ជីវិតកម្សាន្ដ

សឿ សុធារ៉ា ជ្រះថ្លាចិត្តរាប់បាត្រព្រះសង្ឃ ១០០ អង្គ ឧទ្ទិសបុណ្យកុសលដល់ម្ចាស់កម្មពៀរ

បានផុស

១១ ខែ មុន

នៅ

ថ្ងៃអង្គារ ១៧ តុលា ២០២៣

ដោយ

កាលពីថ្មីៗនេះ មហាជនបានដឹងហើយថា តារាសម្តែងអ្នកនាង សឿ សុធារ៉ា បានប្រកាសសម្រេចកោរសក់ចូលសាងផ្នួសរយៈពេលកន្លះខែ ដោយភាពស្ងប់សុខជូនម្តាយ និងឧទ្ទិសបុណ្យកុសលទាំងអស់ដល់ម្ចាស់កម្មពៀរ មិនថាជាតិមុន ជាតិនេះ ឬក៏ជាតិណាក្តី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមគ្នានេះដែរ សឿ សុធារ៉ា បានបញ្ជាក់ថា កំឡុងនេះ នាងបានធ្វើចិត្តដោយជ្រះថ្លាតាមរយៈការរាប់បាត្រព្រះសង្ឃចំនួន ១០០ អង្គ ដើម្បីឧទ្ទិសបុណ្យកុសលនោះដល់ម្ចាស់កម្មពៀរវេរា ក្នុងភពផែនដីនេះដោយស្មោះត្រង់។ អ្នកនាង សឿ សុធារ៉ា លើកឡើងថា «ម្សិលមិញ នាងខ្ញុំ រាប់បាត្រព្រះសង្ឃនៅវត្តវិហារបិទមាស ចំនួន ១០០ អង្គ ខ្ញុំសុំឧទ្ទិសបុណ្យទាំងអស់នេះដល់ម្ចាស់កម្មពៀរវេរាទាំងអស់ មិនថាជាតិមុន ជាតិនេះ ឬក៏ជាតិណានោះឡើយ»។

តារាសម្តែងអ្នកនាង សឿ សុធារ៉ា និយាយបន្តថា «ខ្ញុំសូមឧទ្ទិសដល់គ្រប់វិញ្ញាណក្ខន្ធដែលនៅវិលៗក្នុងភពផែនដីនេះដោយស្មោះត្រង់ សូមបងប្អូនទាំងអស់គ្នាកុំបីអភ័ព្វដូចនាងខ្ញុំគ្រប់ៗជាតិ»។

ប្រាកដណាស់ក្នុងពិធីបុណ្យភ្ជុំបិណ្ឌថ្មីៗនេះ នៅលើបណ្ដាញសង្គមហ្វេសប៊ុករបស់ សឿ សុធារ៉ា ក៏បានសម្រេចបួសជាដូនជីរយៈពេលកន្លះខែដោយភាពស្ងប់សុខ ដើម្បីឧទ្ទិសដល់គ្រប់វិញ្ញាណក្ខន្ធដែលឋិតក្នុងភពផែនដីនេះ ពិសេសដួងវិញ្ញាណក្ខន្ធម្តាយរបស់នាងតែម្ដង។ តាមរយៈនេះឃើញមានអ្នកគាំទ្រជាច្រើនបានលើកទឹកចិត្ត និងសរសើរសម្រាប់ទឹកចិត្តរបស់ សឿសុធារ៉ា ដែលមានសទ្ធាក្នុងព្រះពុទ្ធសាសនាបួសជាដូនជី។

គួរជម្រាបថា កន្លងទៅ អ្នកគាំទ្រសង្កេតឃើញស្ថានភាពផ្លូវចិត្តរបស់តារាសម្តែងអ្នកនាង សឿ សុធារ៉ា បានជួបរឿងរ៉ាវចាក់ស្រេះជាច្រើន រហូតធ្វើឲ្យកើតវិបត្តិផ្លូវចិត្តធ្ងន់ធ្ងរ ពោលចាប់តាំងពីធ្លាយដំណឹងជំពាក់បំណុលរឿងលេងតុងទីន និងក្រោយមកទៀតដំណឹងបែកបាក់ស្វាមី ខណៈថ្មីៗនេះ អ្នកម្តាយក៏បានចែកឋានទៅចោល។ បន្ទាប់ពីធ្លាក់ខ្លួនកម្សត់បែបនេះ តារាស្រី សឿ សុធារ៉ា នាងតែងបង្ហាញអារម្មណ៍សោកសៅមិនសប្បាយចិត្តដល់ថ្នាក់ធ្លាក់ខ្លួនឈឺត្រូវចូលសង្គ្រោះនៅមន្ទីរពេទ្យទាំងយប់កាលពីប៉ុន្មានខែមុន។ យ៉ាងណាមិញ ក្រោយអាការជំងឺជាសះស្បើយមួយរយៈខ្លីនេះដែរ សឿ សុធារ៉ា ក៏ចាប់ផ្ដើមសាងជីវិតថ្មី ដើម្បីរស់នៅផ្តល់ក្តីសង្ឃឹមចំពោះកូនៗទាំងពីរ៕

អត្ថបទ ៖ ចាន់រ៉ា