សិល្បករ សិល្បការិនី ជាង៣០០នាក់ ត្រៀមអង្រួនកក្រើកមហាព្រឹត្តិការណ៍វប្បធម៌«រាត្រីចងចាំ»

នៅថ្ងៃទី១៤ ខែធ្នូ ឆ្នាំ២០២៣ខាងមុខនេះ ក្រសួងវប្បធម៌និងវិចិត្រសិល្ប: នឹងរៀបចំមហាព្រឹត្តិការណ៍វប្បធម៌ «រាត្រីចងចាំ» លើកទី៤ ក្នុងឆ្នាំ២០២៣ ដែលធ្វើឡើងនៅលើទឹកដីប្រវត្តិសាស្រ្តខេត្តសៀមរាបអង្គរ។

មហាព្រឹត្តិការណ៍វប្បធម៌អស្ចារ្យទៀតនោះ ក៏មានការចូលរួមសម្តែងដោយសិល្បករ-សិល្បការិនីល្បីៗជាង៣០០នាក់ត្រៀមខ្លួនអង្រួនឲ្យកក្រើកព្រឹត្តិការណ៍វប្បធម៌នេះផងដែរ។ ក្រសួងវប្បធម៌និងវិចិត្រសិល្ប: បានបញ្ជាក់ថា មហាព្រឹត្តិការណ៍ទស្សនីយភាពសិល្ប: វប្បធម៌ដ៏អស្ចារ្យ “រាត្រីចងចាំលើកទី៤” ឆ្នាំ២០២៣ គឺការបង្ហាញជូននូវសម្បត្តិបេតិកភណ្ឌវប្បធម៌រូបី និងអរូបី ព្រមទស្សនីយភាពសិល្ប:ចម្រុះជាច្រើនទម្រង់។

មហាព្រឹត្តិការណ៍ដ៏អស្ចារ្យនេះ ក៏នឹងមានការចូលរួមសម្តែងពីសិល្បករ-សិល្បការិនីទាំងក្នុងនិងក្រៅប្រព័ន្ធជាង៣០០នាក់ត្រៀមសម្តែងជូនទស្សនានៅរាត្រីថ្ងៃទី១៤ ខែធ្នូ ឆ្នាំ២០២៣ដើម្បីចូលរួមអបអរសាទរខួប៣១ឆ្នាំនៃការដាក់បញ្ចូលរមណីយដ្ឋានអង្គរក្នុងបញ្ជីបេតិកភណ្ឌវប្បធម៌រូបីនៃពិភពលោករបស់អង្គការយូណេស្កូ និងដើម្បីអបអរសាទរពិធីបុណ្យរម្លឹកគុណអង្គរផងដែរ។

មហាជនជនក៏អាចចូលរួមទស្សនាបានដោយសេរីនៅក្នុងបរិវេណព្រះលានជល់ដំរីវេលាម៉ោង១៧:០០ ល្ងាចតទៅ។ កិច្ចការពារបេតិកភណ្ឌវប្បធម៌ជាភារកិច្ចរបស់កូនខ្មែរគ្រប់ៗរូប៕

អត្ថបទ៖ ចាន់រ៉ា