Charlie Puth រក្សាភាពស្ងៀមស្ងាត់ ក្រោយគេចោទសួររឿងរៀបការជាមួយគូដណ្ដឹង

រូបភាពមួយសន្លឹករបស់តារាចម្រៀងអាមេរិកាំង Charlie Puth ជាមួយគូដណ្ដឹង Brooke Sansone កំពុងបង្កឱ្យអ្នកគាំទ្រងឿងឆ្ងល់ថា តើលោកបានរៀបការឬមិនមែន? ព្រោះរូបភាពដែលបង្ហោះចេញដោយតារាប្រុសរូបនេះ មើលទៅពិតជាដូចជាកូនកម្លោះ-ក្រមុំដើរចូលក្នុងពិធីណាស់។

តាមរយៈរូបថតដែល Charlie Puth បង្ហោះនៅលើបណ្ដាញសង្គម Instagram កាលពីប៉ុន្មានថ្ងៃមុន នៅតែបន្តទុកចម្ងល់ឱ្យអ្នកគាំទ្រជាច្រើន ដោយសារក្រោយបញ្ចេញរូបជាសាធារណៈ សាមីខ្លួនមិនព្រមចេញមុខបកស្រាយអ្វីទាំងអស់ រឿងលោករៀបការមែនឬអត់។ ចំណែកខេបសិន (Caption) ទៀតសោតក៏ម្ចាស់បទ “See You Again” មិនសរសសេរអ្វី ក្រៅពី emojis ។

អ្នកខ្លះបានចូលរួមត្រេកអរ និងជូនពរដល់អាយដលពួកគេ ខណៈខ្លះទៀតមិនទាន់ជឿជាក់ថា Charlie Puth រៀបការនោះទេ។ យ៉ាងណាមិញ មានអ្នកគាំទ្រមួយចំនួនទៀតបាននិយាយថា តារាប្រុសវ័យ ៣១ឆ្នាំរូបនេះ មិនទាន់រៀបការនៅឡើយ ហើយរូបភាពនោះជាពិធីដើរចូលរបស់អ្នកកំដរ នៅក្នុងអាពាហ៍ពិពាហ៍បងប្រុសរបស់គូដណ្ដឹង Charlie Puth ប៉ុណ្ណោះ ៕

ប្រែសម្រួល៖ សន្យា