Angelina បង្ហើបគម្រោង ចង់លាឈប់ពីសិល្បៈ ​មករស់នៅកម្ពុជាវិញ

Angelina Jolie ទម្លាយថា នាងចង់លាឈប់ពីការងារសិល្បៈ និងមានគម្រោងចាកចេញពីទីក្រុងឡូសអេនជឺលេស មកចំណាយពេលបន្ថែមទៀតនៅក្នុងប្រទេសកម្ពុជា ស្របពេលដែលកំពុងមានជម្លោះដ៏ជូរចត់ជាមួយអតីតស្វាមី Brad Pitt ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាសម្តែងវ័យ ៤៨ ឆ្នាំរូបនេះ បានថ្លែងប្រាប់ទស្សនាវដ្តី The Wall Street Journal ដែលចេញផ្សាយនៅខែធ្នូនេះថា នាងទំនងជាមិនបានក្លាយជាតារាសម្ដែងនោះទេ​ ​​ប្រសិនបើនាងមិនចូលក្នុងឧស្សាហកម្មហូលីវូដ ប៉ុន្តែបច្ចុប្បន្ននេះនាងមិនពេញចិត្តរស់នៅលើទឹកដីនេះទៀតឡើយ ។

ក្នុងនោះផងដែរ Angelina ប្រាប់ថា នាងចង់ផ្លាស់ទៅឆ្ងាយឲ្យបានឆាប់តាមដែលអាចធ្វើបាន ដើម្បីទៅរស់នៅផ្ទះរបស់នាងនៅប្រទេសកម្ពុជា ពោលមិនចាំបាច់រហូតដល់ការតស៊ូផ្លូវច្បាប់ដែលកំពុងបន្តជាមួយអតីតស្វាមីរបស់នាងចប់សប់គ្រប់នោះទេ ។

Angelina បានប្រាប់ទស្សនាវដ្ដី WSJ ​ទៀតថា ដោយសារតែបញ្ហាផ្លូវច្បាប់​នៅ​តុលាការនេះហើយ​ ទើប​នាំឲ្យនាងបាត់បង់​លទ្ធភាព​ក្នុង​ការ​រស់នៅ និងដើរហើរ​ដោយ​សេរី ។​ នាងបាននិយាយថា “វាជាផ្នែកមួយនៃអ្វីដែលបានកើតឡើងបន្ទាប់ពីការលែងលះរបស់ខ្ញុំ។ ខ្ញុំបានបាត់បង់សមត្ថភាពក្នុងការរស់នៅនិងធ្វើដំណើរដោយសេរី។ ប៉ុន្តែខ្ញុំនឹងផ្លាស់ប្ដូរកន្លែង នៅពេលដែលខ្ញុំអាចធ្វើបាន”។

នាងបានសារភាពថា ប្រសិនបើអាចចាប់ផ្ដើមសាជាថ្មី នាងទំនងជាមិនជ្រើសរើសយកការសម្ដែងជាអាជីពរបស់នាងទេ ដោយសារតែមានការចែករំលែកព័ត៌មានលម្អិតអំពីជីវិតផ្ទាល់ខ្លួន ដែលកើតចេញពីភាពល្បីល្បាញមួយនេះ ។

តារាស្រីហូលីវូដរូបនេះបាននិយាយបន្ថែមទៀតថា “តើអាចទៅរួចទេដែលខ្ញុំអាចទៅកន្លែងណាមួយ ហើយរីករាយនឹងការស្លៀកពាក់ ហើយមិនធ្វើឲ្យនរណាម្នាក់ឈឺចាប់? “។

ទោះជាយ៉ាងណាក៏ដោយ ប្រសិនបើ Angelina ឈប់សម្រាកពីការសម្តែង នោះមិនមែនមានន័យថា នាងនឹងឈប់ធ្វើការទាំងស្រុងនោះទេ។ នាងនៅតែមានគម្រោងបន្តអាជីពសម្ដែង ប៉ុន្តែមិនមែនជាប់លាប់រហូតចងជើងនាងនោះទេ។

សូមបញ្ជាក់ដែរថា Angelina និង Brad Pitt បានចាប់ផ្តើមទាក់ទងគ្នានៅឆ្នាំ ២០០៥ ហើយរៀបការនៅឆ្នាំ ២០១៥ ប៉ុន្តែបានបែកគ្នាវិញ ​។ តាំង​ពី​បែក​គ្នា​មក តារា​ទាំង​ពីរ​ក៏​បាន​ឈ្លោះ​គ្នា​នៅ​តុលាការ​ជុំវិញ​ហាង​ស្រា​ដែល​ពួក​គេ​ធ្លាប់​ជា​ម្ចាស់​ភាគហ៊ុនជាមួយ​គ្នា ៕

ប្រែសម្រួល៖ សាង ស្រីល័ក្ខ

ប្រភព៖Daily Mail

ចុចអាន៖Taylor Swift ត្រូវគេវែកញែករឿងសម្រស់ធ្លាក់ចុះខ្លាំង ក្រោយបង្ហាញខ្លួនក្នុងព្រឹត្តិការណ៍ Beyonce