តួប្រុសក្នុងរឿង X-Men លោក Adan Canto ទទួលមរណភាពនៅអាយុ៤២ឆ្នាំ

តារាសម្តែង Adan Canto ដែលត្រូវបានគេស្គាល់លើតួនាទីរបស់គាត់នៅក្នុងរឿង “The Cleaning Lady” និង “Designated Survivor” បានទទួលមរណភាពនៅអាយុ ៤២ ឆ្នាំដោយសារតែជំងឺមហារីកពោះវៀនធំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Canto បានទទួលមរណភាពកាលពីថ្ងៃច័ន្ទ ដោយសារជំងឺមហារីកពោះវៀនធំ នេះបើយោងតាមអ្នកផ្សព្វផ្សាយដោយ Jennifer Allen ដែលបាននិយាយនៅក្នុងសេចក្តីថ្លែងការណ៍មួយផ្ញើទៅកាន់ CNN ថា Canto “មានស្មារតីរឹងមាំណាស់ គាត់លាក់បាំងមនុស្សគ្រប់គ្នាថាគាត់មិនបានឈឺ ដើម្បី​កុំ​ឲ្យ​អ្នក​ដទៃ​ព្រួយ​បារម្ភ​ពី​គាត់ មានមនុស្សតិចណាស់បានដឹង”។

កើតនៅប្រទេសម៉ិកស៊ិក និងធំធាត់នៅរដ្ឋតិចសាស់ លោក Canto គឺជាតារាសម្តែង និងតន្ត្រីករដ៏ប៉ិនប្រសប់ម្នាក់ដែលកំពុងសម្តែងក្នុងរឿង “The Cleaning Lady” របស់ Fox ដែលកំពុងថតរដូវកាលទី៣ នៅពេលគាត់ទទួលមរណភាព។ Allen បាននិយាយថា Canto មិនទាន់ចាប់ផ្តើមធ្វើការនៅរដូវកាលថ្មីទេ។

ជាមួយគ្នានោះដែរ លោក Canto ត្រូវបានគេស្គាល់ផងដែរសម្រាប់តួនាទីរបស់គាត់នៅក្នុង “Designated Survivor” “Narcos” និង “Blood and Oil” ក្នុងចំណោមរឿងភាគទូរទស្សន៍ផ្សេងទៀត។ ភាពយន្តរបស់គាត់រួមមាន “X-Men: Days of Future Past” និង “Agent Game” ។

យ៉ាងណាក៏ដោយ ម​រណភាពរបស់តារាបរទេសរូបនេះបានធ្វើឲ្យពិភពសិល្បៈមានការភ្ញាក់ផ្អើលយ៉ាងខ្លាំង។ ក្នុងពេលដែលសេចក្តីថ្លែងការណ៍ Television and FOX Entertainment បានបញ្ចាក់លើកាសែត CNN ថា​​​ “យើង​ខូច​ចិត្ត​ពេលដឹង​ពី​មរណភាព​របស់ Adan Canto។ តារាសម្តែងដ៏អស្ចារ្យ និងជាមិត្តជាទីស្រឡាញ់ យើងមានកិត្តិយសដែលមានគាត់ជាផ្នែកនៃគ្រួសារ Warner Bros. Television និង FOX Entertainment ចាប់តាំងពីការបង្ហាញខ្លួនដំបូងរបស់គាត់នៅសហរដ្ឋអាមេរិកក្នុងរឿង The Following ជាងមួយទសវត្សរ៍មុន” ។

តារាសម្ដែង Adan Canto បានមកដល់ក្នុងឆ្នាំ ២០០៩ នៅពេលដែលគាត់បានបង្ហាញខ្លួននៅក្នុងវគ្គពីរនៃ “Estado de Gracia” ដែលជារឿងភាគទូរទស្សន៍ដែលបានចែកចាយនៅក្នុងប្រទេសម៉ិកស៊ិក។ គាត់បានបន្តបង្ហាញមុខក្នុងកម្មវិធីទូរទស្សន៍ និងខ្សែភាពយន្តជាច្រើនរបស់ម៉ិកស៊ិករហូតដល់ឆ្នាំ ២០១៣ នៅពេលដែលគាត់បានដើរតួរក្នុងទីផ្សារសហរដ្ឋអាមេរិកនៅរដូវកាលទី១ នៃរឿង “The Following” របស់ Fox ជាមួយ Keifer Sutherland ។

ក្រោយមក ក្នុងឆ្នាំ ២០១៤ Canto បានបង្ហាញខ្លួននៅក្នុងខ្សែភាពយន្តកំពូលវីរបុរស Marvel “X-Men: Days of Future Past” ជា Sunspot ដែលអាចផ្លាស់ប្តូរថាមពលនៃព្រះអាទិត្យ៕

អត្ថបទ៖ សាង ស្រីល័ក្ខ

ចុចអាន៖Taylor Swift តូចចិត្ត ពេលពិធីករក្នុងកម្មវិធី Golden Globes លេងសើចនឹងអារម្មណ៍នាងជ្រុល