបស់ខ្លួននៅ Itaewon ទីក្រុងសេអ៊ូល ដើម្បីយកប្រាក់មកផ្គត់ផ្គង់កិច្ចព្រមព្រៀង ហើយជនរងគ្រោះបានទទួលយកសំណើដោយគ្មានបញ្ហា។

ជនរងគ្រោះបានយល់ព្រមទិញផ្ទះរបស់ Rain ក្នុងតម្លៃ ៨.៥ពាន់លានវ៉ុន ប៉ុន្តែខ្លួនមិនធ្លាប់ទៅដល់ផ្ទះដោយផ្ទាល់ឡើយ បានត្រឹមតែឃើញរូបថតប៉ុណ្ណោះ។ ក្រោយមកសូម្បីរូបថតដែលទទួលបាន ក៏ខុសគ្នាពីកិច្ចសន្យាដែរ ពោលជារូបថតក្លែងក្លាយ ដូច្នេះទើបបានជាជនរងគ្រោះ ដាក់ពាក្យបណ្តឹងករណីបោកបញ្ឆោតក្នុងការទិញអចលនទ្រព្យ ដែលនាំឱ្យបាត់បង់ប្រាក់ ៨.៥ពាន់លានវ៉ុន។

ទាក់ទងនឹងការចោទប្រកាន់​នេះ ក្រុមហ៊ុន​របស់ Rain បាន​ឆ្លើយ​តប​ទៅ​កាន់ Money Today ដោយ​បង្ហាញ​ថា ពួក​គេ​មិន​ទាន់​ទទួល​បាន​ពាក្យ​បណ្តឹង​ជា​ផ្លូវ​ការ​នៅ​ឡើយ​ទេ។ ជាមួយគ្នានោះ ក្រុមហ៊ុនរបស់ Rain ធ្វើការច្រានចោលការចោទ​ប្រកាន់​ថា ​ជា​រឿង​មិន​ពិត។ ដោយឡែកមេធាវីជនរងគ្រោះ អះអាងថា ខាងខ្លួនមានគម្រោងបញ្ចេញភស្តុតាងបន្ថែមទៀត ដើម្បីប្រឆាំងទៅនឹងក្រុមហ៊ុនរបស់ Rain ៕

ប្រែសម្រួល៖ សន្យា

ចុចអាន៖ Rosé បង្ហោះសារចុងក្រោយ អ្នកគាំទ្របារម្ភអនាគត​របស់ BLACKPINK កាន់តែមិនច្បាស់ការ