កូនស្រីច្បងតារាហុងកុង Adam Cheng ធ្វើអត្តឃាត តែរកឪពុករៀបចំបុណ្យសពមិនឃើញ

អ្នកស្រី Cheng On-yee កូនស្រីច្បងរបស់តារាសម្ដែងហុងកុងជើងចាស់លោក Adam Cheng បានទទួលមរណភាពដោយសារការធ្វើអត្តឃាត នៅសហរដ្ឋអាមេរិក កាលពីថ្ងៃទី៣០ ខែកញ្ញា កន្លងទៅ​ ប៉ុន្តែគេមិនអាចទាក់ទងឪពុកសពមកធ្វើបុណ្យបានឡើយ។

បើយោងតាមការចុះផ្សាយរបស់កាសែតហុងកុង HK01 កាលពីថ្ងៃទី១ ខែតុលា ព្រះវិហារដែលសពធ្លាប់ចូលរួមថ្វាយបង្គំ បាននិងកំពុងព្យាយាមទាក់ទងទៅលោក Adam ដើម្បីជួយដោះស្រាយការរៀបចំពិធីបុណ្យសព តែទាក់ទងមិនបានទាល់តែសោះ។ ជាមួយគ្នានោះ សារព័ត៌មានហុងកុង AS1 Entertainment បានរាយការណ៍ដែរថា ពួកគេបានព្យាយាមទាក់ទង Adam តាមរយៈទូរសព្ទ ប៉ុន្តែគាត់មិនឆ្លើយតបនោះទេ។

ប្រភពពី HK01 បានឱ្យដឹងថា អ្នកស្រី Cheng On-yee មិនមែនជាកូនស្រីពេញច្បាប់របស់តារាសម្ដែងវ័យ ៧៦ឆ្នាំរូបនេះឡើយ ពោលនាងជាកូនស្រីដែលលោកមានជាមួយអតីតមិត្តស្រី ហើយបច្ចុប្បន្នភរិយារបស់លោកគឺតារាសម្តែងតៃវ៉ាន់ Koon Jing-wah ។ ថ្វីត្បិតរស់នៅបែកគ្នា ប៉ុន្តែកន្លងមក Adam ធ្លាប់ផ្ដល់ប្រាក់ឧបត្ថម្ភដល់ On-yee ឱ្យសិក្សានៅមហាវិទ្យាល័យផងដែរ។

ចំពោះការធ្វើអត្តឃាតរបស់ Cheng On-yee មិនត្រូវបាននរណាទម្លាយមូលហេតុនៅឡើយ គេគ្រាន់តែដឹងថា នាងដេកស្លាប់បាត់ទៅហើយ នៅពេលប៉ូលិសទម្លុះចូលផ្ទះ។ ដោយឡែកទំនាក់ទំនងនាងជាមួយឪពុក មិនមានភាពស្និទ្ធស្នាលនឹងគ្នានោះទេ នាងបែកពីគាត់តាំងពីអាយុ ៣ឆ្នាំ ហើយទើបតែបានជួបគ្នាកាលពីប៉ុន្មានឆ្នាំ ក្រោយការសម្ដែងមួយនៅ Las Vegas ៕

ប្រែសម្រួល៖ សន្យា

ចុចអាន៖ Jungkook និង Zayn Malik ទំនងសហការគ្នាក្នុងបទចម្រៀងថ្មី