ក្រសួងវប្បធម៌ចាត់ទុកការដកមេប៉ុស្តិ៍នៅខេត្តក្រចេះ ជាការគាំទ្រក្រុមសិល្បៈល្ខោនបាសាក់ និងគំរូដល់ខេត្តដទៃទៀត

ក្រសួងវប្បធម៌និងវិចិត្រសិល្ប: បានចេញលិខិតបញ្ជាក់ថា ក្រុមសិល្បៈល្ខោនបាសាក់របស់នាយប្រិមប្រិយស្រីម៉ៅ គឺមានការទទួលស្គាល់ពីមន្ទីរវប្បធម៌ខេត្តត្បូងឃ្មុំ។ មិនតែប៉ុណ្ណោះក្រសួងចាត់ទុកការចាត់វិធានកាលើមេប៉ុស្តិ៍ឃុំស្រែចានៅស្រុកស្នូល ខេត្តក្រចេះ គឺជាការគាំទ្រក្រុមសិល្បៈល្ខោនបាសាក់នាយប្រិមប្រិយ។

នៅក្នុងលិខិតរបស់ក្រសួងវប្បធម៌និងវិចិត្រសិល្ប: កាលពីយប់ថ្ងៃទី២៣ ខែវិច្ឆិកា ឆ្នាំ២០២៣ បានលើកឡើដោយថ្លែងអំណរគុណចំពោះចំណាត់ការរបស់លោកអភិបាលនៃគណៈអភិបាលខេត្តក្រចេះ លោកស្នងការនគរបាលខេត្តក្រចេះ ព្រមទាំងសមត្ថកិច្ចនគរបាលពាក់ព័ន្ធដែលបានជ្រោមជ្រែងចាត់វិធានការគាំទ្រ ក្រុមសិល្បៈល្ខោនបាសាក់នាយប្រិមប្រិយស្រីម៉ៅ។

លិខិតដដែលបានឲ្យដឹងទៀតថា ក្រុមសិល្បៈល្ខោនបាសាក់របស់នាយប្រិមប្រិយស្រីម៉ៅបានបង្កើតឡើងជាផ្លូវការនៅឆ្នាំ២០១៥ ជាក្រុមដែលមានអាសយដ្ឋានច្បាស់លាស់ និងមានមានការទទួលស្គាល់ពីមន្ទីរវប្បធម៌ខេត្តត្បូងឃ្មុំ។ មកដល់ពេលបច្ចុប្បន្ន គឺក្រុមសិល្ប:នេះបាននឹងកំពុងផ្តល់សេវាកម្មជាផ្ទាំងទស្សនីយភាពល្ខោនបាសាក់នៅតាមបណ្តាខេត្តក្រុងនានា។

ក្រសួងបានលើកឡើងថា ចំពោះចំណាត់ការនេះ សបញ្ជាក់ឲ្យឃើញពីការគាំទ្ររបស់ថ្នាក់ដឹកនាំខេត្តចំពោះសកម្មភាពសម្តែងសិល្ប:ទស្សនីភាពដែលជាផ្នែកមួយដ៏មានសារ:សំខាន់នៃប្រពៃណីវប្បធម៌ជាតិដែលរាជរដ្ឋាភិបាលតែងផ្តល់ការគាំទ្រ។

វិធានការនេះក៏ជាគំរូល្អក្នុងការសហការគាំទ្រសម្រាប់បណ្តាខេត្តផ្សេងៗទៀតក្នុងកាចូលរួមបង្កលក្ខណ:ងាយស្រួលដល់ក្រុមសម្តែងសិល្ប:មហាជនក៏ដូចជាក្រុមសម្តែងសិល្ប:ថ្នាក់ជាតិក្នុងការរៀបចំសម្តែងនៅតាមទីសាធារណ:នានាទូទាំងប្រទេស។

សូមបញ្ជាក់ថា បន្ទាប់ផ្ទុះការរិះគន់ និងចែករំលែកវីដេអូលោកមេប៉ុស្ដិ៍រដ្ឋបាលឃុំស្រែចារ ត្រូវបានសម្រេច​ដកបញ្ឈរជើងជាបណ្តោះ​អាសន្នពាក់ព័ន្ធ​ការចុះទៅហាមឃាត់ការសម្តែងសិល្បៈល្ខោនក្នុង​ពិធីបុណ្យកឋិនទាន​នៅវត្តអូរលុងភូមិអូរលុងឃុំស្រែចារ​ ស្រុកស្នួល ខេត្ត​ក្រចេះ កាលពីយប់ថ្ងៃទី២២ ខែវិច្ឆិកា ឆ្នាំ២០២៣៕ 

អត្ថបទ៖ ចាន់រ៉ា