លោក ឆាយ បូរ៉ា ៖ ទាល់តែមានការជ្រោមជ្រែងពីភាគីពាក់ព័ន្ធ ទើបវិស័យភាពយន្ដខ្មែរ អាចទទួលបានផ្លែផ្កាល្អ

ផលិតករជើងចាស់ លោក ឆាយ បូរ៉ា បានលើកឡើងថា ដើម្បីឲ្យវិស័យភាពយន្ដខ្មែរ អាចទទួលបានផ្លែផ្កាល្អ និងត្រចេះត្រចង់ ទាល់តែមានការជ្រោមជ្រែងពីគ្រប់ភាគីពាក់ព័ន្ធទាំងអស់។

លោក ឆាយ បូរ៉ា ផលិតករ និងជាម្ចាស់ផលិតកម្មដើមត្នោត បានមានប្រសាសន៍ប្រាប់ឱ្យ កម្ពុជាថ្មី ដឹងថា បច្ចុប្បន្ននេះ ភាពយន្តខ្មែរ ប្រភេទខ្នាតខ្លី និងខ្នាតធំ មានការរីកចម្រើនយ៉ាងខ្លាំង ពិសេសនោះ គឺនៅតាមរោងកុន នៅពេលចាក់បញ្ចាំងម្ដងៗ មានទស្សនិកជនចូលរួមគាំទ្រការទស្សនាយ៉ាងច្រើនកុះករ។ លោកបន្ថែមថា ការចូលរួមគាំទ្ររបស់ទស្សនិកជន ជាសញ្ញាល្អមួយដែលជួយជំរុញដល់វិស័យភាពយន្តខ្មែរ រីកច្រើនជឿនលឿន​ ដូចបណ្ដាភាពយន្តបរទេស នៅលើសកលលោក ផងដែរ។

លោក ឆាយ បូរ៉ា បញ្ជាក់ទៀតថា​ ប្រសិនបើចង់ឱ្យភាពយន្តខ្មែរអាចចូលរួមប្រកួតប្រជែងជាមួយភាពយន្តបរទេសបាន ជ្រុងមួយដែលមិនអាចខ្វះបាន គឺការជួយជ្រោមជ្រែងពីភាគីពាក់ព័ន្ធ ក្នុងនោះមាន ៖ នាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ និងដៃគូសហការ ជាមួយនឹង ក្រុមហ៊ុនផ្សេងៗ ទើបការផលិតភាពយន្តខ្មែរអាច មានគុណភាព និងអាចមានឱកាសចូលរួមប្រកួតប្រជែង ជាមួយភាពយន្តបរទេសបានយ៉ាងពិតប្រាកដ។

លោកបានបន្ថែមថា ឧទាហរណ៍ថា៖ «ប្រសិនបើយើងចង់ធ្វើស្រែទទួលបានទិន្នផលល្អ បើគ្មានប្រព័ន្ធធារាសាស្រ្ដ ឬប្រព័ន្ធទឹក និងផ្លូវ នោះទេ យើងក៏មិនអាចធ្វើស្រែបានល្អនោះដែរ!»។ «ចំណែក វិស័យភាពយន្តក៏អ៊ីចឹងដែរ ទាល់តែមានការជ្រោមជ្រែងពីភាគីពាក់ព័ន្ធ ទើបអាចទទួលបានផ្លែផ្កា យ៉ាងត្រចេះត្រចង់ ផងដែរ»។

សូមជម្រាបជូនថា ផលិតករល្បីឈ្មោះ លោក ឆាយ បូរ៉ា កាលពីពេលថ្មីៗនេះ បានដាក់សម្ពោធជាផ្លូវការស្នាដៃភាពយន្តថ្មីរបស់លោក​​ ដែលមានចំណងជើងថា «អ៊ំចនម៉ែដោះ» ជារសជាតិថ្មី ដែលលោកផលិតឡើងតម្រូវតាមទីផ្សារនាពេលបច្ចុប្បន្ន ហើយវាស័ក្តិសមបំផុតសម្រាប់ការចាក់បញ្ចាំងនាដើមឆ្នាំថ្មី២០២៤ នេះ៕

អត្ថបទ ៖​ សួស សិត