តារាចម្រៀងគូស្នេហ៍ដ៏ល្បីកម្ពុជា បានជួបថ្នាក់ដឹកនាំក្រសួងវប្បធម៌ ពីដំណើរការថតបទចម្រៀងរបស់ខ្លួនហើយ

នៅថ្ងៃទី២០ ខែតុលា ឆ្នាំ២០២៣ អ្នកនាង ទេព បូព្រឹក្ស បានចូលជួបប្រជុំជាមួយថ្នាក់ដឹកនាំក្រសួងវប្បធម៌ និង វិចិត្រសិល្បៈ អំពីដំណើរនៃការថតបទចម្រៀងរបស់ខ្លួនហើយ បន្ទាប់ពីបានប្រកាសជាសាធារណៈ កាលពីថ្ងៃទី២៦ ខែកញ្ញា ថា “បើសិនជាផ្តល់ឱកាសឱ្យខ្ញុំបានថត MV បទទេវរាជ និង មហានគរ នៅប្រាសាទអង្គវត្តបាន ពួកខ្ញុំនឹងមិនធ្វើឱ្យ អ្នកទាំងអស់គ្នា ខកបំណងឡើយ” ។

តាមរយៈសំណេរនៅលើបណ្តាញទំនាក់ទំនងសង្គមរបស់ តារាចម្រៀងស្រីដ៏ល្បីរបស់កម្ពុជា កាលពីយប់មិញនេះ បានរៀបរាប់ថា “ថ្ងៃនេះនាងខ្ញុំ និង ដេវីត មានកិត្តិយសបានចូលជួបប្រជុំជាមួយថ្នាក់ដឹងនាំក្រសួងវប្បធម៌ និង វិចិត្រសិល្បៈ អំពីដំណើរនៃការថតបទ ទេវរាជ និង មហានគរ សង្ឃឹមថានឹងមានដំណឹងល្អសម្រាប់បងប្អូនទាំងអស់គ្នា ”។

បើទោះបីជាមិនទាន់មានការបញ្ជាក់ច្បាស់លាស់ ជុំវិញការថតMV បទ «ទេវរាជ និង មហានគរ» នៅទីតាំង ប្រាសាទអង្គរ ប៉ុន្តែតារាចម្រៀងគូស្នេហ៍ដ៏ល្បីមួយគូនេះ បានបញ្ចេញសកម្មភាព ក្នុងការរក្សាជំហររបស់ខ្លួន ផលិតMV បទទាំង២ ដែលសុទ្ធសឹងជាបទដ៏មានអត្ថន័យជ្រាលជ្រៅ ពីកម្ពុជា ។
ជុំវិញការចូលជួបប្រជុំ ជាមួយថ្នាក់ដឹកនាំក្រសួងវប្បធម៌ និង វិចិត្រសិល្បៈ កាលពីម្សិលមិញនេះ អាចចាត់ទុកថា ជាការបោះជំហានមួយទៀត ក្នុងដំណើរការស្នើសុំថតបទចម្រៀងទាំងពីរនេះ ហើយក៏ទទួលបានការអបអរសាទរយ៉ាងខ្លាំងមហាជន។

គួររំលឹកថា បន្ទាប់ពីតារាចម្រៀងស្រីរូបនេះ បានផ្សព្វផ្សាយពីបំណងចង់ថត MV បទចម្រៀងរបស់ខ្លួន និងលោក ជី ដេវីដ កាលពីពេលកន្លងទៅ គឺទទួលបានការគាំទ្រយ៉ាងពេញទំហឹង ពីសាធារណជន និងបុគ្គលល្បីៗជាច្រើន ដោយអ្នកគាំទ្រមួយចំនួនយល់ឃើញថា បទទាំងពីរ មានអត្ថន័យជ្រាលជ្រៅខ្លាំង ដែលបង្ហាញពីមោទនភាពប្រទេសជាតិ ហេតុនេះ ពួកគាត់គាំទ្រពេញទំហឹង នូវការផលិតបទនេះ នៅទីតាំងប្រវត្តិសាស្ត្ររបស់កម្ពុជា៕