អតីតស្វាមី សាន់ ឆាយ បង្ហាញចេតនាចង់វិលរកភរិយា ខណៈនាងកំពុងនៅជាមួយស្វាមីទី២

រឿង​រ៉ាវស្នេហា​រវាង​តារា​សម្ដែង និង​ពិធីការិនី​តៃវ៉ាន់ សាន់ ឆាយ (Barbie Hsu) ជាមួយ​អតីត​ស្វាមី​ចិន Wang Xiaofei ហាក់​មិន​ទាន់​ចប់​ទេ ក្រោយអតីតស្វាមីរូបនេះបង្ហាញចេតនាចង់ផ្សះផ្សារគ្នាជាមួយអតីតភរិយាជាថ្មីឡើងវិញ។

តួ សាន់ ឆាយ បានរៀបការជាមួយស្នេហាចាស់របស់នាង គឺតារាចម្រៀងកូរ៉េខាងត្បូង Koo Jun-yup (DJ Koo) នៅខែមីនា ឆ្នាំ២០២២ ត្រឹមតែប៉ុន្មានខែបន្ទាប់ពីនាង និងអ្នកជំនួញ Xiaofei បានប្រកាសពីការចែកផ្លូវគ្នា នៅក្នុងខែវិច្ឆិកា ឆ្នាំ២០២១ ដែលមូលហេតុគឺបញ្ហានយោបាយរវាងចិន និងតៃវ៉ាន់។

យោងតាមប្រព័ន្ធផ្សព្វផ្សាយតៃវ៉ាន់ នៅក្នុងការផ្សាយផ្ទាល់ជាមួយផតឃែស្ថចិន Guan Lixin នៅព្រឹកថ្ងៃទី៩ ខែតុលា ឆ្នាំ២០២៣ សេដ្ឋី Xiaofei បានបង្ហាញអារម្មណ៍អាឡោះអាល័យរបស់លោកចំពោះ សាន់ ឆាយ ថា លោកនៅតែស្រឡាញ់អតីតភរិយា ហើយលោកអាចរៀបការជាមួយយនាងម្ដងទៀត បើសិនស្វាមីក្រោយចាកចេញពីតៃវ៉ាន់។

បន្ថែមពីលើពាក្យេពេចន៍ត្រង់ៗឥតក្រែងចិត្តស្វាមីថ្មី លោក Xiaofei ស៊កសៀតទៀតថា DJ Koo រស់​នៅ​​ទីក្រុង តៃប៉ិ មិនបានយូរទេ គាត់​ប្រាដកជា​រត់​ចេញ​មិនខាន។ អតីតស្វាមីដែលធ្លាប់រួមរស់ជាមួយគ្នា ១០ឆ្នាំ ថែមទាំងនិយាយដោយក្ដីបារម្ភថា សាន់ ឆាយ មាន​សុខភាព​ខ្សោយ នាងត្រូវការការមើលថែយ៉ាងល្អ ហើយមិន​ថានាងទៅ​យ៉ាង​ណា​ទេ នាង​ជា​អតីតភរិយា​របស់​លោក ដូច្នេះ​លោក​មិន​បោះបង់​នាង​ចោល​ឡើយ។

បុរសវ័យ ៤២ឆ្នាំ បញ្ចប់ប្រយោគថា ប្រសិនលោករៀបការម្ដងទៀតជាមួយ សាន់ ឆាយ ក៏ពុំមែនជារឿងអាក្រក់អ្វីដែរ៕

ប្រែសម្រួល៖ សន្យា

ចុចអាន៖ ស្ថានភាពជីវិត សាន់ ឆាយ តួឯកស្រីរឿង F4 តៃវ៉ាន់ ក្រោយចប់ការចាក់ផ្សាយ ២២ឆ្នាំ

ចុចអាន៖ សិស្សកូរ៉េវ័យ ១៦ឆ្នាំ ត្រូវប៉ូលិសចាប់ខ្លួន ក្រោយរំលោភក្មេងស្រី​ ៣នាក់