លោក ដួង សុខគា បំផុតរួមគ្នាលុបបំបាត់់ក្រុមបំពុលសង្គមតាមបណ្តាញសង្គម

ដោយសង្កេតឃើញថា បច្ចុប្បន្នកំពុងមានបុគ្គលមួយចំនួនបានបង្កើតនូរឿងរ៉ាវជេរបញ្ជោរគ្នាអត់ប្រយោជន៍ ដែលនាំឱ្យបំពុលសង្គមតាមរយ:ការប្រើប្រាស់បណ្តាញសង្គមហ្វេសប៊ុក ធ្វើជាឈ្នាន់ដើម្បីទាញយកផលប្រយោជ៍ផ្ទាល់ខ្លួន តារាពហុជំនាញ លោក ដួង សុខគា បានចេញមកបំផុសអ្នកគាំទ្រ ត្រូវរួមគ្នាលុបបំបាត់។

ជាមួយគ្នានោះ លោក ដួង សុខគា បានលើកឡើងនៅលើបណ្តាញសង្គមផ្ទាល់ខ្លួនដោយចាត់ទុកថា ការលេងហ្វេសប៊ុក គឺដើម្បីទទួលចំណេះដឹង កុំបង្កើតរឿងក្តៅក្រហាយចាក់ឆ្កឹះរុកឆ្កៀល។ ក្នុងនោះ លោកបានបង្ហោះសារភ្ជាប់អត្ថន័យមួយប្រយោគដែលមានខ្លឹមសារថា “យុទ្ធនាការចូលរួមគ្នាប្លុកអាខោន ឬផេកណាផ្សាយរឿងអត់ប្រយោជន៍”។

លោក ដួង សុខគា បានបញ្ជាក់ថា ពេលខ្លះមើលហ្វេសប៊ុកដើម្បីទទួលបានចំណេះដឹង និងការកម្សាន្តអារម្មណ៍បន្ទាប់ពីនឿយហត់ តែបើអូសមិនផុតពីរឿងក្តៅក្រហាយចាក់ឆ្កឹះរុកឆ្កៀលទេ មិនដឹងមើលធ្វើអ្វី? ហត់ណាស់។ លោកថា ធ្វើបែបនេះអ្នកចូលចិត្តកូរសង្គមដើម្បីប្រយោជន៍ផ្ទាល់ខ្លួនទំនងស្គាល់ខ្លះហើយ លាហើយភាពក្តៅក្រហាយ។

តាមរយៈការលើកឡើងខាងលើ មានអ្នកគាំទ្រមួយចំនួនបានចូលបញ្ចេញមតិគាំទ្រ និងខ្លះលើកឡើងថា៖ “របស់ដែលមិនចំណេញគ្មានប្រយោជន៍ ទុកនាំតែចង្អៀត ខ្ញុំចាប់ផ្តើមធ្វើយូរហើយ មិនត្រឹមតែប្លុកទេ report ទៀតស្អប់ណាស់ដើម្បីតែលុយពេកហើយ”, “បាទ ខ្ញុំសូមចូលរួមគាំទ្រ ១០០ភាគរយ”, “សូមចូលរួមទាំងគ្នាដើម្បីលុបបំបាត់ក្រុមបំពុលសង្គមរាល់ថ្ងៃនេះ”…។

ជាការពិត គេកត់សម្គាល់ថា តារាប្រុស លោក ដួង សុខគា ជារឿយៗលោកតែងតែចេញមុខបំផុសស្មារតីដល់យុវជនដែលជាកូនខ្មែរគ្រប់រូប ត្រូវនាំគ្នាចូលរួមថែរក្សាតម្លៃវប្បធម៌ អរិយធម៌ និងភាសាជាតិ អក្សរជាតិ ដែលជាកេរតំណែលមរតកដូនតាខ្មែរដ៏ល្អផូរផង់៕

អត្ថបទ៖ ចាន់រ៉ា